ရိုးမားအသင်းကို ဂျူဗင်တပ်စ်ကဲ့သို့ အဆင့်အတန်းမျိုးရောက်အောင် ဒီဘားလား စွမ်းဆောင်ပေးနိုင်မည်ဟု ကာပယ်လို ဆို

နာမည်ကျော် အီတလီဝါရင့်နည်းပြဟောင်း ကာပယ်လိုက ရိုးမားတိုက်စစ်ကစားသမား ဒီဘားလားသည် ရိုးမားအသင်းကို ဂျူဗင်တပ်စ်အသင်းကဲ့သို့ အဆင့်အတန်းမျိုး ရောက်ရှိအောင် စွမ်းဆောင်ပေးနိုင်မည်ဟု သုံးသပ်ပြောကြားခဲ့သည်။

အသက် ၂၈ နှစ်အရွယ်ရှိ အာဂျင်တီး နားတိုက်စစ်ကစားသမား ဒီဘားလားသည် ပြီးခဲ့သည့် ၂၀၂၁-၂၂ ရာသီကုန်တွင် ဂျူဗင်တပ်စ်အသင်းနှင့် စာချုပ်သက်တမ်းကုန်ဆုံးပြီးနောက် အသင်းနှင့်လမ်းခွဲခဲ့သည်။ ရိုးမားအသင်းသည် ဂျူဗင်တပ်စ်အသင်းနှင့်လမ်း ခွဲပြီးနောက် အသင်းလက်မဲ့ဖြစ်နေသည့် ဒီဘားလားကို ပြောင်းရွှေ့ကြေးအလွတ်ဖြင့် ခေါ်ယူကာ ၂၀၂၅ ခုနှစ်အထိ သက်တမ်းရှိ စာချုပ်တစ်ရပ်ချုပ်ဆိုခဲ့သည်။

ကာပယ်လိုက ဒီဘားလား ရောက်လာခြင်းကြောင့် ရိုးမားအသင်းမှာ စီးရီးအေချန်ပီယံဆုကို စိန်ခေါ်နိုင်သည့်အသင်းဖြစ်လာမည်ဖြစ်ကြောင်းနှင့် ဒီဘားလားသည် ရိုးမား အသင်းကို ဂျူဗင်တပ်စ်အသင်းလို အဆင့်အတန်းမျိုးရောက်အောင် စွမ်းဆောင်ပေးနိုင်မည်ဖြစ်ကြောင်း ပြောကြားခဲ့ခြင်းဖြစ်သည်။

ကာပယ်လိုက “ရိုးမားအသင်းရဲ့ အနာဂတ်စီမံကိန်းက စိတ်ဝင်စားစရာကောင်းပါတယ်။ ဒီဘားလားကို ခေါ်ယူလိုက်နိုင်တာကြောင့် သူတို့ဟာ စီးရီးအေမှာ ချန်ပီယံဆုကို စိန်ခေါ် နိုင်တဲ့ အသင်းဖြစ်ပါပြီ။ ဒီဘားလားက ရိုးမား အသင်းကို နောက်တစ်ဆင့်ရောက်အောင် ဆွဲတင်နိုင်တဲ့ ကစားသမားမျိုးဖြစ်ပြီး ရိုးမားအသင်းဟာ ဂျူဗင်တပ်စ်လို အဆင့်အတန်းမျိုး ရောက်လာပါလိမ့်မယ်”ဟု ပြောကြားခဲ့သည်။