ONE Championship အဖွဲ့အစည်း၏ CEO ချတ်ထရီသည် မြန်မာ MMA ကစားသမား အောင်လအန်ဆန်နှင့် ယှဉ်ပြိုင်ထိုးသတ်စေမည့် ပြိုင်ဘက်များအနက်မှ ရုရှားကစားသမား ဗစ်တာလီဘစ်ဒက်ရှ်ကို ရွေးချယ်ရန် စိတ်အားထက်သန်နေကြောင်း သိရသည်။
မြန်မာ MMA ကစားသမား အောင်လအန်ဆန်သည် ယခုနှစ်မကုန်မီ မစ်ဒယ်ဝိတ်တန်းစိန်ခေါ်ပွဲ ထပ်မံထိုးသတ်ရဖွယ်ရှိပြီး ၎င်းနှင့်ယှဉ်ပြိုင်ရမည့် ပြိုင်ဘက်မှာ ဂျပန်နိုင်ငံသား ယူရှင်အိုကာမီဖြစ်လာမည်ဟု ထင်ကြေးများ ထွက်ပေါ်နေသော်လည်း ONE Championship ၏ CEO ချတ်ထရီကမူ ရုရှားနိုင်ငံသား ဗစ်တာလီဘစ်ဒက်ရှ်ကိုသာ ရွေးချယ်ရန် စိတ်အားထက်သန်နေခြင်းဖြစ်ကြောင်း သိရသည်။
အောင်လအန်ဆန်သည် ONE မစ်ဒယ်ဝိတ်တန်း ကမ္ဘာ့ချန်ပီယံဆုအား ပြန်လည်ရယူနိုင်ရန် ကြိုးပမ်းနေသူဖြစ်ပြီး ဇူလိုင် ၃၀ ရက်ကထိုးသတ်သည့် စိန်ခေါ်ပွဲတွင် ဘရာဇီးလ်နိုင်ငံသား လီအန်ဒရိုကို ပထမအချီမှာပင် အလဲထိုးအနိုင်ရခဲ့သည်။
ONE Championship အနေဖြင့် အောင်လအန်ဆန်ကို ယခုနှစ်မကုန်မီ နောက်ထပ်ပွဲတစ်ပွဲ စီစဉ်ပေးဖွယ်ရှိသော်လည်း ချန်ပီယံလုပွဲ မဟုတ်ဘဲ စိန်ခေါ်ပွဲသာ စီစဉ်ဖြစ်ဖွယ်ရှိနေသည်။
အောင်လအန်ဆန်ကမူ ၎င်းလက်လွှတ်ခဲ့ရသည့် မစ်ဒယ်ဝိတ်တန်းချန်ပီယံခါးပတ်ကို ပြန်လည်ရယူရန် စိတ်အားထက်သန်နေပြီး လက်ရှိချန်ပီယံ နယ်သာလန်ကစားသမား ဒီရစ်ဒါနှင့် ထိုးသတ်လိုနေကြောင်း သိရသည်။
အောင်လအန်ဆန်နှင့် ONE Championship တို ့ချုပ်ဆိုထားသည့် စာချုပ်အရ အောင်လအန်ဆန်အနေဖြင့် ONE ပြိုင်ပွဲတွင် ဆက်လက်ထိုးသတ်ရန် ပွဲများကျန်နေသေးကြောင်း သိရသည်။
ထို့ကြောင့် ONE Championship အနေဖြင့် အောင်လအန်ဆန် ထပ်မံထိုးသတ်ရမည့်ပွဲကို ကမ္ဘာ့ချန်ပီယံလုပွဲအစား စိန်ခေါ်ပွဲအဖြစ်သာ ကျင်းပဖွယ်ရှိနေခြင်းဖြစ်သည်။
အောင်လအန်ဆန်သည် ဗစ်တာလီဘစ်ဒက်ရှ်နှင့် နှစ်ကြိမ်ထိုးသတ်ဖူးပြီး တစ်ပွဲရှုံး၊ တစ်ပွဲအနိုင်ရထားသည်။
အောင်လအန်ဆန်သည် ၂၀၁၇ ခုနှစ်က ထိုးသတ်သည့် ပထမပွဲတွင် အမှတ်ဖြင့် ရှုံးနိမ့်ခဲ့ပြီး ဒုတိယပွဲတွင် အမှတ်ဖြင့် ပြန်လည်အနိုင်ယူကာ မစ်ဒယ်ဝိတ်တန်းချန်ပီယံဆုကို ပထမဆုံးအကြိမ် ရယူနိုင်ခဲ့ခြင်းဖြစ်သည်။
