မန်ယူအသင်းသည် ဘရိုက်တန်အသင်းကို ရှုံးနိမ့်ခဲ့သည့်အတွက် ပရီးမီးယားလိဂ်ခေတ်တစ်လျှောက် ရမှတ်အနည်းဆုံးရာသီဖြစ်ခဲ့ပြီး လာမည့်ရာသီ ချန်ပီယံလိဂ်ဝင်ခွင့်နှင့်လည်း လွဲချော်သွားခဲ့ရပြီဖြစ်ကြောင်း သိရသည်။
မန်ယူအသင်းသည် ရာသီအဆုံးသတ်ရန် တစ်ပွဲအလိုတွင် (၅၈)မှတ်သာ ရရှိခဲ့ပြီး နောက်ဆုံးပွဲစဉ်၌ ခရစ္စတယ်ပဲလေ့စ်အသင်းကို အနိုင်ရရှိလျှင်ပင် (၆၁)မှတ်သာရရှိမည်ဖြစ်သည်။ ထို့ကြောင့် ယခင်က ရမှတ်အနည်းဆုံးအဖြစ် စံချိန်တင်ထားသော ၂၀၁၃-၁၄ ရာသီက (၆၄)မှတ် ရရှိခဲ့သည်ထက် လျော့နည်းကာ ပရီးမီးယားလိဂ်ခေတ်တစ်လျှောက် ရမှတ်အနည်းဆုံးရာသီ ဖြစ်သွားခဲ့ခြင်းဖြစ်သည်။
မန်ယူအသင်းသည် ၁၉၉၂-၉၃ ရာသီက စတင်ခဲ့သော ပရီးမီးယားလိဂ်ပြိုင်ပွဲတွင် ချန်ပီယံဆု(၁၃)ကြိမ်အထိ ရရှိထားသည့် အအောင်မြင်ဆုံးအသင်းဖြစ်ပြီး ဂန္ထဝင်နည်းပြ ဖာဂူဆန် ကိုင်တွယ်ခဲ့သည့် ကာလတစ်လျှောက်လုံး ပရီးမီးယားလိဂ်တွင် ရမှတ်(၇၀)အောက် မရောက်ရှိခဲ့ပေ။
သို့သော် ဖာဂူဆန်အနားယူပြီး ဒေးဗစ်မွိုက်စ်လွှဲပြောင်းတာဝန်ယူခဲ့သည့် ၂၀၁၃-၁၄ ရာသီတွင်ပင် (၆၄)မှတ်သာ ရယူနိုင်ခဲ့ခြင်းဖြစ်သည်။ ထို့နောက် ယခုရာသီအပါအဝင် ဖာဂူဆန်မရှိတော့သည့် စုစုပေါင်း(၉)ရာသီ၌ အမှတ်(၇၀)အောက်ရောက်သည်မှာ (၆)ရာသီအထိ ရှိခဲ့သည်။ လက်ရှိရာသီမှာ ဖာဂူဆန်ခေတ်လွန်ကာလ စွမ်းဆောင်ရည်အညံ့ဆုံးရာသီဖြစ်ခဲ့ပြီး ချန်ပီယံလိဂ်ယှဉ်ပြိုင်ခွင့်နှင့် (၄)ရာသီမြောက် လွဲချော်ရခြင်းလည်း ဖြစ်ခဲ့သည်။
မန်ယူအသင်းသည် ချန်ပီယံလိဂ်ဝင်ခွင့်နှင့် လွဲချော်ခဲ့ရသည့်အတွက် ကစားသမားအချို့မှာ လစာ (၂၅%) လျှော့ ယူရမည်ဖြစ်ကြောင်း Daily Mail သတင်းစာက ဖော်ပြခဲ့သည်။ စီရော်နယ်လ်ဒိုအပါအဝင် မန်ယူအသင်းမှ ထိပ်တန်းကစားသမားအချို့မှာ အသင်းနှင့် စာချုပ်ချုပ်ဆိုရာ၌ ချန်ပီယံလိဂ်ဝင်ခွင့် မရရှိခဲ့ပါက လစာ(၂၅%)လျှော့ယူရမည့် သဘောတူညီချက် ထည့်သွင်းချုပ်ဆိုထားခြင်းကြောင့်ဖြစ်ကြောင်း သိရသည်။
ထို့ကြောင့် မန်ယူအသင်းတွင် တစ်ပတ်ပေါင်(၃၈၅၀၀၀)ရရှိနေသည့် လစာအများဆုံးကစားသမား စီရော်နယ်လ်ဒိုမှာ ပေါင်(၂၈၈၀၀၀) သာ ရရှိတော့မည်ဖြစ်သလို၊ ဒုတိယလစာအများဆုံးကစားသမားဖြစ်သည့် ဂိုးသမား ဒီဟေးယားမှာလည်း တစ်ပတ်ပေါင် (၃၇၅၀၀၀)ရရှိနေရာမှ ပေါင်(၂၈၁၀၀၀)သာရရှိတော့မည်ဖြစ်ကြောင်း Daily Mail က ဖော်ပြခဲ့သည်။
