ပြီးခဲ့သည့်ရာသီတွင် ချယ်လ်ဆီးအသင်းမှ ရိုးမားအသင်းသို့ ပြောင်းရွှေ့ခဲ့သည့် အင်္ဂလန်တိုက်စစ်မှူး အေဘရာဟမ်က ရိုမးားအသင်းကို ပြောင်းရွှေ့ရန်ဆုံးဖြတ်ခဲ့ခြင်းမှာ သူ၏ကစားသမားဘဝတွင် အကောင်းဆုံး ဆုံးဖြတ်ချက်ဖြစ်ကြောင်း ဝန်ခံခဲ့သည်။
ထို့ပြင် အေဘရာဟမ်က အသင်းဟောင်း ချယ်လ်ဆီးသို့ ပြန်လည်ပြောင်းရွှေ့ရန် စိတ်ကူးမရှိသေးကြောင်းလည်း ပြောကြားခဲ့သည်။
ချယ်လ်ဆီးအသင်းသည် လာမည့် ၂၀၂၃ ခုနှစ်တွင် အေဘရာဟမ်ကို ပြောင်းရွှေ့ကြေးပေါင် (၆၈)သန်းဖြင့် ပြန်လည်ခေါ်ယူနိုင်မည့်အချက်အား ရိုးမားအသင်းထံ ရောင်းချစဉ်ကတည်းက စာချုပ်တွင် ထည့်သွင်းချုပ်ဆိုထားကြောင်းလည်း သိရသည်။
အေဘရာဟမ်က ရိုးမားအသင်း နှင့်အတူဖြတ်သန်းခွင့်ရသည့် တစ်ရာသီအတွင်း စိတ်ကျေနပ်မိပြီး ရိုးမားအသင်းသည် မိမိ၏အိမ်ကဲ့သိုဖြစ်နေပြီဟု ပြောကြားခဲ့သည်။
”ပရီးမီးယားလိဂ်ကို ကျွန်တော် အလျင်အမြန် မပြန်ချင်ပါဘူး။ ဒီမှာက ကျွန်တော့်ရဲ့ ကစားဟန်ကို ပြသနိုင်ပါတယ်။ ပြီးတော့ ကျွန်တော့်ကို လေးစားမှုရှိပြီး ကျွန်တော်ကိုယ်တိုင်လည်း ပျော်ရွှင်နေပါတယ်” ဟု ပြောကြားခဲ့သည်။
ထို့ပြင် အေဘရာဟမ်က ချယ်လ်ဆီးအသင်းနှင့်ပတ်သက်၍လည်း ”ကျွန်တော့်ကို ယုံကြည်ပါ။ ကျွန်တော်က အနာဂတ်အကြောင်း တွေးတတ်သူ မဟုတ်ပါဘူး။ လက်ရှိအခြေအနေကိုပဲ တွေးနေပါတယ်။ မကြာခင်စတင်တော့မယ့် ရာသီသစ်အတွက် ကျွန်တော်ပြင်ဆင်နေပါတယ်။ ရိုးမားနဲ့ အတူ နောက်ထပ်အောင်မြင်မှုတွေ ရယူသွားနိုင်ဖို့လည်း ရည်ရွယ်ထားပါတယ်။ ရိုးမားအသင်းဟာ ကျွန်တော့်အတွက် ဒုတိယဦးစားပေးရွေးချယ်မှု မဟုတ်ပါဘူး။ အကောင်းဆုံးရွေးချယ်မှုပါ” ဟု ပြောကြားခဲ့သည်။
