မန်ချက်စတာ ယူနိုက်တက် အသင်းဟာ ဒီနွေရဲ့ ပထမဦးဆုံး ကစားသမား ခေါ်ယူမှု အဖြစ် အေဂျက်ဇ် အသင်းမှ နယ်သာလန် လက်ရွေးစင် ကွင်းလယ် ကစားသမား ဖြစ်သူ ဒွန်နီ ဗန်ဒီ ဘိခ် တစ်ဦးတည်း ကိုသာ ပေါင် သန်း 40 နဲ့ ခေါ်ယူ ထားခဲ့ပါ သေးတယ် ။ ယူနိုက်တက် တို့ဟာ နောက်ထပ် ခေါ်ယူမှု တွေကို လုပ်ဆောင်ဖို့ ချိန်ရွယ် နေဆဲ ပါပဲ ။
ဗန်ဒီ ဘိခ် ဆိုတာ အေဂျက်ဇ် အသင်း ရဲ့ အကယ်ဒမီထွက် ကြယ်ပွင့် ကစားသမား တစ်ဦးဖြစ်ပြီး နယ်သာလန် ထိပ်သီး ကလပ် နဲ့ အတူ ချန်ပီယံလိဂ် ဆီမီး ဖိုင်နယ် ၊ ယူရို ပါလိဂ် ဖိုင်နယ် အဆင့်တွေ အထိ တက်ရောက် ထားနိုင်ခဲ့တဲ့ အတွေ့အကြုံရင့် လူငယ် ကစားသမားလေး တစ်ဦးလည်း ဖြစ်ပါတယ် ။
အခြား တစ်ဖက် မှာတော့ ပရီးမီးယားလိဂ် ပြိုင်ပွဲမှာ အောင်ပွဲ တွေကို ဆင်နိုင် ခဲ့တဲ့ ကစားသမားကောင်း အများကြီး ပေါ်ထွက် ခဲ့ဖူးကြ ပါတယ် ။ ဒါပေမယ့် လက်တွေ့မှာတော့ အားလုံးက မအောင်မြင် နိုင်ခဲ့ကြ ပါဘူး ။ ဒီအတွက် အဲဗာတန် အသင်း မှ ကလပ်ဆန် က ဥပမာကောင်း တစ်ခုပဲ ဖြစ်ပါတယ် ။
သူဟာ 2017 ခုနှစ် တုန်းက အေဂျက်ဇ် အသင်း မှ အဲဗာတန် အသင်းဆီ ပေါင် 24.3 သန်းနဲ့ ပြောင်းရွှေ့ လာခဲ့ ပေမယ့် မျှော်လင့်ထားတဲ့ ပုံစံကောင်းတွေကို မပြသ နိုင်ခဲ့တဲ့ အတွက် တစ်နှစ် အကြာမှာ ဝါဒါဘရီမင် အသင်းဆီ ပြောင်းရွှေ့ ခဲ့ရ ပါတယ် ။ သူဟာ အဲဗာတန် အတွက် 16 ပွဲသာ ကစားပေး နိုင်ခဲ့ ပါတယ် ။
ဒါပေမယ့် ဘန်ဒီ ဘိခ် ကတော့ အက်စတွန် ဗီလာ အသင်း နဲ့ ရင်ဆိုင် ခဲ့တဲ့ ခြေစမ်းပွဲမှာ ပွဲထွက် ကစားခွင့် ရရှိ ခဲ့ပြီး ပုံစံကောင်း တွေကို ပြသ ထားနိုင် ခဲ့တဲ့ အတွက် အင်္ဂလန် မြေမှာ ရှေ့ဆက် တောက်ပ နိုင်လိမ့်မယ်လို့ ထင်ကြေး ပေးခံ နေရ ပါတယ် ။ ဒါပေမယ့် ရုဒ် ဂူးလစ် ကတော့ ကလပ်ဆန်လို ဖြစ်မလာဖို့ အတွက် ဘန်ဒီ ဘိခ်ကို သတိပေး စကား ပြောခဲ့လိုက် ပါတယ် ။
