စီးရီးအေကလပ် ဂျူဗင်တပ်စ်အသင်းသို့ ပြောင်းရွှေ့ ရန် နီးစပ်နေသည့် ဘာစီလိုနာအသင်း၏ ဒတ်ချ်လက်ရွေးစင်ကြယ်ပွင့် တိုက်စစ်မှူးဒီပိုင်းသည် ယခုရက်သတ္တပတ်အတွင်း ဘာစီလိုနာအသင်းမှ ထွက်ခွာမည်ဖြစ်ကြောင်း စပိန်မီဒီယာများကဖော်ပြခဲ့ကြသည်။
အသက် (၂၈) နှစ်အရွယ်ရှိ ဒီပိုင်းသည် ပြီးခဲ့သည့် ၂၀၂၁ နွေရာသီအပြောင်းအရွှေ့က လိုင်ယွန်အသင်းမှ ဘာစီလိုနာအသင်းသို့ အလွတ်ပြောင်းရွှေ့ကြေးဖြင့်ရောက်ရှိလာသူ ဖြစ်ပြီး ဒဏ်ရာပြဿနာများနှင့်အတူ အသင်းတွင် ခြေစွမ်းပြရန်ရုန်းကန်နေရသူ ဖြစ်သည်။
ထို့ပြင် ဘာစီလိုနာအသင်းအနေဖြင့် ပြီးခဲ့သည့် ဇန်နဝါရီနှင့် ယခုနွေရာသီအပြောင်းအရွှေ့ကာလများတွင် ဖယ်ရန်တောရက်စ်၊ ရာဖင်ညာနှင့် လီဝန်ဒေါစကီးတို့ကဲ့သို့ တိုက်စစ်ကစားသမားသစ်များကို ခေါ်ယူခဲ့ရာ ဒီပိုင်းအနေဖြင့် ဘာစီလိုနာအသင်းမှ ထွက်ခွာရန်သေချာခဲ့ခြင်းဖြစ်သည်။
ဘာစီလိုနာအသင်းအနေဖြင့် ယခုနွေရာသီအပြောင်းအရွှေ့ကာလအတွင်း ကစားသမားသစ်များ ဆက်တိုက်ခေါ်ယူခဲ့သလို၊ လာလီဂါပြိုင်ပွဲ၏ လစာငွေကန့်သတ်စည်းမျဉ်းနှင့် ကိုက်ညီစေရန်အတွက် ကစားသမားများထွက်ခွာခြင်းကိုလည်း ဆက်တိုက်ဆိုသလိုပြုလုပ်နေခြင်းဖြစ်သည်။
ယခုနွေရာသီအပြောင်းအရွှေ့ကာလတွင်း ဘာစီလိုနာအသင်းမှ အဲလ်ဗတ်စ်၊ လွန်းဂလတ် (အငှား)၊ ထရင်ချာအို (အငှား)၊ နီကိုဂွန်ဇာလက်ဇ် (အငှား)၊ နေတို၊ ရီကီပွတ်၊ ဂျက်ဂလာ၊ မန်ဂျာ၊ ဝါဂူ၊ မင်ဂွယ်ဇာအစရှိသည့် ကစားသမား (၁၀)ဦး ထွက်ခွာထားပြီး လက်ရှိတွင် ဒီပိုင်းအပါအဝင် ဘရေ့ဝိတ်၊ အူဘာမီယန်း၊ ယာနစ်၊ အမ်တီတီတို့၏ အနာဂတ်မှာလည်း မသေမချာဖြစ်နေသောကြောင့် ကစားသမားထွက်ခွာမှုများ ဆက်လက်မြင်တွေ့ရဖွယ်ရှိနေကြောင်း စပိန်မီဒီယာများက ဖော်ပြခဲ့ကြသည်။
ဘာစီလိုနာအသင်းအနေဖြင့် ယခုနွေရာသီအပြောင်း အရွှေ့ကာလအတွင်း ကစားသမားအဝင်၊ အထွက်များစွာ ဖြစ်ပေါ်နေသော်လည်း အသင်းဥက္ကဋ္ဌ လာပေါ်တာကမူ မိမိတို့အသင်းအနေဖြင့် ကစားသမားသစ်များခေါ်ယူရန် ဆန္ဒရှိနေဆဲဖြစ်ကြောင်းပြောကြားခဲ့သည်။
ဘာစီလိုနာအသင်းသည် ယခုနွေရာသီအပြောင်းအရွှေ့ကာလအတွင်း ရာဖင်ညာ (လိဒ်စ်မှ ယူရို ၅၈ သန်း)၊ လီဝန်ဒေါစကီး (ဘိုင်ယန်မြူးနစ်မှ ယူရို ၄၅ သန်း)၊ ခွန်ဒဲ (ဆီဗီလာမှ ယူရိုသန်း ၅၀)၊ ကက်ဆီး (အေစီမီလန်မှ အလွတ်)နှင့် ခရစ္စတန်ဆင် (ချယ်လ်ဆီးမှ အလွတ်)တို့ကိုခေါ်ယူထားသော်လည်း အသင်း၏ ကစားသမားခေါ်ယူမှုမှာ မပြီးဆုံးသေးကြောင်း လာပေါ်တာကပြောကြားခဲ့ခြင်းဖြစ်သည်။
ဘာစီလိုနာအသင်းသည် အသင်းနှင့်အနာဂတ်မရေဖြစ်နေသည့် ဖရန်ကီဒီယွန်းနေရာတွင် အစားထိုးရန် ထိပ်တန်းအဆင့်ကွင်းလယ် လူတစ်ဦးအလိုရှိနေသလို၊ ချယ်လ်ဆီးနောက်ခံလူ မားကို့စ်အလွန်ဆိုကိုလည်းခေါ်ယူရန် စီစဉ်နေကြောင်း သိရသည်။
