မာနေအား လီဗာပူးလ်အသင်း တောင်းဆိုသည့် ပေါင် ၄၂ သန်းကျော်ဖြင့် ကမ်းလှမ်းရန် ဘိုင်ယန်မြူးနစ်အသင်း စီစဉ်

ဘိုင်ယန်မြူးနစ်အသင်းသည် ဆီနီဂေါ လက်ရွေးစင်တိုက်စစ်ကစားသမား မာနေ အား ခေါ်ယူရန်အတွက် လီဗာပူးလ်အသင်း တောင်းဆိုထားသည့် ပေါင် ၄၂ ဒသမ ၅ သန်းဖြင့် ကမ်းလှမ်းရန်စီစဉ်နေကြောင်း Sky Sports သတင်းဌာနက ဖော်ပြခဲ့သည်။

ဂျာမန်ထိပ်သီး ဘိုင်ယန်မြူးနစ်အသင်းသည် ယခုနွေရာသီအပြောင်းအရွှေ့ကာလတွင် လီဗာပူးလ်တိုက်စစ်ကစားသမား မာနေ ကို အဓိကပစ်မှတ်အဖြစ်သတ်မှတ်ကာ အရ ခေါ်ယူရန် ဆုံးဖြတ်ထားကြောင်း သိရသည်။ ဘိုင်ယန်မြူးနစ်အသင်းသည် အသက် ၃၀ အရွယ် မာနေကို ခေါ်ယူရန်အတွက် ပုဂ္ဂိုလ်ရေးသဘောတူညီမှု ရရှိထားပြီဟု ဥရောပ မီဒီယာများက ဖော်ပြနေကြပြီး လီဗာပူးလ် အသင်းနှင့် ပြောင်းရွှေ့ကြေးညှိနှိုင်းရန်သာ ကျန်ရှိတော့ကြောင်း သိရှိရသည်။

ဘိုင်ယန်မြူးနစ်အသင်းသည် မာနေ အတွက် ပေါင် ၂၅ သန်းဖြင့် ပထမအကြိမ်၊ ပေါင် ၂၃ ဒသမ ၅ သန်း + Add-0ns ကြေး (ပေါင် ၆ ဒသမ ၅ သန်း)ဖြင့် ဒုတိယအကြိမ် နှစ်ကြိမ်တိုင်တိုင် ကမ်းလှမ်းခဲ့သော်လည်း လီဗာပူးလ်အသင်းက ငြင်းဆန်ပယ်ချခဲ့သည်။ ယခုအခါ ဘိုင်ယန်မြူးနစ်အသင်းအနေဖြင့် တတိယအကြိမ်မြောက်ကမ်းလှမ်းရန် စီစဉ်နေခြင်းဖြစ်ပြီး လီဗာပူးလ်အသင်းအနေဖြင့် ဘင်ဖီကာတိုက်စစ်မှူး ဒါဝင်နူနက်ဇ်ကို ခေါ် ယူထားသော်လည်း မာနေကို ထိုက်တန်သည့် ကြေးရမှသာ လက်လွှတ်ဖွယ်ရှိကြောင်း သိရသည်။

လီဗာပူးလ်အသင်းသည် ဆီနီဂေါတိုက် စစ်ကစားသမား မာနေကို ၂၀၁၆ ခုနှစ်တွင် ဆောက်သမ်တန်အသင်းမှ ပေါင် ၃၄ သန်း ဖြင့် ခေါ်ယူခဲ့သည်။ လီဗာပူးလ်အသင်းနှင့် ချုပ်ဆိုထားသည့် မာနေ၏ လက်ရှိစာချုပ် မှာ ၂၀၂၃ ခုနှစ်တွင်မှ ကုန်ဆုံးမည်ဖြစ်သော် လည်း မာနေအနေဖြင့် ယခုနွေတွင် ခြောက်ရာသီကြာကစားခဲ့သည့် လီဗာပူးလ်အသင်း မှ ထွက်ခွာရန် ဆန္ဒရှိနေခြင်းဖြစ်သည်။ ထို့ ကြောင့် လီဗာပူးလ်အသင်းသည် မာနေ၏ ဆန္ဒကို တားဆီးခြင်းမရှိဘဲ ၎င်းအတွက် ထိုက်တန်သည့်ပြောင်းရွှေ့ကြေးတစ်ရပ်ကို အလို ရှိနေခြင်းဖြစ်သည်။

ဗြိတိန်မီဒီယာများ၏ ဖော်ပြမှုအရ လီဗာပူးလ်အသင်းသည် မာနေအတွက် ပြောင်းရွှေ့ကြေး ပေါင် ၄၂ ဒသမ ၅ သန်း အလိုရှိနေပြီး ယခုအခါ ဘိုင်ယန်မြူးနစ်အသင်းက ယင်းကြေးဖြင့် ကမ်းလှမ်းရန် စီစဉ်နေခြင်း ဖြစ်ကြောင်း Sky Sports က ဖော်ပြခဲ့သည်။ ဘိုင်ယန်မြူးနစ်အသင်းသည် ယခုနွေရာသီ အပြောင်းအရွှေ့ကာလတွင် အသင်း၏အဓိက ကစားသမားများဖြစ်သည့် တိုက်စစ်မှူး လီဝန်ဒေါစကီးနှင့် တောင်ပံကစားသမား နာဘရီတို့ကို ဆုံးရှုံးရဖွယ်ရှိနေသည့်အတွက် မာနေကို အရခေါ်ယူရန် အသည်းအသန် ကြိုးစားနေခြင်းဖြစ်သည်။