လိဒ်စ်အသင်းနည်းပြ ဂျက်ဆီမက်ရှ်က မိမိတို့နှင့်ကစားမည့်ပွဲတွင် မန်စီးတီးအသင်းတိုက်စစ်မှူး ဟော်လန်းအား ဒဏ်ရာကြောင့် ပါဝင်ကစားခြင်းမပြုရန် မှာကြားထားကြောင်း နောက်ပြောင်ပြောကြားခဲ့သည်။
ဟော်လန်းသည် ဖခင်ဖြစ်သူ လိဒ်စ် အသင်း၌ကစားစဉ် ၂၀၀၀ ပြည့်နှစ်က ယင်းမြို့တွင် မွေးဖွားခဲ့သူဖြစ်ပြီး လိဒ်စ်အသင်းအား ငယ်စဉ်ကတည်းက အားပေးခဲ့ခြင်းဖြစ်သည်။ ထို့ပြင် ၎င်းနှင့် ဂျက်ဆီမက်ရှ်မှာ ဆာလ်ဇ်ဘာ့ဂ် အသင်း၌ လက်တွဲခဲ့ဖူးပြီး ပရီးမီးယားလိဂ်တွင် ပြိုင်ဘက်အဖြစ် ပြန်လည်ရင်ဆိုင်ရမည်ဖြစ်သည်။
လိဒ်စ်အသင်းနှင့် မန်စီးတီးအသင်းမှာ ပရီးမီးယားလိဂ် ပွဲစဉ် (၁၇) အဖြစ် ဒီဇင်ဘာ ၂၈ ရက်တွင် Elland Road ကွင်း၌ ယှဉ်ပြိုင်ကစားရမည်ဖြစ်ရာ ဂျက်ဆီမက်ရှ်က ယင်းကဲ့သို့ ပြောကြားခဲ့ခြင်းဖြစ်သည်။
“ပွဲစဉ်ထွက်လာပြီးတာနဲ့ သူက ကျွန်တော့်ဆီ စာပို့တယ်။ ဒီပွဲအတွက် သူအရမ်းစိတ်လှုပ်ရှားနေတယ်လို့လည်း ပြောတယ်။ အဲဒီပွဲအတွက် အသေးစား တံကောက်ကြော ဒဏ်ရာရနေအောင် လုပ်ထားဖို့ ကျွန်တော် ပြောကြားထားပါတယ်။ သူက လိဒ်စ်မှာ မွေးခဲ့တာပါ။ သူ့အဖေကလည်း ဒီမှာသမိုင်းရှိခဲ့တယ်။ အဲဒါကြောင့် ဒီအသင်းက သူ့နှလုံးသားထဲမှာ ရှိနေမှာပါ။ ကျွန်တော် ဒီအလုပ်ကိုရတဲ့အချိန်မှာ သူရော သူ့အဖေကပါ အားပေးခဲ့ကြတယ်။ ဒီပွဲအတွက် သူအားလုံးအဆင်သင့်ဖြစ်နေစေဖို့ ကျွန်တော်မျှော်လင့်ပါတယ်။ အဲဒါက ကျွန်တော်တို့အတွက် အရေးကြီးပါတယ်” ဟု ဂျက်ဆီမက်ရှ် က ပြောကြားခဲ့သည်။