၂၀၂၂-၂၀၂၃ ရာသီ လိဂ်ဖလား (Carabao Cup) ပြိုင်ပွဲ စတုတ္ထအဆင့်မှ ထွက်ခဲ့ရသည့် လီဗာပူးလ်အသင်းနည်းပြ ယာဂန်ကလော့ပ်က မန်စီးတီးနှင့်ပွဲမှာ ပွဲကောင်းတစ်ပွဲဖြစ်ပြီး မိမိအသင်းအနေဖြင့် ခံစစ်ပိုင်းစွမ်းဆောင်ရည် ပိုမိုကောင်းမွန်သင့်ကြောင်း သုံးသပ်ပြောကြားခဲ့သည်။
ယင်းပွဲကို မန်စီးတီးအသင်း၏ အီတီဟတ်ကွင်း၌ ယှဉ်ပြိုင်ကစားခဲ့ပြီး လီဗာပူးလ်အသင်းမှာ နောက်မှလိုက်၍ ချေပဂိုး နှစ်ကြိမ်တိုင် သွင်းယူနိုင်သော်လည်း (၃-၂) ဂိုးဖြင့် ရှုံးနိမ့်ခဲ့ရသည်။
“အစမှာကတည်းက အခက်အခဲတွေ ရှိခဲ့ပါတယ်။ ပွဲအစ ၁၅ မိနစ်မှာ ကျွန်တော်တို့ ပြဿနာတွေရှိခဲ့တယ်။ ကျွန်တော်တို့ကစားပုံက လုံလောက်တဲ့ ကျစ်လျစ်မှုမရှိခဲ့ပါဘူး။ ဒါပေမဲ့ ကစားပွဲထဲကို ပြန်ရောက်လာဖို့ နည်းလမ်းရှာတွေ့ခဲ့ပြီး အံ့အားသင့်ဖွယ်ဂိုးတစ်ဂိုးအပါအဝင် ဂိုးတွေသွင်းယူပြီးတော့ သူတို့ကိုလည်း ပြဿနာကြုံတွေ့စေခဲ့ပါတယ်။ သုံးဂိုးစလုံးကိုလည်း အခုထက် ပိုကောင်းအောင် ကာကွယ်နိုင်သင့်ပါတယ်။ အထူးသဖြင့် တတိယဂိုးပါ” ဟု ယာဂန်ကလော့ပ်က ပြောကြားခဲ့သည်။
