ရီးယဲလ်အသင်းနည်းပြ ဇီဒန်းက အသင်းကို ကာလရှည်ကိုင်တွယ်ရန် မသေချာကြောင်း ပြောကြားခဲ့သည်။
အသက် (၄၈)နှစ်အရွယ်ရှိ ပြင်သစ်လူမျိုးနည်းပြ ဇီဒန်းသည် ရီးယဲလ်အသင်းကို ဒုတိယအကြိမ် ကိုင်တွယ်နေပြီး ၎င်း၏ လက်ရှိစာချုပ်မှာ ၂၀၂၂ ခုနှစ်၊ ဇွန်လ (၃၀)ရက်တွင် သက်တမ်းကုန်ဆုံးမည်ဖြစ်သည်။
ယနေ့ကစားမည့် ဆယ်လ်တာဗီဂိုအသင်းနှင့် ကစားမည့် လာလီဂါပွဲစဉ်အတွက် ပြုလုပ်သည့် မီဒီယာတွေ့ဆုံပွဲတွင် သတင်းထောက်များက ဇီဒန်းအား ရီးယဲလ်အသင်းတွင် ကာလရှည်ရှိနေမည်လားဟု မေးမြန်းခဲ့သည်။
ယင်းမေးခွန်းနှင့်ပတ်သက်ပြီး ဇီဒန်းက “ကျွန်တော့်အနေနဲ့ ရီးယဲလ်အသင်းကို ကိုင်တွယ်ခွင့်ရတာ အရမ်းကံကောင်းတယ်လို့ ပြောနိုင်ပါတယ်။ ဒီအသင်းမှာ ဘယ်လောက်ကြာမလဲ။ တစ်လလား။ တစ်နှစ်လား။ ဒါမှမဟုတ် (၄)နှစ်လား။ ဒါတွေကို ကျွန်တော် မပြောနိုင်ပါဘူး။ ဘဝဆိုတာ တစ်နေ့ချင်းစီ ဖြတ်သန်းရတာပါ။ ကျွန်တော့်အနေနဲ့ တစ်နေ့ချင်းစီလိုက် လေ့ကျင့်ရေးအစီအစဉ်တွေ၊ ပွဲတွေမှာ အကောင်းဆုံးဖြစ်အောင် အစွမ်းကုန်ကြိုးစားနေပါတယ်။ ကျန်တာကို ကျွန်တော် မသိပါဘူး။ တစ်ပတ်အတွင်း ဘာတွေ ဖြစ်မလဲဆိုတာတောင် ကျွန်တော် မသိပါဘူး။ ဒါကြောင့် ကျွန်တော့်အနေနဲ့ ရီးယဲလ်မှာ ရှိတဲ့ အချိန်တိုင်းကို အကောင်းဆုံးဖြစ်အောင် လုပ်ဆောင်နေပါတယ်”ဟု ပြောကြားခဲ့သည်။
ဇီဒန်းသည် ရီးယဲလ်အသင်းကို ၂၀၁၆ ခုနှစ်၊ ဇန်နဝါရီ (၄)ရက်မှ ၂၀၁၈ ခုနှစ်၊ မေလ (၃၁)ရက်နေ့အထိ ပထမအကြိမ် ကိုင်တွယ်ခဲ့ပြီး ဒုတိယအကြိမ်အဖြစ် ၂၀၁၉ ခုနှစ်၊ မတ်လ (၁၁)ရက်မှ စတင်ကာ လက်ရှိအချိန်ထိ ကိုင်တွယ်နေသူဖြစ်သည်။
၎င်းသည် ရီးယဲလ်နည်းပြဘဝတွင် လာလီဂါချန်ပီယံဆု (၂)ကြိမ်၊ ချန်ပီယံလိဂ်ဖလား (၃)ကြိမ်အပါအဝင် ဆုဖလားပေါင်း (၁၁)လုံးအထိ ရယူပေးထားသည်။