” ကျွန်တော် ကတော့ ဒွန်နီ ဗန်ဒီ ဘိခ် မန်ချက်စတာ ယူနိုက်တက် အသင်း အတွက် ပွဲထွက် ကစား ပေးမယ့် ရက်စွဲကို ရှေးရှု နေပါတယ် ။ ဒီလို အချိန် ကျွန်တော့် ခေါင်းထဲ ပေါ်လာတဲ့ ပထမဆုံး အရာ ကတော့ သူဟာ ဒုတိယမြောက် ကလပ်ဆန် ဖြစ်မလာဖို့ အတွက် သတိထား ကစား ရမယ် ဆိုတာ ပါပဲ ”
” ဥပမာ တစ်ခု အနေ နဲ့ ပြောရမယ် ဆိုရင် ဒွန်နီ ဟာ ကလပ်ဆန် လိုပဲ ကွင်းလယ် တိုက်စစ် နေရာမှာ ကစား နေရတဲ့သူ တစ်ဦးပဲ ဖြစ်ပါတယ် ။ ကလပ်ဆန် ကတော့ အဲဗာတန် အသင်းကို ရွေးချယ် ခဲ့တာပေါ့ဗျာ ။ ဒါတွေက လက်တွေ့ မှာတော့ နှိုင်းယှဉ် စရာ တစ်ခု ဖြစ်လာ ခဲ့တာ အမှန် ပါပဲ ”
” ဘယ်လိုပဲ ဖြစ်နေ ပါစေ ၊ ဒွန်နီ အတွက် မန်ချက်စတာ ယူနိုက်တက် အသင်းမှာ ကစားရေး ဆိုတာက က ကလပ်ဆန် အဲဗာတန် အသင်းမှာ ကစား ရတာထက် ပိုပြီး လွယ်ကူ နေမှာတော့ အသေအချာ ပါပဲ ။ သူဟာ တည်ဆောက် နေဆဲ အသင်း ရဲ့ လူငယ် ကစားသမား တွေနဲ့ ကစား ရမယ်လေ ”
” ယူနိုက်တက် တို့ဟာ ပွဲစဉ် တစ်ပွဲ ကစား ထားခဲ့ ကြပြီး အဲ့ဒီ ပွဲမှာ ဒွန်နီဟာ တောက်ပ နိုင်ခဲ့တယ် လို့ ကြားသိ ခဲ့ရ ပါတယ် ။ သူဟာ တိုက်စစ် ကစားသမား တစ်ဦး ဖြစ်တာကြောင့် အနားမှာ အတူး ပူးတွဲ ကစားပေးမယ့်သူ ၊ ထောက်ပံ့ ပေးနိုင်မယ့်သူ ရှိနေဖို့ လိုအပ် နေပါ လိမ့်မယ် ”
” ပြီးတော့ ရှေ့ဆက်ပြီး စောင့်ကြည် ရမှာက သူဟာ နှစ်သက်တဲ့ နေရာ တစ်ခုမှာ ကစားခွင့်ရော ရနိုင်ပါ့ မလား ဆိုတာ ပါပဲ ။ ဘာဖြစ်လို့လဲ ဆိုတော့ လက်ရှိ ယူနိုက်တက် အသင်း ရဲ့ ကွင်းလယ် တိုက်စစ် နေရာကို ပေါ်တူဂီသား ဘရူနို ဖာနန်ဒက်စ် က အပိုင်သိမ်း ထားတယ်လေ ”
” ဒါ့အပြင် ဗန်ဒီ ဘိခ် ဟာ ယူနိုက်တက် အသင်း မှာ နေ့စဉ် အကောင်းဆုံး စွမ်းရည် တွေကို ပြသ နိုင်ဖို့ အတွက် ကြိုးစား အားထုတ် ရပါလိမ့် ဦးမယ် ။ ဒီအကြောင်း ကိုတော့ မန်ဖစ် ဒီပေး က သူ့ကို ဗဟုသုတ အဖြစ် ပြောပြ ပေးနိုင်ပါ လိမ့်မယ် ” လို့ ဂူးလစ် က ပြောကြား သွားခဲ့လိုက် ပါတယ် ။
