ချယ်လ်ဆီးအသင်း နည်းပြ အန်ဇို မာရက်စ်ကာက သူတို့အသင်းအနေနဲ့ ဒီနှစ်ဘောလုံးရာသီမှာ ဆုဖလားတွေ ရယူနိုင်ဖို့အတွက် မန်ချက်စတာ စီးတီး ၊ အာဆင်နယ်အသင်းတွေနဲ့ ပြိုင်ဆိုင်ဖို့ဆိုတာ အဆင်သင့် မဖြစ်သေးဘူးလို့ ထုတ်ဖော် ပြောကြားသွားခဲ့ပါတယ်။
ချယ်လ်ဆီးအသင်းက နည်းပြသစ် မာရက်စ်ကာရဲ့ လက်ထက်မှာ ရုန်းကန်ရလိမ့်မယ်လို့ ထင်ထားခဲ့ရပေမယ့်လည်း လက်ရှိမှာတော့ အသင်းဟာ ပြိုင်ပွဲစုံ (၁၀)ပွဲကစားထားပြီးချိန် ရှုံးပွဲက (၂)ပွဲတည်းသာ ရှိထားခဲ့သလို နောက်ဆုံး (၅)ပွဲဆက်တိုက်လည်း နိုင်ပွဲဆက်နေတဲ့အပြင် သွင်းဂိုး (၂၇)ဂိုးအထိတောင် သွင်းယူထားနိုင်ခဲ့ပါတယ်။
ရာသီအစ မန်စီးတီးအသင်းနဲ့ ရင်ဆိုင်ခဲ့တဲ့ ပွဲစဉ်မှာသာ တိုက်စစ်က ဂိုးမရခဲ့တာဖြစ်ပြီး ကျန်တဲ့ပွဲတွေမှာ ဂိုးတွေ ဆက်တိုက် သွင်းယူထားနိုင်တဲ့ ချယ်လ်ဆီးက ပရီးမီးယားလိဂ် အမှတ်ပေးဇယားမှာလည်း အဆင့်(၄)နေရာအထိ ရောက်ရှိနေပြီး ထိပ်ဆုံးက အာဆင်နယ်နဲ့လည်း (၂)မှတ်သာ ကွာဟနေပါတော့တယ်။
ဒီလို အခြေအနေမှာ ချယ်လ်ဆီး နည်းပြ မာရက်စ်ကာက “ကျွန်တော်တို့တွေ မန်စီးတီး အာဆင်နယ်အသင်းတို့နဲ့ ယှဉ်ပြိုင်နိုင်မယ် မထင်မိပါဘူး။ ကျွန်တော် တကယ်ကို မထင်မိတာပါ။ ဘာကြောင့်လဲဆိုတော့ ကျွန်တော်တို့က အဆင်သင့် မဖြစ်သေးလို့ပါ။ အကြောင်းရင်းကတော့ စီးတီးက တူညီတဲ့ နည်းပြနဲ့ (၉)နှစ်ခန့်လောက် အလုပ်လုပ်ခဲ့သလို အာဆင်နယ်ဆိုရင်လည်း သူတို့နည်းပြနဲ့ (၅)နှစ်တောင် လက်တွဲခဲ့တယ်။”
“ကြီးမားတဲ့ ဆုဖလားတွေအတွက် ယှဉ်ပြိုင်ချင်တယ်ဆိုရင် အချိန်ပေးဖို့ လိုအပ်ပါတယ်။ ချန်ပီယံလိဂ်မှာ အာဆင်နယ်က ပီအက်စ်ဂျီကို အနိုင်ရတော့ သူတို့က အင်းနရစ် အင်တာဗျူးတဲ့ အချိန်မှာ သူလည်း အခုလိုပဲ ပြောခဲ့တာ။ အာဆင်နယ်က တူညီတဲ့ နည်းပြတစ်ဦးနဲ့ (၅)နှစ်လောက် လက်တွဲခဲ့ပြီး သူကတော့ ပီအက်စ်ဂျီနဲ့ (၁)နှစ်ခွဲသာ ရှိပါသေးတယ်။”
“ကျွန်တော်တို့ကို မြင်ကြည့်ပါ။ ကျွန်တော်တို့ကတော့ (၃)လပဲ ရှိပါသေးတယ်။ အဲ့ဒါက ကြီးမားတဲ့ ခြားနားချက်တစ်ခုပါပဲ။ ဒါကြောင့် ကျွန်တော်တို့က အာဆင်နယ် မန်စီးတီးတို့လို အသင်းတွေနဲ့ မယှဉ်နိုင်သေးဘူးဆိုတာကို ယုံကြည်ပါတယ်။” လို့ ထုတ်ဖော် ပြောကြားသွားခဲ့ပါတယ်။
