ဂယ်ရီနဗီးက ပေါလ်ပေါ့ဘာဟာ ကမ္ဘာ့အကောင်းဆုံး ကစားသမားတွေ ထဲက တစ်ဦး ဖြစ်နိုင်တဲ့ အရည်အသွေးတွေ ရှိနေဆဲ ဖြစ်တယ်လို့ ဆိုလိုက်ပေမယ့် မန်ချက်စတာယူနိုက်တက် ကွင်းလယ်လူမှာ ပြသနာ တစ်ခုတော့ ရှိနေတယ်လို့ ဝန်ခံ သွားခဲ့ ပါတယ်။ အသက် ၂၇ နှစ် အရွယ် ပေါ့ဘာဟာ ၎င်းရဲ့ ကစားသမား ဘဝမှာ စီးရီးအေဖလား ၄ ကြိမ် ၊ ကိုပါအီတလီယာ ဖလား ၂ ကြိမ် ၊ ယူရိုပါလိဂ် ဖလား ၊ ကာရာဘောင်ဖလား နဲ့ ပြင်သစ် လက်ရွေးစင် အသင်းနဲ့ အတူ ကမ္ဘာ့ဖလား တို့ကို ဆွတ်ခူး နိုင်ခဲ့သူ ဖြစ်ပါတယ်။
ဒီလို အောင်မြင်မှုတွေ ရရှိ ထားသူ ဖြစ်ပေမယ့်လည်း မန်ချက်စတာယူနိုက်တက် ပရိတ်သတ်တွေဟာ လွန်ခဲ့တဲ့ ၂၀၁၂ က အိုးထရပ်ဖို့ဒ် ကနေ ဂျူဗင်တပ်ကို ပြောင်းရွေ့ ခဲ့ပြီးနောက် ၄ နှစ် အကြာမှာ အသင်းကို ပေါင် ၈၉ သန်း နဲ့ ပြောင်းလာခဲ့သူ ပေါ့ဘာ ထံကနေ အကောင်းဆုံး စွမ်းဆောင်ရည်ကို မရခဲ့ဘူးလို့ ခံစား မိနေကြ ပါတယ်။
နဗီးက ပေါ့ဘာဟာ ပရီးမီးယားလိဂ် ရဲ့ အကောင်းဆုံး ကစားသမားတွေ ထဲက တစ်ဦး ဖြစ်လာ နိုင်တဲ့ အလားအလာ ရှိနေတယ်လို့ ယုံကြည် နေပေမယ့် ပြင်သစ် ကွင်းလယ်လူမှာ ဒါကို အဟန့်အတား ဖြစ်စေတဲ့ ပြသနာ တစ်ခု ရှိနေတယ်လို့ ဝန်ခံ ခဲ့ပါတယ်။
နဗီးက “ပေါလ်ပေါ့ဘာဟာ ကလပ်ရဲ့ အကောင်းဆုံး ကစားသမား အပြင် ပရီးမီးယားလိဂ် နဲ့ ကမ္ဘာပေါ်မှာ အကောင်းဆုံး ကစားသမား တွေထဲက တစ်ဦး ဖြစ်နိုင်တဲ့ စွမ်းရည် ရှိနေတယ်လို့ ကျွန်တော် ယူဆ မိပါတယ်။ ပေါ့ဘာနဲ့ ပက်သက်တဲ့ တစ်ခုတည်းသော ပြသနာ ကတော့…ကျွန်တော်ဟာ ဘယ်တုန်းကမှ သူ့ရဲ့ စွမ်းဆောင်ရည်ကို မဝေဖန် ဖူးခဲ့ ပါဘူး။ အဓိက ပြသနာ ကတော့ သူ့ကို ကလပ် ကနေ ထွက်ခွာ စေချင်တဲ့ ပတ်ဝန်းကျင်က အသံတွေနဲ့ သူ့ရဲ့ အေးဂျင့်ဟာ အခြား အသင်းကို ပြောင်းဖို့ တွန်းအား ပေးနေတာတွေ ဖြစ်ပါတယ်။
