ယူရိုပြိုင်ပွဲအကျိုးဆက်သည် ပြဿနာတစ်ခုကဲ့သို့ ဖြစ်စေခဲ့သည်ဟု ပြင်သစ်တိုက်စစ်မှူး ဘာပေ ဖွင့်ဟ

PSG အသင်းမှ ပြင်သစ်တိုက်စစ်မှူး ဘာပေက နိုင်ငံလက်ရွေးစင်အသင်းနှင့် ယူရို-၂၀၂၀ ပြိုင်ပွဲ ယှဉ်ပြိုင်ကစားခဲ့အပြီးတွင် ယင်း၏အကျိုးဆက်သည် သူ့အတွက် ပြဿနာတစ်ခုကဲ့သို့ ခံစားခဲ့ရသည်ဟု ဖွင့်ဟခဲ့သည်။

ပြင်သစ်အားကစားသတင်းစာ L’Equipe နှင့် Exclusive အင်တာဗျူးတွင် ဘာပေက ဝန်ခံခဲ့ခြင်းဖြစ်ပြီး ဆွစ်ဇာလန် အသင်းနှင့် ကွာတားဖိုင်နယ်ပွဲစဉ်တွင် အဆုံးအဖြတ်ပယ်နယ်တီလွဲချော်ပြီးနောက် အသင်းဖော်များထံမှ ပိုမိုထောက်ခံအားပေးမှု ရရှိသင့်သည်ဟုလည်း မှတ်ချက်ပြုခဲ့သည်။

“ကျွန်တော်ဟာ ဒီမတိုင်မီ ပြင်သစ်လက်ရွေးစင် အသင်းအတွက် ယူရိုပြိုင်ပွဲတစ်ကြိမ်မှ မကစားထားရပါဘူး။ ကျွန်တော့်ကနိုင်ငံအသင်းအတွက်ဆိုရင် လွတ်လပ်စွာနဲ့ အမြဲကစားချင်သူပါ။ ဒါတွေအားလုံးရဲ့အထက်မှာ ဘာပြဿနာမှ ကျွန်တော် မလိုချင်တာတော့ အမှန်ပါပဲ။ ဒါပေမဲ့ အဲဒီအခိုက်အတန့်ကနေ ပြဿနာတစ်ခု စတင်လာနေပြီဆိုတာ ခံစားခဲ့ရပါတယ်။ ကျွန်တော့်ရဲ့အတ္တမာနကြောင့် အသင်းရှုံးခဲ့ရတယ်ဆိုတဲ့ ဝေဖန်တိုက်ခိုက်တဲ့ မက်ဆေ့ချ်တွေလည်း လက်ခံရရှိခဲ့ပါတယ်။ ကျွန်တော်က အသင်းရဲ့လိုအပ်ချက်များစွာကို ဖြည့်ဆည်းပေးလိုသူပါ။ ပြီးတော့ အသင်းမှာ ကျွန်တော် မပါနိုင်ရင်လည်း ဗိုလ်စွဲနိုင်ပါတယ်။ အရေးကြီးဆုံးအရာကတော့ ပြင်သစ်အသင်း ဖြစ်နေလို့ပါပဲ။ ပြင်သစ်အသင်းက ကျွန်တော် မပါဘဲ ပိုအဆင်ပြေမယ်ဆိုရင် ထွက်သွားမှာပါ။ ပြင်သစ်ဘောလုံးအဖွဲ့ချုပ် ဥက္ကဋ္ဌနဲ့ ကျွန်တော် တွေ့ဆုံခဲ့ပြီး ဒီအကြောင်း ပြောဖြစ်ခဲ့တယ်။ ပယ်နယ်တီတစ်ကြိမ် လွဲချော်မှုအတွက် စော်ကားတိုက်ခိုက်ခံရတာတွေ၊ Monkey လို့ အခေါ်ခံရတာတွေနဲ့ ပတ်သက်ပြီး သူ့ကို ကျွန်တော် တိုင်ကြားခဲ့ပါတယ်။ ဒါတွေက တူညီတဲ့အကြောင်းအရာတွေ မဟုတ်ပါဘူး။ ကျွန်တော်ဟာ ပယ်နယ်တီတစ်လုံးအတွက်နဲ့တော့ တိုင်တန်းမယ့်သူမျိုးလဲ မဟုတ်ပါဘူး။ ဒီပယ်နယ်တီက ကျွန်တော် တစ်ကြိမ်တည်းသော လွဲချော်မှုလည်းဖြစ်ပါတယ်” ဟု ဘာပေက ပြောကြားခဲ့သည်။