သရဲနီ တိုက်စစ်မှုးဟောင်း ဖြစ်သူ ဒီမာတာ ဘာဘာတော့ဖ်က မန်ချက်စတာယူနိုက်တက် တိုက်စစ်မှုး အက်ဒီဆင် ကာဗာနီဟာ အိုးထရပ်ဖို့ဒ်ကို ခရစ်စတီယာနို ရော်နယ်ဒို ရောက်ရှိလာခဲ့ခြင်းကြောင့် မပျော်မရွှင် ဖြစ်နေလောက်တယ်လို့ ဆိုသွားပါတယ်။ ပေါ်တူဂီ စူပါစတားဟာ အပြောင်းအရွေ့ နောက်ဆုံးရက်မှာ ဂျူဗင်တပ် ကနေ မန်ယူနိုက်တက်ကို ပြန်လည် ရောက်ရှိလာခဲ့သူ ဖြစ်ပြီး ဆိုးရှားရဲ့အသင်း အတွက် ၂ ပွဲကစား ၃ ဂိုး သွင်းယူပေးထားခဲ့ပြီး ဖြစ်ပါတယ်။
ရော်နယ်ဒိုဟာ အိုးထရပ်ဖို့ဒ်မှာ ပထမအကြိမ် ကစားခဲ့စဉ်က ယူနိုက်တက်နဲ့ အတူ ပရီးမီးယားလိဂ် ဖလား ၃ ကြိမ် ၊ ချန်ပီယံလိဂ်ဖလား ၁ ကြိမ် ဆွတ်ခူးနိုင်ခဲ့သူ ဖြစ်ပြီး ယူနိုက်တက်တို့ ဆုဖလားတွေ ပြန်လည် ရယူဖို့ ပစ်မှတ်ထားနေချိန်မှာ ယူနိုက်တက်ကို အချိန်ကိုက် ပြန်လည် ရောက်ရှိလာခဲ့တာ ဖြစ်ပါတယ်။
ဘာဘာတော့ဖ်က မန်ယူနိုက်တက် အကျီကို ရော်နယ်ဒို ထပ်မံ ၀တ်ဆင်တာကို မြင်ရတာ ၀မ်းမြောက်လျက် ရှိနေကာ ပေါ်တူဂီစတားဟာ ဒီရာသီမှာ အရှိန်ရလာတာနဲ့ အမျှ ပိုပြီး ကောင်းလာအုံးမယ်လို့ ယုံကြည်နေပါတယ်။ ဒါပေမယ့်လည်း စပါး တိုက်စစ်မှုးဟောင်းက ဆိုးရှားရဲ့ အသင်းသား တစ်ချို့ဟာ ပေါ်တူဂီ တိုက်စစ်မှုး ရောက်ရှိလာခဲ့ခြင်း အတွက် မပျော်မရွှင် ဖြစ်နေလောက်မယ်လို့ ယူဆ နေပါတယ်။
ဘာဘာတော့ဖ်က ဒီရာသီ ကာဗာနီရဲ့ ပွဲကစားခွင့် ရမယ့် အခြေအနေ အပေါ် စိုးရိမ်လျက် ရှိနေပြီး ပြီးခဲ့တဲ့ ရာသီက ယူနိုက်တက် အတွက် ခြေစွမ်းပြကာ ဂိုးတွေ သွင်းယူပေးခဲ့တဲ့ ဥရုဂွေး တိုက်စစ်မှုးဟာ ရော်နယ်ဒိုကြောင့် ပွဲကစားခွင့်တွေ နည်းပါးသွားလိမ့်မယ်လို့ ဆိုသွားပါတယ်။
