ရီးရဲယ် ကစားသမား တစ်ဦး အပါအဝင် မန်ယူနိုက်တက်တို့ ခေါ်ယူသင့်တဲ့ ကစားသမား ၂ ဦးကို ပြောပြလိုက်တဲ့ တင်ရှားဝုဒ်

မန်ချက်စတာယူနိုက်တက် အသင်းဟာ လက်ရှိ နွေရာသီ အပြောင်းအရွေ့ ကာလ အတွင်း ကစားသမား တစ်ဦးသာ ခေါ်ယူ ထားခဲ့ပြီး နယ်သာလန် လက်ရွေးစင် ကွင်းလယ်လူ ဒွန်နီဗန်ဒီဘိကို ပေါင်သန်း ၄၀ နဲ့ အိုင်ယက်မှ ခေါ်ယူ ထားခဲ့တာ ဖြစ်ပါတယ်။ အိုလီဂန်နာ ဆိုးရှား အနေနဲ့ အသင်းရဲ့ အင်အားကို မြှင့်တင် သွားရန် နောက်ထပ် အချိန် ၃ ပတ်လောက် ရထားပြီး ဒီကာလ အတွင်း နောက်ထပ် ကစားသမားသစ်တွေ ထပ်ရောက် လာဖို့ ရှိနေ ပါတယ်။

စပါး နည်းပြဟောင်း တင်ရှားဝုဒ်က မန်ယူနိုက်တက် အသင်း အနေနဲ့ ရီးရဲယ်မက်ဒရစ် အသင်းမှာ အပယ်ခံ ဖြစ်နေတဲ့ တောင်ပံ ကစားသမား ဂါရက်ဘေးကို ခေါ်ယူရန် တိုက်တွန်း ပြောဆိုလိုက် ပါတယ်။ ဝေးလ်လက်ရွေးစင်ဟာ ဘေးဟာ နည်းပြ ဇနက်ဒင်းဇိဒန်းနဲ့ ဆက်ဆံရေး ပြိုကွဲမှာ ရီးရဲယ်မက်ဒရစ် အသင်းမှာ ကစားခွင့် မရတော့တဲ့ အခြေအနေကြောင့် ဒီနွေရာသီမှာ ဘာနေဗျူး ကနေ ထွက်ခွာဖို့ အတွက် ကြိုးပမ်းလျက် ရှိနေပါတယ်။

ဒါ့ကြောင့် တော့တင်ဟမ် နည်းပြဟောင်းက မန်ယူနိုက်တက် အသင်း အနေနဲ့ ဒီလို အခွင့်အရေးကောင်းကို အသုံးချကာ အသင်းရဲ့ လိုအပ် နေတဲ့ ညာတောင်ပံ တိုက်စစ် နေရာ အတွက် ဂါရက်ဘေးကို ခေါ်ယူ သွားရန် တိုက်တွန်း သွားခဲ့ပြီး နောက်ထပ် ပရီးမီးယားလိဂ် ကြယ်ပွင့် တစ်ဦး ကိုလည်း အရ ခေါ်ယူရန် အကြံပေး သွားပါတယ်။

ရှားဝုဒ်က “အသင်းတွေ ခံစစ်ကို အထိုင်ချပြီး ကစားတဲ့ အခါမှာ မန်ချက်စတာယူနိုက်တက်တို့ ရုန်းကန် ခဲ့ရပါတယ်။ ဒါဟာ ပြီးခဲ့တဲ့ ဇန်နဝါရီ အပြောင်းအရွေ့က ဘရူနိုဖာနန်ဒက် မန်ယူနိုက်တက်ကို မရောက်ရှိမီက ဖြစ်ပါတယ်။ ဖာနန်ဒက်ဟာ နေရာလွတ် တွေကို ကောင်းကောင်း မြင်သူ ဖြစ်ပြီး ပြိုင်ဘက် ခံစစ်ကြောင်းကို ဖွင့်နိုင်တဲ့ ဖန်တီးမှု စွမ်းရည်ကို ပိုင်ဆိုင် ထားပါတယ်။

