ရီးယဲလ်အသင်း၏ တိုက်စစ်ကစားသမား ဗင်နီစီယပ်စ်က မန်စီးတီးအသင်းကို ဂိုးပြတ်ရှုံးနိမ့်ခဲ့သည့်အတွက် အလွန်ဝမ်းနည်းခဲ့ရသည်ဟု ပြောကြားခဲ့သည်။
ရီးယဲလ်အသင်းသည် မေလ (၁၇) ရက်က ကစားခဲ့သည့် ချန်ပီယံလိဂ် ဆီမီးဖိုင်နယ် ဒုတိယအကျော့ပွဲစဉ်တွင် မန်စီးတီးအသင်းကို မယှဉ်နိုင်ဘဲ (၀-၄) ဂိုးဖြင့် အရှုံးပေးခဲ့ရသည်။
ထို့ကြောင့် ချန်ပီယံလိဂ်သမိုင်းတွင် အအောင်မြင်ဆုံးအဖြစ် (၁၄) ကြိမ်ဖြင့် စံချိန်ထားသည့် ရီးယဲလ်မက်ဒရစ်အသင်းအနေဖြင့် မန်စီးတီးကို နှစ်ကျော့ပေါင်း (၁-၅) ဂိုးဖြင့် ရှုံးနိမ့်ကာ ဆီမီးဖိုင်နယ်မှ လှည့်ပြန်ခဲ့ရသည်။
ဗင်နီစီယပ်စ်က “အသင်းကြီးတစ်သင်းရဲ့ကွင်းမှာ ကစားရတာ အလွန်ခက်ခဲပါတယ်။ ဒီပွဲကနေ သင်ခန်းစာယူပြီး နောက်ရာသီမှာ ဒီလိုထပ်မဖြစ်အောင် ကြိုးစားရမှာပါ။ ဒီရလဒ်အတွက် ကျွန်တော်တို့ အလွန်ဝမ်းနည်းရပါတယ်။ ကျွန်တော်တို့ ဗိုလ်လုပွဲရောက်ချင်ခဲ့ပေမဲ့ မလုပ်နိုင်ခဲ့ပါဘူး”ဟု ပြောကြားခဲ့သည်။
ထို့ပြင် ဗင်နီစီယပ်စ်က ချန်ပီယံလိဂ်မှ ထွက်ခွာရပြီးနောက် အနာဂတ်လှုပ်ခတ်နေသည့် အသင်းနည်းပြ အန်ဆယ်လော့တီကိုလည်း အသင်းတွင် ဆက်ရှိနေစေလိုကြောင်း ပြောကြားခဲ့သည်။
