ချယ်လ်ဆီးအသင်းနှင့် စာချုပ်သက်တမ်းကုန်ဆုံးတော့မည့် ဂျာမန်လက်ရွေးစင် နောက်ခံလူ ရူဒီဂါသည် လာလီဂါထိပ်သီးကလပ် ရီးယဲလ်မက်ဒရစ်အသင်းသို့ ပြောင်း ရွှေ့ရန် သေချာသလောက်ရှိနေသော်လည်း ယခုရာသီကုန်မှသာ တရားဝင်ကြေညာ
ဖွယ် ရှိနေကြောင်း သိရသည်။
လက်ရှိတွင် ရီးယဲလ်အသင်းနှင့် ရူဒီဂါအကြား နှုတ်အားဖြင့် သဘောတူညီမှုရထား ပြီး ၂၀၂၆ ခုနှစ်အထိ လေးနှစ်သက်တမ်းရှိ စာချုပ် ချုပ်ဆိုသွားမည်ဟု သတင်းများက ဖော်ပြလျက်ရှိသည်။ အသက် ၂၉ နှစ်အရွယ်ရှိပြီဖြစ်သူ ရူဒီဂါအနေဖြင့် မေလအတွင်း စာချုပ်ချုပ်ဆိုခဲ့လျှင်ပင် တရားဝင်ကြေညာမှုကို ယခုရာသီကုန်တွင်မှ တရားဝင်ထုတ်ပြန်ဖွယ်ရှိသည်။
ရူဒီဂါသည် ရီးယဲလ်အသင်း တွင် တစ်ပတ်လစာ ပေါင် နှစ်သိန်းဝန်းကျင်ခန့် ရဖွယ်ရှိနေကြောင်း သိရသည်။ ချယ်လ် ဆီးအသင်းသည်လည်း ရူဒီဂါကို စာချုပ်သစ် ချုပ်ဆိုရန် တစ်ပတ်လစာ အနိမ့်ဆုံး ပေါင် နှစ်သိန်းဝန်းကျင်ဖြင့်ပင် ကမ်းလှမ်းခဲ့ဖွယ်ရှိသော်လည်း လက်မှတ်ထိုးကြေး၊ အေးဂျင့်ခများတောင်းဆိုမှုများတွင် အပြီးသတ်သဘော တူညီမှု မရရှိသောကြောင့် အသင်းမှ ထွက်ခွာရန် ဆုံးဖြတ်ခဲ့ခြင်းဖြစ်သည်။
ရူဒီဂါသည် ၂၀၁၇ ခုနှစ် နွေရာသီတွင် ရိုးမားအသင်းမှ ချယ်လ်ဆီးအသင်းသို့ ပြောင်းရွှေ့လာသူဖြစ်ပြီး ငါးရာသီအတွင်း ၁၉၆ ပွဲကစား၊ ၁၂ ဂိုး သွင်းယူပေးကာ အဓိကကစားသမားအဖြစ် ခြေစွမ်းပြနေသူဖြစ်သည်။ ထို့ပြင် ချန်ပီယံလိဂ်ဖလား တစ်ကြိမ်အပါအဝင် ဆုဖလား ငါးလုံး ဆွတ်ခူးထားနိုင်ခဲ့သည်။
