မန်ယူကွင်းလယ်လူ ပေါ့ဘာက နည်းပြဟောင်း မော်ရင်ဟို၏ကစားသမားကိုင်တွယ်မှုပုံစံကို ဝေဖန်ခဲ့ပြီး ယင်းမှာ ကစားသမားများနှင့် ဆန့်ကျင်သကဲ့သို့ ဖြစ်စေကာ အသင်းမှာ ဆက်လက်ကစားရန် မဖြစ်နိုင်တော့ဟု ခံစားမိစေကြောင်း စွပ်စွဲပြောကြားခဲ့သည်။
မော်ရင်ဟိုသည် ၂၀၁၆ ခုနှစ်တွင် မန်ယူအသင်းနည်းပြအဖြစ် ခန့်အပ်ခံရပြီးနောက် ပေါ့ဘာကို ထိုအချိန်က ကမ္ဘာ့စံချိန်တင်ပြောင်းရွှေ့ကြေးဖြင့် ခေါ်ယူခဲ့ခြင်းဖြစ်သည်။
ပေါ့ဘာသည် ၂၀၁၇ ခုနှစ်တွင် ယူရိုပါလိဂ်နှင့် လိဂ်ဖလားရရှိသည့် မန်ယူအသင်းတွင် အရေးပါသည့်ကစားသမားအဖြစ် ပါဝင်ခဲ့သော်လည်း နောက်ပိုင်းတွင် မော်ရင်ဟို ရာထူးမှထုတ်ပယ်ခံရသည့် ၂၀၁၈ ဒီဇင်ဘာလအထိ သူတို့အကြား ဆက်ဆံရေးတင်းမာခဲ့သည်။
မော်ရင်ဟိုသည် ၂၀၁၈ စက်တင်ဘာလတွင် ပေါ့ဘာထံ ပေးအပ်ထားသည့် ဒုတိယအသင်းခေါင်းဆောင်ရာထူးကို ပြန်လည်ရုပ်သိမ်းပြီးနောက် ၎င်းတို့နှစ်ဦးအကြား လေ့ကျင့်ရေးကွင်းတွင် အချေအတင်ဖြစ်ပွားခဲ့သည်ဟု သတင်းများ ထွက်ပေါ်ခဲ့ဖူးသည်။
”အခု အိုလေ(ဆိုးလ်ရှား)ရဲ့ကွဲပြားခြားနားချက်က ဘာလဲဆိုတော့ သူဟာ ကစားသမားတွေရဲ့ဆန့်ကျင်ရာကို မလုပ်ဆောင်ပါဘူး။ အိုလေဟာ သူမကြိုက်တဲ့ကစားသမားတွေကိုတောင်မှ အသင်းမှာ ဆက်မကစားချင်လောက်အထိပုံစံမျိုး မလုပ်ပါဘူး။ ဒါက မော်ရင်ဟိုနဲ့ အိုလေရဲ့ခြားနားချက်ပါ။ မော်ရင်ဟိုနဲ့ ကျွန်တော့်အကြား တစ်ချိန်တုန်းက ကောင်းမွန်တဲ့ဆက်ဆံရေးရှိခဲ့ပါတယ်။ အားလုံးမြင်တဲ့အတိုင်းပဲ နောက်နေ့မှာ ဘာတွေဖြစ်မလဲဆိုတာ မသိနိုင်ပါဘူး။ ဒါက မော်ရင်ဟိုနဲ့ ကျွန်တော် အတူရှိခဲ့တုန်းက
ထူးဆန်းတဲ့အရာပါပဲ။ ဒီအကြောင်းကို ကျွန်တော် မရှင်းပြနိုင်ပါဘူး။ ဘာကြောင့်လဲဆိုတော့ ကျွန်တော်တောင်မှ မသိလို့ပါပဲ”ဟု ပေါ့ဘာက Sky Sports နှင့် အင်တာဗျူးတွင် ပြောကြားခဲ့သည်။
