ONE Championship အဖွဲ့အစည်းက ယခုနှစ်ဝက်နောက်ပိုင်းကျင်းပမည့် MMA ဘက်စုံကိုယ်ခံပညာသုံးပြိုင်ပွဲများတွင် မြန်မာကစားသမားများ၏တွဲဆိုင်းများ ပါဝင်လာဖွယ်ရှိကြောင်း သိရသည်။
ONE Championship အဖွဲ့အစည်းသည် ကိုရိုနာဗိုင်းရပ်စ် ကပ်ရောဂါအခြေအနေကြောင့် ယခုနှစ်အတွင်းကျင်းပမည့် ပြိုင်ပွဲအားလုံး ထုတ်ပြန်နိုင်ခြင်းမရှိသေးသလို ဇွန်လတွင်လည်း ပြိုင်ပွဲတစ်ပွဲသာကျင်းပရန် အတည်ပြုထုတ်ပြန်ထားသည်။
ONE Championship သည် ဇွန်လမှ ဒီဇင်ဘာအတွင်း ပြိုင်ပွဲ ၁၀ ပွဲနှင့်အထက်ကျင်းပရန် စီစဉ်ထားပြီး ယင်းကာလအတွင်း မြန်မာကစားသမားများ၏တွဲဆိုင်းများ ပါဝင်လာဖွယ်ရှိနေခြင်း ဖြစ်သည်။ မြန်မာနိုင်ငံတွင် လက်ရှိဖြစ်ပေါ်နေ သည့် အခြေအနေများကြောင့် ပြည်ပနိုင်ငံများ၌ ရောက်ရှိနေသည့် မြန်မာကစားသမားများသာ ပြိုင်ပွဲများ ထိုးသတ်ရဖွယ်ရှိနေပြီး ထီရယ်လ်ထန်က ဖေဖော်ဝါရီနှင့် အောင်လအန်ဆန်က ဧပြီတွင် ပြိုင်ပွဲများ ထိုးသတ်ထားသည်။
အောင်လအန်ဆန်သည် လက်လွှတ်ခဲ့ရသည့် မစ်ဒယ်ဝိတ်တန်းကမ္ဘာ့ချန်ပီယံဆုကို ပြန်လည်စိန်ခေါ်နိုင်ရန် ကြိုးပမ်းလျက်ရှိ ပြီး ယခုနှစ်အတွင်း နှစ်ပွဲမှ သုံးပွဲအထိ ထိုး သတ်ခွင့်ရရန် ဆန္ဒရှိကြောင်း ထုတ်ဖော်ပြောကြားထားသည်။ ထို့ကြောင့် ONE Championship အနေဖြင့် ယခုနှစ်အတွင်း အောင်လအန်ဆန်အတွက် မစ်ဒယ်ဝိတ်တန်းစိန်ခေါ်ပွဲများ စီစဉ်ပေးဖွယ်ရှိပြီး အနည်းဆုံးတစ်ပွဲ ထိုးသတ်ခွင့်ရဖွယ်ရှိကြောင်း သိရသည်။
ဘင်တန်ဝိတ်တန်းတွင် ထိုးသတ်နေသည့် ထီရယ်လ်ထန်မှာလည်း ONE Championship နှင့် လက်တွဲပြီးနောက်ပိုင်း ရလဒ်ကောင်းများ ဆက်တိုက်ရရှိထားပြီး ကမ္ဘာ့ချန်ပီယံဆုရယူနိုင်ရန်အထိ ပစ်မှတ်ထားနေသူ ဖြစ်သည်။
