ဘောလုံးဝေဖန်သူအဖြစ် ဆောင်ရွက်နေသည့် မန်ယူဂန္ထဝင် ရွိုင်ကင်းက ရာသီကြိုခြေစွမ်းပွဲများတွင် ချယ်လ်ဆီးအသင်း ရလဒ်များဆိုးရွားနေသော်လည်း တူဟယ်လ်သည် ထိပ်တန်းနည်းပြတစ်ဦးဖြစ်ပြီး ရာသီသစ်တွင် ယင်းရလဒ်ဆိုးများကို ပြောင်းပြန်လှန်နိုင်စွမ်းရှိကြောင်း သုံးသပ်ပြောကြားခဲ့သည်။
ချယ်လ်ဆီးအသင်းသည် အမေရိကန်ရာသီကြို ခရီးစဉ်တွင် မက္ကဆီကိုကလပ်အသင်းဖြစ်သည့် ကလပ်အမေရိကအသင်းကိုသာ (၂-၁) ဂိုးဖြင့် အနိုင်ရခဲ့ပြီး အမေရိကန်ကလပ် ချာလော့တီအသင်းကို ပယ်နယ်တီအဆုံးအဖြတ်ဖြင့် ရှုံးနိမ့်ခဲ့သလို၊ ပရီးမီးယားလိဂ်ပြိုင်ဘက် အာဆင်နယ်အသင်းကိုလည်း (ဝ-၄) ဂိုးဖြင့် ဂိုးပြတ်ရှုံးနိမ့်ခဲ့သည်။
ယင်းပွဲအပြီးတွင် ချယ်လ်ဆီးနည်းပြ တူဟယ်လ်သည် အသင်းကစားသမားများကို ဝေဖန်ခဲ့ပြီး မိမိတို့အသင်းမှာ ရာသီသစ်အတွက် အသင့်မဖြစ်သေးကြောင်း ပြောကြားခဲ့သည်။
သို့သော် မန်ယူဂန္ထဝင် ရွိုင်ကင်းကမူ တူဟယ်လ်အနေဖြင့် ပရီးမီးယားလိဂ်ရာသီသစ် စတင်ချိန်တွင် အသင်းကို တိုးတက်လာအောင် စွမ်းဆောင်ပေးနိုင်လိမ့်မည်ဟု ပြောကြားခဲ့ခြင်းဖြစ်သည်။
ရွိုင်ကင်းက “ပြီးခဲ့တဲ့ လအနည်းငယ်အတွင်း ချယ်လ်ဆီးအသင်းဟာ မသေချာမရေရာမှုများစွာနဲ့ ဖြတ်သန်းခဲ့ရတယ်။ အခုက အဲဒါတွေ ဖြေရှင်းပြီးသွားပါပြီ။ အသင်းပိုင်ရှင်သစ်တွေလည်း ရောက်လာပါပြီ။ ချယ်လ်ဆီးအသင်းဟာ ထိပ်တန်းနည်းပြတစ်ဦးကို ပိုင်ဆိုင်ထားပြီး သူဟာ ပြီးခဲ့တဲ့လအနည်းငယ်အတွင်း ပြဿနာပေါင်းများစွာကို ရင်ဆိုင်ခဲ့ရပါတယ်။ ပြီးခဲ့တဲ့ ရာသီက ချယ်လ်ဆီးအတွက် စိတ်ပျက်စရာဖြစ်ခဲ့ပေမဲ့ တူဟယ်လ်ဟာ ထိပ်တန်းနည်းပြဖြစ်ပြီး အကောင်းဆုံးပြန်လာလိမ့်မယ်” ဟု ပြောကြားခဲ့သည်။
ချယ်လ်ဆီးအသင်းသည် ယခုနွေတွင် ရူဒီဂါ၊ ခရစ္စတန်ဆင်တို့ုကို ဆုံးရှုံးထားသလို၊ လူကာကူကိုလည်း အင်တာမီလန်ထံ အငှားပြန်ချထားပြီး စတာလင်နှင့် ကူလီဘလီတို့ကို ပြန်လည်ခေါ်ယူထားကာ နောက်ထပ်ကစားသမားများ ထပ်မံခေါ်ယူရန် ကြိုးစားနေသည်။
ချယ်လ်ဆီးအသင်းသည် သြဂုတ် (၆)ရက်တွင် ပရီးမီးယားလိဂ်အဖွင့်ပွဲအဖြစ် အဲဗာတန်အသင်းကို အဝေးကွင်း၌ သွားရောက်ရင်ဆိုင်ရမည်ဖြစ်သည်။
