ပြီးခဲ့သည့်တနင်္ဂနွေနေ့က ကစားခဲ့သော ရာသီပိတ်ပရီးမီးယားလိဂ်ပွဲစဉ်တွင် နယူးကာဆယ်အသင်းအား အဝေးကွင်း၌(၃-၁)ဂိုးဖြင့် အနိုင်ကစားခဲ့သော လီဗာပူးလ်အသင်းမှ ကစားသမားများကို အသင်းနည်းပြယာဂန်ကလော့ပ်က ချီးကျူးပြောကြားခဲ့သည်။
ယင်းပွဲတွင် လီဗာပူးလ်အသင်းသည် ပွဲချိန်(၃၈)မိနစ်အထိ (၀-၁)ဂိုးဖြင့် အရေးနိမ့်နေခဲ့သော်လည်း ချေပဂိုး နှင့် အနိုင်ဂိုးများသွင်းကာ ပွဲအပြီးတွင် (၃-၁)ဂိုးဖြင့် အနိုင်ရရှိခဲ့ခြင်းဖြစ်သည်။
ယင်းနိုင်ပွဲကြောင့် လီဗာပူးလ်အသင်းသည် ယခုရာသီ ပရီးမီးယားလိဂ်ပြိုင်ပွဲတွင် ရမှတ်(၉၉)မှတ်အထိ ရယူနိုင်ခဲ့ပြီး အနီးဆုံးပြိုင်ဘက် မန်စီးတီးအသင်းထက် (၁၈)မှတ်အထိ အသာရ ခဲ့သည်။
ပွဲအပြီးတွင် ယာဂန်ကလော့ပ်က ”ကျွန်တော့်ရဲ့ကစားသမားလေးတွေဟာ အတော့်ကို ပြည့်စုံလုနီးပါး ဖြစ်နေကြပါပြီ။ ဒါကြောင့် ကျွန်တော်တို့အသင်းဟာ (၉၉)မှတ်အထိ ရခဲ့တာပေါ့”ဟု ပြောကြားခဲ့သည်။
လီဗာပူးလ်အသင်းသည် ပရီးမီးယားလိဂ်ပြိုင်ပွဲတွင် ၂၀၁၇-၁၈ ဘောလုံးရာသီက မန်စီးတီးအသင်း၏ အမှတ်အများဆုံး (၁၀၀ မှတ်) စံချိန်ကို လိုက်မမီနိုင်ခဲ့သော်လည်း အခြားသောစံချိန်မှတ်တမ်းများစွာ တင်နိုင်ခဲ့ကြောင်း သိရ သည်။
