ချယ်လ်ဆီးအသင်း၏ နည်းပြဖြစ်သူ သောမတ်စ်တူဟယ်လ်နှင့် အသင်းခေါင်းဆောင်ဖြစ်သူ အက်ဇ်ပီလီကွယ်တာတို့က ချယ်လ်ဆီးအသင်းနှင့် လီဗာပူးလ်တို့ ကစားခဲ့သည့်ပွဲစဉ်မှ မာနေ၏ လုပ်ရပ်သည် သေချာပေါက် အနီကတ်အပြခံရသင့်သည့် လုပ်ရပ်ဖြစ်သည်ဟု ပြောကြားခဲ့သည်။
မာနေသည် ယင်းပွဲစဉ်တွင် အက်ဇ်ပီလီကွယ်တာနှင့် အမြင့်ဘောကို ယှဉ်လုပြီး ခေါင်းခုန်တိုက်ရာတွင် အက်ဇ်ပီလီကွယ်တာကို တံတောင်ဖြင့် ရိုက်မိခဲ့ခြင်းဖြစ်ပြီး ယင်းဖြစ်ရပ်အတွက် ကွင်းလယ်ဒိုင်ဖြစ်သူက အဝါကတ်သာပြသ၍ သတိပေးခဲ့သည်။
မာနေသည် ယင်းဖြစ်ရပ်အပြီး မကြာမီတွင် လီဗာပူးလ်အသင်းအတွက် အဖွင့်ဂိုးကို သွင်းယူပေးခဲ့ရာ ချယ်လ်ဆီးအသင်းသည် ယင်းဂိုးပေးခဲ့ရခြင်းအတွက် နစ်နာမှုလည်း ရှိခဲ့သည်။
ယင်းအတွက်ကြောင့် ချယ်လ်ဆီးအသင်း၏ အသင်းခေါင်းဆောင်ဖြစ်သလို၊ မာနေ၏ တံတောင်ရိုက်ချက်ကို ခံခဲ့ရသည့် အက်ဇီပီလီကွယ်တာက ” ပွဲစပြီး (၅)စက္ကန့်ပဲ ရှိသေးတယ်ဆိုလည်း ကျွန်တော် စိတ်မဝင်စားပါဘူး။ ဒီပွဲရဲ့ ပထမဆုံးဖြစ်ရပ်ဖြစ်နေလည်း အရေးမကြီးဘူး။ ဒါဟာ လုံးဝကို အနီကတ်ပြရမှာပါ”ဟု ပြောကြားခဲ့သည်။
”သူက ဘောလုံးကို လုံးဝမမြင်ခဲ့ပါဘူး။ သူ့ရဲ့ရည်ရွယ်ချက်က တံတောင်ကို အသုံးပြုဖို့ပဲ ဖြစ်ပါတယ်။ ဘာကြောင့်လဲဆိုတာကိုတော့ ကျွန်တော် တကယ်ကို နားမလည်ပါဘူး။ ဒီလုပ်ရပ်ဟာ အနီကတ်ပြရမယ့် လုပ်ရပ်ဖြစ်ပြီး အနီကတ် အပြမခံရခြင်းဟာ ပွဲရလဒ်ကိုလည်း သက်ရောက်မှုရှိခဲ့ပါတယ်”ဟု ဆိုခဲ့သည်။
ချယ်လ်ဆီးအသင်း၏ နည်းပြ သောမတ်စ်တူဟယ်လ်ကလည်း ”ကျွန်တော်ကတော့ ပွဲချိန်အစောပိုင်းက အနီကတ်တွေအပေါ် စိတ်ပျက်တတ်သူပါ။ အခု ပြောရမယ့်စကားကိုလည်း ကျွန်တော် မုန်းပါတယ်။ ဘာကြောင့်လဲဆိုတော့ မာနေကို ကျွန်တော် ချစ်လို့ပါ။ ဒါပေမဲ့ ဒီလုပ်ရပ်ကတော့ အနီကတ်ပြရပါမယ်”ဟု ဆိုခဲ့သည်။
