မန်ယူအသင်းပရိသတ်များက အိုးလ်ထရက်ဖို့ဒ်ကွင်းအတွင်းအထိ ဝင်ရောက်၍ အသင်းပိုင်ရှင် ဂလေဇာမိသားစုကို ဆန္ဒပြခဲ့သောကြောင့် တနင်္ဂနွေနေ့က ယှဉ်ပြိုင်ကစားမည့် မန်ယူ-လီဗာပူးလ်ပွဲကို ရွှေ့ဆိုင်းခဲ့ရပြီး ပရိသတ်များ၏ ခံစားချက်ကို နားလည်သော်လည်း အကြမ်းဖက်မှုအားရှုတ်ချကြောင်း ပရီးမီးယားလိဂ်ပြိုင်ပွဲက ကြေညာချက်ထုတ် ပြန်ခဲ့သည်။
ယင်းပွဲကို တနင်္ဂနွေနေ့ ဒေသစံတော် ချိန် ညနေ ၄ နာရီခွဲ (မြန်မာစံတော်ချိန် ည ၁၀ နာရီ) တွင် ယှဉ်ပြိုင်ကစားရန် စီစဉ်ထားသော်လည်း မန်ယူအသင်းပရိသတ်များက လုံခြုံရေးဝန်ထမ်းများနှင့် အတားအဆီးများကိုကျော်ဖြတ်၍ ကွင်းအတွင်းသို့ ဝင်ရောက်ဆန္ဒပြခဲ့ကြခြင်းဖြစ်သည်။
မန်ယူအသင်းပရိသတ်များသည် ဂလေဇာမိသားစုအပေါ် ဆန္ဒပြမှုများ မကြာခဏ ပြုလုပ်လေ့ရှိသော်လည်း ယခုကဲ့သို့ အိုးလ်ထရက်ဖို့ဒ်ကွင်းအတွင်းအထိ ဝင်ရောက်၍ ဆန္ဒပြခြင်းမှာမူ ပထမဆုံးအကြိမ်ဖြစ်သည်။
ပရိသတ်များသည် ဒေသစံတော်ချိန် မွန်းလွဲ ၂ နာရီဝန်းကျင်မှစ၍ ဂလေဇာမိသားစုကိုဆန့်ကျင်သည့် ပိုစတာများ ကိုင်ဆောင်ကာ ဆန္ဒပြခဲ့ကြပြီး မိနစ် ၂၀ ခန့်အကြာတွင် ကွင်းအတွင်း ဝင်ရောက်ဆန္ဒပြခဲ့ကြသလို ပွဲကြည့်စင်ပေါ်သို့ မီးကျည်များဖြင့်လည်း ပစ်ပေါက်ခဲ့ကြောင်း သိရသည်။
အစောပိုင်းတွင် ပွဲကိုတစ်နာရီရွှေ့ဆိုင်းကြောင်း ကြေညာခဲ့သော်လည်း လုံခြုံရေးအခြေအနေအရ ကျင်းပရန်မဖြစ်နိုင်သဖြင့် ရွှေ့ဆိုင်းခဲ့ရခြင်းဖြစ်သည်။
”အိုးလ်ထရက်ဖို့ဒ်မှာရှိသူ တစ်ဦးချင်းစီရဲ့ ဘေးကင်းလုံခြုံရေးက အရေးကြီးဆုံးပါပဲ။ ခံစားချက်တွေကို ကျွန်တော်တို့ နားလည်သလို လေးစားမှုလည်းရှိပါတယ်။ ဒါပေမဲ့ အကြမ်းဖက်တဲ့အပြုအမူတွေ၊ ရာဇဝတ်မှုဆိုင်ရာ ဖျက်ဆီးမှုတွေနဲ့ ကျူးကျော်ဝင်ရောက်မှု အထူးသဖြင့် COVID-19 စည်းမျဉ်းချိုးဖောက်မှုကိုတော့ ရှုတ်ချပါတယ်။ ပရိသတ် တွေအနေနဲ့ ကိုယ့်ရဲ့အမြင်ကို နည်းလမ်းမျိုးစုံ နဲ့ ဖော်ပြနိုင်ပါတယ်။ ဒါပေမဲ့ ဒီနေ့မှာမြင်တွေ့ ရတဲ့ လူနည်းစုရဲ့အပြုအမူက မှန်ကန်တယ်ဆိုတာ သက်သေမပြနိုင်ပါဘူး”ဟု ပရီးမီး ယားလိဂ်၏ ထုတ်ပြန်ချက်တွင် ဖော်ပြထားသည်။
မန်ယူအသင်းကလည်း ပရိသတ်များ၏ လွတ်လပ်စွာထုတ်ဖော်ခွင့်နှင့် ငြိမ်းချမ်းစွာဆန္ဒပြမှုကို လေးစားကြောင်း၊ သို့သော် အခြားပရိသတ်များ၊ ဝန်ထမ်းများ၊ လုံခြုံရေးရဲတပ်ဖွဲ့ ဝင်များအား အန္တရာယ်ဖြစ်စေသည့်လုပ်ရပ်များကို လက်မခံကြောင်း၊ ယခုဖြစ်ရပ်ကို စုံစမ်းစစ်ဆေးမှုများ ပြုလုပ်မည်ဖြစ်ကြောင်း ကြေညာချက်ထုတ်ပြန်ခဲ့သည်။
ယင်းပွဲမှာ မန်စီးတီးအသင်း၏ ချန်ပီယံဆုအဆုံးအဖြတ်အတွက် အရေးပါနေပြီး ပြန်လည်ကစားမည့်ရက်ကို လာမည့်ရက်ပိုင်းအတွင်း ကြေညာသွားမည်ဖြစ်သည်။
