ကမ္ဘာ့ဖလားခြေစစ်ပွဲတွင် ရလဒ်များဆိုးရွားမှုကြောင့် ယာယီနည်းပြ ဖာနန်ဒိုဒီနစ်ဇ်အား (၆)ပွဲကိုင်တွယ် အပြီးမှာပင် လမ်းခွဲခဲ့ပြီးနောက် ဘရာဇီးလ်လက်ရွေးစင်အသင်းနည်းပြသစ်အဖြစ် ဆော်ပေါ်လိုအသင်းကို ကိုင်တွယ်နေသည့် ဒေါ် ရီဗယ်လ်ဂျူနီယာက ရေပန်းစားနေကြောင်း သိရသည်။
ဖာနန်ဒိုဒီနစ်ဇ် (၄၉ နှစ်)သည် ဘရာဇီးလ်ကလပ် ဖလူမင်နန်ဆီအသင်းအား ၂၀၂၃ ကိုပါလီဘာတာဒိုးဖလားပြိုင်ပွဲတွင် ချန်ပီယံဆုနှင့် ကလပ်ကမ္ဘာ့ဖလားပြိုင်ပွဲတွင် ဗိုလ်လုပွဲ ပို့ဆောင်ပေးထားသူဖြစ်ပြီး လက်ရွေးစင်အသင်းကိုပါ ပူးတွဲကိုင်တွယ်နေခြင်းဖြစ်သည်။
ဘရာဇီးလ်အသင်းသည် ဒီနစ်ဇ် လက်ထက် (၆)လအတွင်း ကမ္ဘာ့ဖလားခြေစစ်ပွဲ (၆)ပွဲ ယှဉ်ပြိုင်ကစားရာ ဘိုလစ်ဗီးယားနှင့် ပီရူးအသင်းကိုသာ အနိုင်ရပြီး ဗင်နီဇွဲလား အသင်းနှင့်သရေ၊ ဥရုဂွေး၊ ကိုလံဘီယာနှင့် အာဂျင်တီးနား အသင်းတို့ကို (၃)ပွဲဆက် ရှုံးနိမ့်ထားခြင်းဖြစ်သည်။
ဘရာဇီးလ်အသင်းအနေဖြင့် သမိုင်းတစ်လျှောက် ကမ္ဘာ့ဖလားခြေစစ်ပွဲ အိမ်ကွင်းပွဲတွင် ပထမဆုံးအကြိမ် ရှုံးနိမ့်ခြင်းဖြစ်ပြီး တောင်အမေရိကဇုန်၌ (၁၀)သင်းရှိသည့်အနက် အဆင့် (၆)နေရာ ရောက်ရှိနေသည်။
ထို့ကြောင့် ဘရာဇီးလ်ဘောလုံးအဖွဲ့ ချုပ် (CBF) ဥက္ကဋ္ဌ အက်ဒ်နယ်လ်ဒို ရိုဒရီဂက်စ်က ဇန်နဝါရီ (၅)ရက်တွင် ဒီနစ်ဇ်နှင့် လမ်းခွဲရန် ဆုံးဖြတ်ခဲ့ခြင်းဖြစ်ကြောင်း Globo သတင်းဌာနက ဖော်ပြခဲ့သည်။
ဆော်ပေါ်လိုအသင်းအနေဖြင့် နည်းပြ ဒေါ် ရီဗယ်လ်အား အလွတ်ဖြင့် လက်လွှတ်ရန် ဆန္ဒမရှိဘဲ စာချုပ်ဖျက်သိမ်းရန်အတွက် CBF ဥက္ကဋ္ဌ ဖြစ်သူ အက်ဒ်နယ်လ်ဒိုရိုဒရီဂက်စ်ထံ ဒေါ်လာ တစ်သန်းနီးပါးပမာဏကို နစ်နာကြေးအဖြစ်ပေးချေရန် တောင်းဆိုထားခဲ့ကြောင်း သတင်းများက ဖော်ပြခဲ့ကြသည်။