ဗန်ဒီဘိ ကလည်း ဒီလိုမျိုး လုပ်နိုင်စွမ်း ရှိပါတယ်။ သူဟာ ကွင်းလယ် ကနေ ပင်နယ်တီ ဧရိယာထဲကို late runs တွေနဲ့ ဝင်ရောက်ကာ ဂိုးသွင်း နိုင်သူ ဖြစ်ပါတယ်။ ဒါပေမယ့် ကျွန်တော်သာ ဆိုရင် ဂျက်ဂရီလစ်ချ် ကိုလည်း ခေါ်ယူ သွားမှာ ဖြစ်ပါတယ်။ သူဟာ ပြိုင်ဘက် ခံစစ်ကြောင်းကို ဖွင့်နိုင်စွမ်း ရှိတဲ့သူ ဖြစ်ပြီး နောက်ထပ် ဖာနန်ဒက် တစ်ဦး ဖြစ်ကာ ယူနိုက်တက်တို့ လိုအပ်တဲ့ နောက်ထပ် အရည်အသွေး တစ်မျိုးကို ပေးနိုင်မယ့် သူပါ။

ပြီးတော့ ကျွန်တော် ဂါရက်ဘေးကို ရီးရဲယ်မက်ဒရစ် ထံကနေ အလွတ် ပြောင်းရွေ့ကြေးနဲ့ ခေါ်ယူ သွားချင်ပါတယ်။ ကျွန်တော့် အမြင် ကတော့ ဘေး အနေနဲ့ ပရီးမီးယားလိဂ် ပြိုင်ပွဲကို ပြန်လည် အခြေချကာ ပွဲတွေ ဆက်တိုက် ကစား သွားဖို့ လိုအပ်တယ်လို့ ထင်ပါတယ်။ သူ့မှာ ကမ်းလှမ်းချက် အများအပြား ရှိနေမယ်လို့ ကျွန်တော် ထင်ပါတယ်။ အကယ်၍ သူသာ မန်ယူနိုက်တက် အသင်းကို ပြောင်းရွေ့ လာခဲ့မယ် ဆိုရင် လာမည့် ရာသီ အနည်းငယ်တော့ သူ တောက်ပစွာ ကစား နိုင်ပါလိမ့်မယ်။” လို့ ဆိုလိုက် ပါတယ်။

တစ်ချိန်တည်းမှာပဲ နည်းပြ ဆိုးရှားက မန်ယူနိုက်တက်ဟာ အမြဲတမ်း အသင်းကို အင်အား ဖြည့်တင်း သွားဖို့ လုပ်ဆောင် နေတယ်လို့ ဝန်ခံ သွားခဲ့ပြီး အကယ်၍ မှန်ကန်တဲ့ ကစားသမား မှန်ကန်တဲ့ ဈေးနှုန်းသာ ရခဲ့မယ် ဆိုရင် အပြောင်းအရွေ့ ဈေးကွက် မပိတ်မီ ကစားသမား ခေါ်ယူမှု လုပ်ဆောင် သွားမှာ ဖြစ်တယ်လို့ ဆိုသွားပါတယ်။

ဆိုးရှားက “ဒီအချိန်ဟာ ထူးဆန်းတဲ့ အချိန် ထူးဆန်းတဲ့ ကမ္ဘာ ဖြစ်ပါတယ်။ ဘဏ္ဍရေးပိုင်းအရ ကလပ် တော်တော် များများ ထိခိုက်မှုတွေ ရှိနေမယ် ဆိုတာ သေချာပါတယ်။ ဒါ့ကြောင့်လည်း အပြောင်းအရွေ့ ဈေးကွက်မှာ ကစားသမား ခေါ်ယူမှုတွေ သိပ်ပြီး များများစားစား မတွေ့ရတာ ဖြစ်ပါတယ်။ ကျွန်တော်တို့ဟာ အသင်းကို အမြဲတမ်း တိုးတက်အောင် နည်းလမ်း ရှာဖွေ နေကာ ကစားသမားတွေကို စောင့်ကြည့် ပါတယ်။ အကယ်၍ ဘဏ္ဍရေးပိုင်း အရကော ၊ ဘောလုံးပိုင်း အရ မှန်ကန်မှု ရှိခဲ့မယ် ဆိုရင် ကျွန်တော်တို့ အပြောင်းအရွေ့ လုပ်ဆောင် သွားမှာ ဖြစ်ပါတယ်။ ဒါပေမယ့် အပြောင်းအရွေ့ ဈေးကွက်က ဘယ်လိုလဲ ဆိုတာ အခြား ကလပ်တွေကို ဘယ်လိုတွေ ထိခိုက် နေသလဲ ဆိုတာ ကျွန်တော်တို့ မသိနိုင်ပါဘူး။”