ချယ်လ်ဆီးနည်းပြသစ် ပိုချက်တီနိုသည် ယခုနွေရာသီတွင် အသင်းကစားသမား (၁၀) ဦးကျော် ရောင်းချရန်စီစဉ်နေကြောင်း ဗြိတိန်သတင်းမီဒီယာ Daily Mail က ဖော်ပြခဲ့သည်။
ချယ်လ်ဆီးအသင်းသည် ပြီးခဲ့သည့် အပြောင်းအရွှေ့ဈေးကွက် (၂)ခုအတွင်း ကစားသမားသစ်များစွာ ခေါ်ယူခဲ့ခြင်းကြောင့် အသင်းကြီးကစားသမား (၃၀) ဦးကျော်အထိ ရှိနေသည့်အတွက် ယခုနွေတွင် ကစားသမားအရေအတွက် လျှော့ချရေးကို ဦးစားပေးလုပ်ဆောင်သွားဖွယ်ရှိကြောင်း သိရသည်။
ချယ်လ်ဆီးအသင်းကို ဇူလိုင်လ (၁)ရက်တွင် တရားဝင်စတင် ကိုင်တွယ်မည့် ပိုချက်တီနိုသည် ကစားသမားရောင်းချမှုများကို စောစီးစွာ ပြုလုပ်သွားရန် စီစဉ်လျက်ရှိကြောင်းလည်း သိရှိရသည်။
ပိုချက်တီနိုသည် အငှားခေါ်ယူထားသည့် ဂျော်အိုဖေးလစ်နှင့် ဇာကာရီကာတို့ကို သက်ဆိုင်ရာအသင်းများသို့ ပြန်လွှတ်မည်ဖြစ်သလို၊ အသင်းရှိ ကစားသမားများကိုပါ ရောင်းထုတ်ရန် စီစဉ်နေခြင်းဖြစ်သည်။
Daily Mail ၏ ဖော်ပြချက်အရ ပိုချက်တီနို ရောင်းထုတ်မည့် ချယ်လ်ဆီးကစားသမားများထဲတွင် အူဘာမီယန်း၊ ဇီယာ့ရှ်၊ ပူလီဆစ်၊ မန်ဒီ၊ အိုဒွိုင်း၊ လော့ဖ်တပ်ချိခ်တို့ ပါဝင်နေပြီး ကူလီဘလီ၊ အက်ဇ်ပီလီကွယ်တာနှင့် ကွန်တေတို့၏ အနာဂတ်မှာ မသေချာကြောင်း သိရသည်။
ပိုချက်တီနိုသည် အသင်းကစားသမားများကို ရောင်းချရာမှ ပေါင်သန်း (၂၈၀)ထိရရှိရန် မျှော်မှန်းနေပြီး ယင်းငွေဖြင့် အိုဆင်မန်၊ လော်တာရိုမာတီနက်ဇ်နှင့် ဗလာဟိုဗစ်တို့ထဲမှ တစ်ဦးဦးကို ခေါ်ယူလိုနေကြောင်း သိရသည်။
