ချယ်လ်ဆီးအသင်းသည် မန်စီးတီးအသင်းမှ အင်္ဂလန်တောင်ပံကစားသမား စတာလင်ကို ယခုတစ်ပတ်အတွင်း ခေါ်ယူနိုင်ရန် မျှော်လင့်နေကြောင်း သိရသည်။
မန်စီးတီးအသင်းနှင့် စာချုပ်သက်တမ်း(၁)နှစ်သာ ကျန်ရှိတော့သည့် စတာလင်ကို ချယ်လ်ဆီးအသင်းက ခေါ်ယူနိုင်ရန် အလွန်နီးစပ်သည့် အခြေအနေ ရောက်ရှိနေပြီဖြစ်သော်လည်း ပြောင်းရွှေ့ ကြေးအတွက် ညှိနှိုင်းရာတွင် နှစ်သင်းအကြား ကွာဟချက်အနည်းငယ်ရှိနေသောကြောင့် သဘောတူညီမှု မရရှိသေးခြင်းဖြစ်ကြောင်း သိရသည်။
စတာလင်သည် မန်စီးတီးအသင်းတွင် ခြေစွမ်းပြနိုင်သည့် ကစားသမားဖြစ်သော်လည်း နည်းပြ ဂွါဒီယိုလာက ဦးစားပေးကစားသမားအဖြစ် သတ်မှတ်ခြင်းမရှိသလို၊ ယခုအခါ တိုက်စစ်ပိုင်းကို အပြောင်းအလဲပြုလုပ်ရန် စီစဉ်နေသည့်အတွက် ဂျေးဇူးနည်းတူ အသင်းမှ ရောင်းထုတ်ခံရမည့် ကစားသမားဖြစ်လာခဲ့သည်။
ချယ်လ်ဆီးအသင်းကလည်း တိုက်စစ်မှူး လူကာကူကို အင်တာမီလန်အသင်းထံ အငှားချခဲ့ပြီးနောက် စတာလင်ကို ခေါ်ယူရန် ပိုမိုအားထည့်ကြိုးပမ်းလာခဲ့ခြင်းဖြစ်သည်။ အပြောင်းအရွှေ့အပြီးမသတ်နိုင်သေးခြင်းမှာ မန်စီးတီးအသင်းက စတာလင်အတွက် ပြောင်းရွှေ့ကြေးကို ပေါင်သန်း(၆၀)ဝန်းကျင်အထိ အလိုရှိနေပြီး ချယ်လ်ဆီးအသင်းက ပေါင်(၃၅)သန်းဖြင့်သာ စတင်ကမ်းလှမ်းခဲ့ခြင်းကြောင့် ဖြစ်ကြောင်း သိရသည်။
သို့သော် ချယ်လ်ဆီးအသင်းက ကြေးတိုးမြှင့်ကမ်းလှမ်းပြီး ယခုတစ်ပတ်အတွင်း အပြီးသတ်နိုင်ရန် မျှော်လင့်နေကြောင်း သိရသည်။
