ချဲလ်ဆီး အသင်း ဟာ ယခုနှစ် နွေရာသီ အပြောင်းအရွှေ့ ဈေးကွက် အတွင်း ပရီးမီးယားလိဂ် ရဲ့ ကစားသမားသစ် ခေါ်ယူမှု အများဆုံး အသင်း အဖြစ် ရပ်တည်နေပြီး ၊ လောလောဆယ် အချိန် အထိ တရားဝင် ကစားသမားသစ် ခေါ်ယူမှု ၆ခု အထိ ပြုလုပ်ထားပြီး ဖြစ်ပါတယ် ။
ဒီအထဲမှာ တိုက်စစ် အတွက် ခေါ်ယူမှု က ၃ခု နဲ့ ခံစစ် အတွက် ခေါ်ယူမှု က ၃ခု ပါဝင်ပါတယ် ။ မော်ရိုကို တောင်ပံ ကစားသမား ဟာကင် ဇီယက်ချ် နဲ့ ဂျာမနီ တိုက်စစ်မှူး တီမို ဗာနာ နဲ့ ကွင်းလယ် တိုက်စစ် ကစားသမား ကိုင်ဟာဗက်ဇ် တို့ဟာ လာမယ့် ဘောလုံး ရာသီ ချဲလ်ဆီး အသင်း ရဲ့ တိုက်စစ် ကို အဓိက ဦးဆောင်ပေးဖို့ ရှိနေပါတယ် ။
ခံစစ် အတွက် ခေါ်ယူမှု ၃ခုမှာတော့ နိုက်စ် အသင်း ကနေ အလွတ် နဲ့ ရောက်လာတဲ့ ပြင်သစ် လူငယ် ခံစစ်မှူး မာလန်းဆား ဟာ ချဲလ်ဆီး နဲ့ ၅နှစ် စာချုပ်ချုပ်ထားပေမယ့် ၊ လာမယ့် တရာသီလုံး အငှားထွက်ရဖို့ ရှိနေပါတယ် ။ လက်စတာ အသင်း ကနေ ပေါင်သန်း ၅၀ နဲ့ ပြောင်းရွှေ့လာတဲ့ ဘန်ချေဝဲလ် ကတော့ ချဲလ်ဆီး ဘယ်နောက်ခံလူ နေရာ အတွက် ပွဲထွက်ခွင့် သေချာနေပါတယ် ။
ပီအက်စ်ဂျီ ကနေ အလွတ် နဲ့ ရောက်လာတဲ့ ဘရာဇီး ဝါရင့် ခံစစ်မှူး သီယာဂို ဆေးလ်ဗား ကတော့ လာမယ့် ရာသီ ချဲလ်ဆီး အသင်း ခံစစ် ကို ဦးဆောင်ပေးမှာ ဖြစ်ပါတယ် ။ တိုက်စစ် အတွက် ခေါ်ယူမှု တွေက ချဲလ်ဆီး အတွက် အချို အပေါ် သကာဆမ်းပေးသလို ဖြစ်လာနိုင်ပေမယ့် ၊ ခံစစ် အတွက်ကတော့ ဒီ ကစားသမား တွေဟာ မဖြစ်မနေ ခေါ်ယူမှုတွေ လို့ ဆိုရမှာ ဖြစ်ပါတယ် ။
လီဗာပူး ကွင်းလယ်လူဟောင်း ဂျေမီ ရက်ဒ်နပ် ကတော့ ဒီ ကစားသမားသစ် ခေါ်ယူမှု ၆ခု ကနေ ချဲလ်ဆီး အဖို့ အကောင်းဆုံး ခေါ်ယူမှု ဖြစ်လာနိုင်မယ့် သူက ဥရောပ အတွေ့အကြုံ အပြည့်အဝ ရှိနေတဲ့ ဘရာဇီး ဝါရင့် ခံစစ်မှူး သီယာဂို ဆေးလ်ဗား ဖြစ်ကြောင်း ထုတ်ဖော် ပြောဆိုခဲ့ပါတယ် ။
