လီဗာပူးလ်နည်းပြ ယာဂန်ကလော့ပ်က ယခုရာသီကုန်တွင် အသင်းမှထွက်ခွာမည့် ဘရာဇီးလ်တိုက်စစ်မှူး ဖေမီနိုသည် အလွန်ထူးခြားသည့် ကစားသမားဖြစ်သည်ဟု ချီးကျူးပြောကြားခဲ့သည်။
လီဗာပူးလ်အသင်းသည် မေလ (၂၀)ရက်က ကစားခဲ့သည့် အက်စတွန်ဗီလာအသင်းနှင့် (၁-၁) ဂိုးဖြင့် သရေကျခဲ့သည့် ပရီးမီးယားလိဂ်အိမ်ကွင်းပွဲစဉ်တွင် ယခုရာသီကုန်တွင် အသင်းမှ စာချုပ်သက်တမ်းကုန်ပြီး ထွက်ခွာကြမည့် တိုက်စစ်မှူး ဖေမီနို၊ ကွင်းလယ်လူများဖြစ်သည့် မီလ်နာ၊ ကီတာနှင့် ချိန်ဘာလိန်တို့ကို လက်ဆောင်များပေးကာ Guard of Honour ဖြင့် နှုတ်ဆက်ခဲ့ကြသည်။
ယင်းနောက် မေလ (၂၁) ရက် (တနင်္ဂနွေနေ့)တွင် လီဗာပူးလ်အသင်းသည် အသင်းတွင် (၈)ရာသီကြာ ကစားခဲ့သည့် ဘရာဇီးလ်တိုက်စစ်မှူး ဖေမီနိုအတွက် နှုတ်ဆက်ပွဲပြုလုပ်ခဲ့ကြောင်း သိရသည်။
ယင်းဖေမီနိုနှုတ်ဆက်ပွဲကို လီဗာပူးလ်နည်းပြအဖွဲ့ဝင်များ၊ ကစားသမားများ၊ ဝန်ထမ်းများ တက်ရောက်ခဲ့ကြသည်။ ဖေမီနိုသည် လီဗာပူးလ်အသင်းအတွက် ကစားခဲ့သည့် (၈) ရာသီအတွင်း ပြိုင်ပွဲစုံ (၃၆၁)ပွဲတွင် ဂိုး (၁၁၀) သွင်းယူနိုင်ခဲ့ပြီး အသင်းနှင့်အတူ ပရီးမီးယားလိဂ်၊ ချန်ပီယံလိဂ်၊ FA ဖလား၊ လိဂ်ဖလား၊ ဥရောပစူပါဖလား၊ ဖီဖာကလပ်ကမ္ဘာ့ဖ လားနှင့် ကွန်မြူနတီဒိုင်းတို့ကို ရယူနိုင်ခဲ့သည်။
၎င်းသည် ဆုဖလားများရယူခဲ့သည့် ကလော့ပ်၏အသင်းတွင် အဓိက ကစားသမားအဖြစ် ခြေစွမ်းပြခဲ့ပြီး ယခုအခါ ကလော့ပ်က ဖေမီနိုကို ချီးကျူးစကားပြောကြားခဲ့ခြင်းလည်းဖြစ်သည်။
ကလော့ပ်က “မင်းက အရမ်းတော်တဲ့ ကစားသမားပါ။ မင်းက လေ့ကျင့်ရေးကွင်းကို အရင်ဆုံးရောက်လေ့ရှိပြီး ပထမဆုံးလေ့ကျင့်လေ့ရှိသူလည်း ဖြစ်တယ်။ ဒါက မင်းကို ထူးခြားတဲ့ ကစားသမားဖြစ်စေသလို၊ နည်းစနစ်ပိုင်းလည်း အရမ်းကို ကောင်းမွန်တယ်။ မင်းရဲ့ ဘောလုံးဦးနှောက်ကတော့ မယုံနိုင်စရာပါပဲ။ အဲဒီအရာတွေကို မင်းကို ဒီနေ့လိုထိပ်တန်း ကစားသမားဖြစ်လာစေတာပဲ”ဟု ပြောကြားခဲ့သည်။ ဖေမီနို (၃၁ နှစ်)ကို ခေါ်ယူရန် ဘာစီလိုနာနှင့် ဥရောပထိပ်တန်းကလပ်များစွာက စိတ်ဝင်စားနေကြောင်း သိရှိရသည်။