ချယ်လ်ဆီးအသင်းသည် ပရီးမီးယားလိဂ်ပြိုင်ဘက် မန်ယူအသင်း ၏ နံပါတ် (၁) ပစ်မှတ်ကစားသမားဖြစ်သည့် ဘာစီလိုနာကွင်းလယ်လူ ဖရန်ကီဒီယွန်းကို ကြားဖြတ်ခေါ်ယူနိုင်မည်ဟု ယုံကြည်နေကြောင်း The Athletic သတင်းဌာနက ဖော်ပြခဲ့သည်။
မန်ယူနည်းပြသစ် တန်ဟက်ဂ်သည် အေဂျက်စ်အသင်းတွင် ၎င်းနှင့် လက်တွဲခဲ့ဖူးသည့် ဒတ်ချ်ကွင်းလယ်လူ ဖရန်ကီဒီယွန်းအား နံပါတ်(၁)အဖြစ် ပစ်မှတ်ထားခေါ်ယူလိုနေပြီး ဘာစီလိုနာအသင်းနှင့် ပြောင်းရွှေ့ကြေး သဘောတူညီမှုရရှိပြီဟု သတင်းများ ထွက်ပေါ် ခဲ့သည်။
သို့သော် ဖရန်ကီဒီယွန်းသည် မန်ယူအသင်း၏စီမံကိန်းများအား မနှစ်သက်သဖြင့် မန်ယူအသင်းထံပြောင်းရွှေ့ရန် ငြင်းဆန်ပယ်ချခဲ့ကြောင်း စပိန်မီဒီယာများက ဖော်ပြနေကြသည်။
The Athletic ၏ ဖော်ပြမှုအရ ယခုအခါ ချယ်လ်ဆီးအသင်းသည် ဒီယွန်းကိုခေါ်ယူရန် စိတ်ဝင်စားလာခြင်းဖြစ်ပြီး ဘာစီလိုနာအသင်း တောင်းဆိုသည့် ပေါင် (၇၁)သန်းကိုလည်း ပေးချေရန် အသင့်ရှိကြောင်း သိရသည်။
ချယ်လ်ဆီးအသင်းသည် ၂၀၂၃ ခုနှစ်တွင် အသင်းနှင့်စာချုပ်သက်တမ်းကုန်ဆုံးမည့် ကွင်းလယ်လူ ကွန်တေ၏နေရာတွင် အစားထိုးရန် ဒီယွန်းကို စိတ်ဝင်စားနေခြင်းဖြစ်ပြီး ဘာစီလိုနာနှင့် ဆွေးနွေးနေကြောင်း သြဂုတ်(၃)ရက်တွင် The Athletic က ဖော်ပြခဲ့သည်။
ဒီယွန်းသည် ဘာစီလိုနာတွင် ဆက်နေလိုပြီး အသင်းပြောင်းရမည်ဆိုပါက ချယ်လ်ဆီးအသင်းကို ရွေးချယ်ဖွယ် ရှိကြောင်းလည်း သိရသည်။
