ONE Championship အဖွဲ့အစည်း သည် မြန်မာ MMA ကစားသမား အောင်လအန်ဆန်၏တွဲဆိုင်းကို အစောဆုံး ဒီဇင်ဘာမှသာ ထည့်သွင်းကျင်းပဖွယ်ရှိကြောင်း သိရသည်။
ONE Championship သည် အောက်တိုဘာနှင့် နိုဝင်ဘာတွင်ကျင်းပမည့် ပြိုင်ပွဲ လေးခုမှ အဓိကတွဲဆိုင်းနှင့် Co-Main Event တို့ကို ထုတ်ပြန်ခဲ့ရာ အောင်လအန်ဆန်၏တွဲဆိုင်း ပါဝင်လာခြင်းမရှိသဖြင့် ဒီဇင်ဘာတွင်ကျင်းပရန် စီစဉ်ထားသည့် ပြိုင်ပွဲနှစ်ပွဲမှသာ ပါဝင်လာဖွယ်ရှိနေသည်။
ONE Championship သည် အောက်တိုဘာ ၁၅ နှင့် ၂၉ ရက်ပြိုင်ပွဲတွင် ပါဝင်မည့် တွဲဆိုင်းများ၊ နိုဝင်ဘာ ၁၂ နှင့် ၂၆ ရက် ပြိုင်ပွဲတွင် ပါဝင်မည့် အဓိကတွဲဆိုင်းနှင့် Co-Main Event တွဲဆိုင်းများ ထုတ်ပြန်ကြေညာထားပြီး ဒီဇင်ဘာ ၅ နှင့် ၁၇ ရက်တွင် ပြိုင်ပွဲနှစ်ပွဲ ထပ်မံကျင်းပမည်ဖြစ်သည်။
ONE Championship သည် ဒီဇင်ဘာတွင်ကျင်းပမည့် ပြိုင်ပွဲများ၌ ကမ္ဘာ့ချန်ပီယံလုပွဲများ၊ နာမည်ကြီး ကစားသမားများ၏ တွဲဆိုင်းများ ထည့်သွင်းကျင်းပရန် စီစဉ်ထားရာ ယင်းပြိုင်ပွဲများ တွင် အောင်လအန်ဆန်၏တွဲဆိုင်း ပါဝင်လာ ဖွယ်ရှိနေခြင်းဖြစ်သည်။
အောင်လအန်ဆန်သည် ကမ္ဘာ့ချန်ပီယံ ခါးပတ်နှစ်ခုစလုံး လက်လွှတ်ရပြီးနောက်ပိုင်း မစ်ဒယ်ဝိတ်တန်းပွဲစဉ်များသာ ပြန်လည်ထိုးသတ်လျက်ရှိပြီး ဇူလိုင် ၃၀ ရက်က ထိုးသတ်သည့် မစ်ဒယ်ဝိတ်တန်းစိန်ခေါ်ပွဲတွင် ဘရာဇီးလ်နိုင်ငံသား လီအန်ဒရိုကို ပထမအချီမှာပင် အလဲထိုးအနိုင်ရခဲ့သည်။
ONE Championship အနေဖြင့် လာမည့်ပွဲတွင် အောင်လအန်ဆန်ကို ကမ္ဘာ့ချန်ပီယံလုပွဲ ထိုးသတ် ခွင့်ပြုမပြု ထုတ်ပြန်ခြင်းမရှိသေးဘဲ ထိုးသတ်ခွင့်မရသေးပါက စိန်ခေါ်ပွဲသာ ထပ်မံထိုးသတ်ရမည်ဖြစ်သည်။