ဒီလို အသင်း အပေါ် စိတ်နှစ် ထားခြင်း မရှိတာကြောင့် သူ့ကို စိတ်ပျံလွင့် စေတယ်လို့ပဲ ကျွန်တော် ထင်ပါတယ်။ ကျွန်တော် မန်ယူနိုက်တက် မှာတုန်းကလည်း ဒီလို ဖြစ်ခဲ့ပါတယ်။ ဒါဟာ သိပ် ထူးထူးခြားခြား မဟုတ်ပါဘူး။ ဒါပေမယ့် သူ့အနေနဲ့ ဒီပြသနာကို ဖြေရှင်း သွားရမှာ ဖြစ်ပါတယ်။ ဘာလို့လဲဆိုတော့ အသင်းရဲ့ အကျော်ကြားဆုံး ကစားသမား တစ်ဦးက ကလပ် ကနေ ထွက်ခွာ ချင်နေတဲ့ ပုံစံမျိုး ဖြစ်နေတဲ့ အခါ ဒါဟာ အားလုံးကို မငြိမ်မသက် ဖြစ်စေပါတယ်။
အခုဆိုရင် ကိုရိုနာဗိုင်းရပ်စ် ၊ ဘရူနိုဖာနန်ဒက်ကို ခေါ်ယူမှု ၊ အသင်းကို ရောက်လာမယ့် ကစားသမားတွေ ၊ ထွန်းတောက်လာတဲ့ ကစားသမားတွေကြောင့် မန်ယူနိုက်တက် အသင်းဟာ မှန်ကန်တဲ့ အားဖြည့်မှု ၂ ခု ၃ ခု သာ ထပ်လုပ်လိုက်မယ် ဆိုရင် လာမည့် ၂ နှစ် ၃ နှစ်မှာ တအားကို ကောင်းတဲ့ အသင်း ဖြစ်လာမှာပါ။ တကယ် ကောင်းမွန်တဲ့ ကစားသမား အစုအဖွဲ့ ပေါ်ထွက် လာခြင်းဟာ အရမ်း ကောင်းတဲ့ အသင်းကို တည်ဆောက်လို့ ရပါတယ်။” လို့ ပြောသွား ပါတယ်။
ပြီးခဲ့တဲ့ ၂ နှစ်တာ ကာလ အတွင်း ပေါ့ဘာဟာ မန်ယူနိုက်တက် ကနေ ထွက်ခွာဖို့ တောက်လျှောက် သတင်းကြီး နေခဲ့ပါတယ်။ ဒါပေမယ့် ကိုရိုနာဗိုင်းရပ်စ် ကပ်ရောဂါကြောင့် အသင်း တော်တော်များများ ဝင်ငွေတွေ ထိခိုက်နေတာကြောင့် ပေါ့ဘာကို ခေါ်ယူနိုင်တဲ့ အသင်းက ဈေးကွက်မှာ သိပ်ပြီး မရှိ ဖြစ်နေပါတယ်။ ပြီးခဲ့တဲ့ ဇန်နဝါရီ အပြောင်းအရွေ့က ဘရူနိုဖာနန်ဒက် ရောက်လာ ခဲ့ပြီးနောက် ကလပ်ရဲ့ အပြောင်းအလဲကို မြင်တွေ့ ခဲ့ရပြီးနောက် ပေါ့ဘာရဲ့ ကလပ် အပေါ် ခံစားချက်တွေ အပြောင်းအလဲ ဖြစ်သွားမှာတော့ သေချာ နေပါတယ်။
သရဲနီ တို့ဟာ ပြီးခဲ့တဲ့ ရာသီက ပရီးမီးယားလိဂ်မှာ အဆင့် ၃ နေရာနဲ့ ရာသီ သိမ်းနိုင် ခဲ့ပြီး ယူရိုပါလိဂ် ပြိုင်ပွဲကို ဝင်ရောက် ဆင်နွှဲ ခဲ့တာကြောင့် တစ်ပတ် နားရက် ပိုရခဲ့ကာ ၎င်းတို့ရဲ့ ၂၀၂၀-၂၁ ပရီးမီးယားလိဂ် ရာသီကို လာမည့် စက်တင်ဘာလ ၁၇ ရက်နေ့ ဘန်လေနဲ့ ပွဲမှာ ပြန်လည် စတင် သွားမှာ ဖြစ်ပါတယ်။
