မန်ယူအသင်း၏နည်းပြဖြစ်သူ တန်ဟက်ဂ်သည် အသင်းကစားသမားများအား သူတို့၏လှုပ်ရှားမှုများအားလုံးကို ၎င်းထံအစီရင်ခံရန် တောင်းဆိုထားကြောင်း Mirror သတင်းစာက ဖော်ပြခဲ့သည်။
အေဂျက်စ်အသင်းနှင့် ဒတ်ချ်အမှတ်ပေးချန်ပီယံဆုကို (၃) ကြိမ် ရယူနိုင်ခဲ့သည့် တန်ဟက်ဂ်သည် မေ (၂၂) ရက်က ခရစ္စတယ်ပဲလေ့စ်အသင်းကို (၀-၁) ဂိုးဖြင့် ရှုံးနိမ့်ခဲ့သည့် မန်ယူအသင်း၏ ပရီးမီးယားလိဂ် ရာသီပိတ်ပွဲစဉ်ကို ကွင်းအတွင်းလာရောက်ကြည့်ရှုခဲ့သည်။
ယင်းနောက် မေ (၂၃) ရက်(တနင်္လာနေ့) တွင် မန်ယူအသင်းသည် ၎င်းတို့နည်းပြသစ် တန်ဟက်ဂ်ကို မီဒီယာမိတ်ဆက်ပွဲ ပြုလုပ်ခဲ့သည်။
ယင်းမိတ်ဆက်ပွဲတွင် တန်ဟက်ဂ်က ပရီးမီးယားလိဂ်ကို ဂွါဒီယိုလာနှင့် ကလော့ပ် လွှမ်းမိုးသည့်ခေတ်ကုန်ဆုံးတော့မည်ဖြစ်ပြီး ၎င်းတို့နှင့်အပြိုင် ချန်ပီယံဆုအတွက် တိုက်ပွဲဝင်သွားမည်ဟု ပြောကြားခဲ့သည်။
ထို့ကြောင့် တန်ဟက်ဂ်သည် မန်ယူအသင်းကို လာမည့်ရာသီတွင် ချန်ပီယံဆုများ စိန်ခေါ်နိုင်သည့် အသင်းအဖြစ် တည်ဆောက်ရန်စီစဉ်နေပြီး ယခုအခါ အသင်းကစားသမားများအား အားလပ်ရက်တွင် မည်သို့နေထိုင်သည်ဆိုခြင်းကိုပင် ၎င်းထံ အစီရင်ခံစာတင်ရန် တောင်းဆိုထားကြောင်း Mirror က ဖော်ပြခဲ့သည်။
တန်ဟက်ဂ်သည် စည်းကမ်းတင်းကျပ်သည့်နည်းပြအဖြစ် နာမည်ကြီးသူဖြစ်ပြီး အေဂျက်စ်ကစားသမားများက ၎င်းကို ကျောင်းအုပ်ကြီးဟုပင် ခေါ်ကြောင်းနှင့် ယခု တန်ဟက်ဂ်၏လုပ်ရပ်မှာ ဖာဂူဆန်ခေတ်က လုပ်ရပ်မျိုးဖြစ်ကြောင်း မီဒီယာများက ဖော်ပြနေကြသည်။