Sky Sports ရဲ့ အစီအစဉ် တခုမှာ ဂျေမီ ရက်ဒ်နပ် က ” အတွေ့အကြုံ ကြွယ်ဝနေခြင်းကြောင့် သီယာဂို ဆေးလ်ဗား ဟာ ဒီရာသီ ချဲလ်ဆီး အသင်း ရဲ့ အကောင်းဆုံး ခေါ်ယူမှု ဖြစ်ကောင်း ဖြစ်လာနိုင်ပါတယ် ။ ဒါဟာ စိတ်လှုပ်ရှားဖွယ် အဖြစ်ဆုံး ခေါ်ယူမှု တခုတော့ မဟုတ်ပေမယ့် ၊ သူတို့ အသင်း ရဲ့ လူငယ် ကစားသမား တွေ အတွက် ရည်ရွယ်ပြီး ခေါ်ယူခြင်း ဖြစ်ပါတယ် ။ ”
” တခါတလေကျရင် ဟန်ချက် ပျက်နေတဲ့ အသင်း တသင်း ကို ဝင်ထိန်းပြီး တည်ငြိမ်အောင် ထိန်းသိမ်း ပေးနိုင်မယ့် ဝါရင့် ကစားသမား တယောက်ယောက် လိုနိုင်ပါတယ် ။ သီယာဂို ဆေးလ်ဗား ဟာ အေစီမီလန် ၊ ပီအက်စ်ဂျီ အသင်းတွေမှာ ကစားသမား ဘဝ ထိပ်တန်း အဆင့် အရည်အသွေး တွေ ပြသခဲ့တယ် ဆိုတာ အားလုံး သိထားကြပြီးပါပြီ ။ ”
” သူဟာ ချန်ပီယံ တယောက် ဖြစ်တယ် ၊ ချန်ပီယံလိဂ် ပြိုင်ပွဲ အတွေ့အကြုံ ပြည့်ဝသူ ဖြစ်သလို ၊ နိုင်ငံ လက်ရွေးစင် အသင်း ကိုလည်း ဦးဆောင်ခဲ့ဖူးပါတယ် ။ သူဟာ ချဲလ်ဆီး အတွက် ကြီးကျယ်တဲ့ ခေါ်ယူမှု ဖြစ်လာမှာပါ ။ ဖရန့် လမ်းပတ် က သူ့ရဲ့ အကောင်းဆုံး ခံစစ်မှူး အဖြစ် သတ်မှတ်ထားတာ ကို ကျွန်တော် တို့က စိတ်ဝင်စားစွာနဲ့ စောင့်ကြည့်ရမှာ ဖြစ်ပါတယ် ။ ” လို့ ပြောကြားခဲ့ပါတယ် ။
ဆက်လက်ပြီး ဂျေမီ ရက်ဒ်နပ် က လက်ရှိ ချဲလ်ဆီး အသင်း ရဲ့ အပြောင်းအရွှေ့ လှုပ်ရှားမှုတွေ အပေါ် ” ချဲလ်ဆီး ဟာ စပါယ်ရှယ် အသင်း တသင်း ကို တည်ဆောက်ဖို့ အစပျိုးနေပါပြီ ။ ဒီအတွက် အချိန် ယူရမှာ ဖြစ်သလို ၊ အတက်အကျတွေလည်း ရှိလာမှာပါ ။ ”
” ခင်ဗျား ဟာ တောင်ပံ တိုက်စစ်တွေမှာ ကစားနိုင်တဲ့ ဇီယက်ချ် ကို ပိုင်ဆိုင်ထားရသလို ၊ တိုက်စစ် က နေရာ ပေါင်းစုံ မှာ ကစားနိုင်တဲ့ ကိုင်ဟာဗက်ဇ် လို စူပါ စွမ်းရည် နဲ့ ကြယ်ပွင့် တဦး ကိုလည်း ရရှိထားပါတယ် ။ သူဟာ အခု အတွက် သာမက ၊ အနာဂတ် အတွက်ပါ သွင်းဂိုးတွေ ၊ လျင်မြန်မှု နဲ့ တိုက်စစ် အရည်အသွေးကောင်း တွေကို သယ်ဆောင်လာပေးမှာပါ ။
ဒါဟာ စိတ်လှုပ်ရှားဖွယ် ကောင်းပြီးသား အသင်း တသင်း အတွက် တကယ် ကြီးကျယ်တဲ့ ခေါ်ယူမှုတွေပါ ။ ” လို့ ပြောကြားခဲ့ပါတယ် ။