ဘာဘာတော့ဖ်က “ခရစ်စတီယာနိုရော်နယ်ဒိုဟာ ယူနိုက်တက်ရဲ့ အကျီကို ပြန်လည် ၀တ်ဆင်ခဲ့ပြီးနောက် ၂ ပွဲကစားရာမှာ ၃ ဂိုး သွင်းယူထားခဲ့ပြီး ဖြစ်ပါတယ်။ ယူနိုက်တက်မှာ သူဟာ ချက်ချင်းဆိုသလို ဂိုးတွေ သွင်းယူနေတဲ့ အပေါ် ကျွန်တော် အံ့အားသင့်မိခြင်း မရှိပါဘူး။ သူဟာ ရာသီ အရှိန်ရလာနဲ့အမျှ ပိုပြီး ကောင်းလာအုံးမှာပါ။ သူ့ရဲ့ ဂိုးသွင်းစွမ်းရည် နဲ့ အသင်းအပေါ် သြဇာသက်ရောက်မှုကို မေးခွန်းထုတ်စရာ မရှိပါဘူး။ ပရိတ်သတ်တွေဟာ ပြီးခဲ့တဲ့ စနေနေ့က သူ့ကို အကောင်းဆုံး ကြိုဆိုခဲ့ကြကာ သူကလည်း ဂိုး ၂ ဂိုး နဲ့ ပြန်လည် တုန့်ပြန်ခဲ့ပါတယ်။
အိုလီအနေနဲ့ သူ့ကစားသမားတွေကို ဘယ်လို ပျော်ရွှင်အောင် manage လုပ်နိုင်မလဲ ဆိုတာကို ကျွန်တော် စိတ်၀င်တစား စောင့်ကြည့်နေပါတယ်။ ကာဗာနီ နဲ့ မာစီရယ် တို့လို ကစားသမားတွေကို ဘယ်လို အသုံးပြုသွားရမလဲ ဆိုတာကို သူ ဆုံးဖြတ် သွားရမှာပါ။ အရည်အသွေးမြင့် ကစားသမားတွေ ပြည့်နှက်နေတဲ့ အသင်းကို manage လုပ်ရတာ အရမ်းကို ခက်ပါတယ်။ ဘာလို့လဲဆိုတော့ တစ်ချို့ ကစားသမားတွေ အတွက် နာကျင်စရာ ဖြစ်နေလို့ပါပဲ။
ကာဗာနီ အနေနဲ့ လက်ရှိအခြေအနေ အပေါ် မပျော်မရွှင် ဖြစ်နေလောက်ပါတယ်။ သူဟာ ယူနိုက်တက် ကစားသမား ဘ၀ ပထမဦးဆုံး ရာသီမှာ အကောင်းဆုံး ကစားပေးခဲ့ပါတယ်။ အခုဆိုရင် သူဟာ နံပါတ် ၇ အကျီကို လွဲပေးခဲ့ရတဲ့ အပြင် ပွဲကစားခွင့်လည်း နည်းပါးသွားတော့မှာ ဖြစ်တာကြောင့် မပျော်မရွှင် ဖြစ်နေမှာပါ။
ကျွန်တော် ကတော့ အိုလီ အနေနဲ့ သူ့အသင်းရဲ့ အနာဂတ် အစီအစဉ်နဲ့ ပက်သက်ပြီး ကာဗာနီနဲ့ ရိုးရိုးသားသားပဲ ဆွေးနွေးသွားမယ်လို့ မျှော်လင့်ထားပါတယ်။ လက်ရှိ အခြေအနေမှာ ရှိနေတဲ့ ကစားသမား တစ်ဦး အနေနဲ့ မန်နေဂျာရဲ့ အလုပ်ဟာ အကောင်းဆုံး အသင်းကို ရွေးချယ်သွားဖို့ ဆိုတာ နားလည်ထား ရပါမယ်။ ဒါပေမယ့် ဘယ်ကစားသမား မဆို အမြဲတမ်း ကစားခွင့် ရချင်နေမှာ ဖြစ်ပြီး ချန်လှပ်ခံရမှုကို ပျော်ရွှင်နေမှာတော့ မဟုတ်ပါဘူး။”
ပြီးခဲ့တဲ့ကြားရက်က ချန်ပီယံလိဂ် အုပ်စုအဖွင့်ပွဲစဉ်မှာ ယန်းဘွိုင်းကို ရှုံးနိမ့်ခဲ့တဲ့ မန်ယူနိုက်တက်ဟာ လာမည့် တနင်္ဂနွေနေ့မှာတော့ ၀က်ဟမ်းနဲ့ အဝေးကွင်း ပွဲကျပ် ကစားသွားရမှာ ဖြစ်ပါတယ်။
