ဘာစီလိုနာအသင်းနည်းပြ ဇာဗီက ယခုနွေရာသီအပြောင်းအရွှေ့ကာလတွင် ဒတ်ချ်လက်ရွေးစင်တိုက်စစ်မှူး ဒီပိုင်းအနေဖြင့် အသင်းမှထွက်ခွာမည်ဖြစ်ကြောင်း အတည်ပြုခဲ့သည်ဟု စပိန်မီဒီယာများက ဖော်ပြခဲ့ကြသည်။
အသက် (၂၈)နှစ်အရွယ်ရှိ ဒီပိုင်းသည် ပြီးခဲ့သည့် ၂၀၂၁ နွေရာသီအပြောင်းအရွှေ့က လိုင်ယွန်အသင်းမှ ဘာစီလိုနာအသင်းသို့ အလွတ်ပြောင်းရွှေ့ကြေးဖြင့်ပြောင်းရွှေ့လာသူဖြစ်သည်။
ဒီပိုင်းအနေဖြင့် ဘာစီလိုနာနှင့် အစောပိုင်းကာလများတွင် ခြေစွမ်းပြဂိုးများသွင်းယူနိုင်ခဲ့သော်လည်း ဒဏ်ရာပြဿနာနှင့် ကြုံတွေ့ပြီးနောက် အသင်းတွင် ပုံမှန်ပွဲထွက်ခွင့်ရရန် ရုန်းကန်နေရသူဖြစ်သည်။
ထို့ပြင် ဘာစီလိုနာအသင်းသည် ပြီးခဲ့သည့် ဇန်နဝါရီအပြောင်းအရွှေ့ကာလနှင့် ယခုနွေရာသီအပြောင်းအရွှေ့ကာလတွင် တိုက်စစ်မှူးများဖြစ်သည့် ဖယ်ရန်တောရက်စ်၊ အူဘာမီယန်းနှင့် လီဝန်ဒေါစကီးတို့ကိုခေါ်ယူထားသလို၊ တောင်ပံကစားသမား ဒမ်ဘီလီကိုလည်း စာချုပ်သစ်ချုပ်ဆိုထားရာ နည်းပြဇာဗီအနေဖြင့် ဒီပိုင်းအား အသင်းမှ ထွက်ခွာခွင့်ပြုခဲ့ခြင်းဖြစ်ကြောင်းသိရသည်။
လက်ရှိတွင် ဒီပိုင်းအား ခေါ်ယူရန်အတွက် ပရီးမီးယားလိဂ်ကလပ်အသင်းအချို့နှင့် စီးရီးအေကလပ်အသင်းအချို့မှ ချိတ်ဆက်မှုများရှိနေကြောင်း သိရသည်။
