ရီးယဲလ်မက်ဒရစ်အသင်း၏ ဒဏ်ရာရကစားသမားစာရင်းတွင် ညာနောက်ခံလူ ကာဗာဟယ်လ် ထပ်တိုးလာပြီး ဒဏ်ရာပြဿနာများစွာ ရင်ဆိုင်နေရသည့်အခြေအနေကို စိုးရိမ်မိကြောင်း နည်းပြဖြစ်သူ ဇီဒန်းက ဖွင့်ဟ ပြောကြားသည်။
ကာဗာဟယ်လ်သည် တနင်္ဂနွေနေ့က ဗလင်စီယာအသင်းနှင့်ပွဲတွင် ပွဲထွက်အဖြစ် ကစားခဲ့သော်လည်း ဒဏ်ရာပြဿနာကြောင့် ပထမပိုင်း ၂၈ မိနစ်မှာပင် လူစားလဲခဲ့ရသည်။
ရီးယဲလ်အသင်းတွင် အဓိကကစားသမားများဖြစ်သည့် အသင်းခေါင်းဆောင် ရာမို့စ်၊ ဟာ ဇက်၊ ဗယ်လ်ဗာဒီ၊ မာဆယ်လိုနှင့် ရိုဒရီဂိုတို့လည်း ဒဏ်ရာကြောင့် အနားယူနေရသဖြင့် ကာဗာဟယ်လ်၏ဒဏ်ရာသတင်းမှာ ထိုးနှက်ချက်ဖြစ်စေခဲ့သည်။
ကာဗာဟယ်လ်သည် ယခုရာသီတွင် ဒဏ်ရာပြဿနာများကြောင့် ရုန်းကန်နေရပြီး စတုတ္ထအကြိမ် ဒဏ်ရာရရှိခဲ့ခြင်းဖြစ်သည်။
၎င်းသည် ဒူးဒဏ်ရာကြောင့် အောက်တိုဘာ ၂ ရက်မှ နိုဝင်ဘာ ၂၀ ရက် အထိ တံကောက်ကြောဒဏ်ရာကြောင့် နိုဝင် ဘာ ၂၈ ရက်မှ ဒီဇင်ဘာ ၁၁ ရက်အထိ၊ တံ ကောက်ကြောဒဏ်ရာကြောင့် ဇန်နဝါရီ ၃ ရက်မှ ဖေဖော်ဝါရီ ၁၂ ရက်အထိ အနားယူခဲ့ရပြီး ယခုထပ်မံရရှိခဲ့သည့် ဒဏ်ရာမှာမူ အခြေအနေမသိရသေးဘဲ Scan ရလဒ် စောင့်ဆိုင်းရဦးမည်ဖြစ်သည်။
သို့ဖြစ်ရာ ဇီဒန်းက ”ဘာကြောင့် အခုလိုဖြစ်နေလဲဆိုတာ ကျွန်တော် နားမလည်နိုင်ပါဘူး။ ဒဏ်ရာပြဿနာတွေက တော်တော်များလို့ ကျွန်တော်စိုးရိမ်ပါတယ်။ ကစားသမားတစ်ယောက် ဆုံးရှုံးရချိန်မှာ နည်းပြဖြစ်တဲ့ ကျွန်တော့်အနေနဲ့ စိတ်အနှောင့်အယှက်ဖြစ်ရပါတယ်။ ဒါက ဆိုးရွားတဲ့အခြေအနေဆီ ပြန်ရောက်သွားတာပါ။ ကာဗာအတွက် ကျွန်တော် စိတ်မကောင်းပါဘူး။ သူက ၂၅ မိနစ်အထိ ကောင်းကောင်းကစားနိုင်ခဲ့တာပါ။ စိတ်အနှောင့်အယှက်ဖြစ်ရတာက သူက ကျွန်တော်တို့အတွက် အရမ်းအရေးပါတဲ့သူဖြစ်လို့ပါ။ သူ့ရဲ့ဒဏ်ရာ မပြင်းထန်စေဖို့ပဲ မျှော်လင့်ပါတယ်”ဟု ပွဲအပြီးတွင် ပြောကြားသည်။
