မန်ချက်စတာယူနိုက်တက်ကို မပြောင်းရွေ့ရန် သူ့ကို စည်းရုံးခဲ့တဲ့ နယ်သာလန် အသင်းဖော်ကို ထုတ်ဖော်လိုက်တဲ့ ဗန်ဒီဘိ

နယ်သာလန် ကွင်းလယ်လူ ဒွန်နီဗန်ဒီဘိဟာ ပြီးခဲ့တဲ့ တစ်ပတ်က အိုင်ယက် အသင်းမှ မန်ချက်စတာယူနိုက်တက် အသင်းကို ပေါင်သန်း ၄၀ နဲ့ အပြီးသတ် ရောက်ရှိ လာခဲ့တာ ဖြစ်ပေမယ့် အိုးထရပ်ဖို့ဒ် မရောက်မီ ၎င်းကို ထိပ်တန်း ကလပ်တွေ ဖြစ်ကြတဲ့ ရီးရဲယ်မက်ဒရစ် ၊ ဘာစီလိုနာ ၊ အာဆင်နယ် တို့က စိတ်ဝင်စားမှုတွေ ပြသ ခဲ့ပါတယ်။

တော့တင်ဟမ် ကလည်း ဗန်ဒီဘိကို စိတ်ဝင်စား ခဲ့တဲ့ အသင်းတွေ ထဲမှာ ပါဝင် ခဲ့တယ်လို့ သိရပြီး နည်းပြ ဂျိုဆေးမော်ရင်ညိုဟာ နယ်သာလန် လက်ရွေးစင်ကို ယူနိုက်တက်ထက် ဦးအောင် ခေါ်ယူရန် ကြိုးပမ်း ခဲ့သေးတယ်လို့ သတင်းထွက် ခဲ့ပါတယ်။ လက်ရှိမှာတော့ ဗန်ဒီဘိက သူ့ရဲ့ နယ်သာလန် လက်ရွေးစင် အသင်းဖော် ဖြစ်တဲ့ အပြင် အိုင်ယက် အကယ်ဒမီမှာ အတူ တွဲဖက် ကစား ခဲ့ဖူးသူ စတီဗင်ဘာဝင်ဟာ သူ့ကို မန်ယူနိုက်တက်ကို ငြင်းပယ်ပြီး တော့တင်ဟမ်ကို ပြောင်းလာရန် စည်းရုံး ခဲ့တယ်လို့ ထုတ်ဖော် ခဲ့ပါတယ်။

ဗန်ဒီဘိက “မန်ယူနိုက်တက်ကို မပြောင်းရွေ့မီ ဘာဝင်က ကျွန်တော့်ကို မက်ဆေ့ချ် တစ်စောင် ပို့ခဲ့တယ်လို့ ပြောရမှာပါ။ ဒီမက်ဆေ့ချ်က ‘မင်းငါတို့ဆီ လာမှာလား or မလာဘူးလား? ဆိုပြီး ပြောဆို ထားတဲ့ အရာပါ။ ကျွန်တော်တို့ကြား မကြာခဏ အမြဲတမ်း အဆက်အသွယ် ရှိပါတယ်။ ကျွန်တော်တို့ အိုင်ယက်မှာ အကြာကြီး တွဲဖက် ကစား ခဲဖူးပြီး အမြဲတမ်း အဆက်အသွယ် ရှိကြပါတယ်။

ကျွန်တော်တို့ မကြာမီ ဆုံတွေ့ တော့မှာပါ။ ဒါပေမယ့် ကျွန်တော် စပါးထက် စာရင် မန်ယူနိုက်တက်ကို ပြောင်းရွေ့ဖို့ ရွေးချယ် ခဲ့ပါတယ်။ ဒါဟာ အရမ်းကို ကောင်းမွန်တဲ့ ခြေလှမ်း ဖြစ်ပါတယ်။ ကျွန်တော် ကတော့ အချိန်ကောင်းမှာ ပြောင်းရွေ့ ခဲ့တယ်လို့ ထင်ပါတယ်။” လို့ ဆိုသွားပါတယ်။

ဒီမီတာဘာဘာတော့ဖ်ဟာ ဒွန်နီဗန်ဒီဘိ ဒီနွေရာသီမှာ အိုးထရပ်ဖို့ဒ်ကို ရောက်လာခဲ့တဲ့ အတွက် စိတ်လှုပ်ရှား နေပြီး ရာသီသစ် မတိုင်မီ မန်ယူနိုက်တက်တို့ ဆက်လက် လုပ်ဆောင် သွားရမယ့် အရာကို ပြောပြ သွားခဲ့ပါတယ်။ ဗန်ဒီဘိဟာ ဒီနွေရာသီ အပြောင်းအရွေ့မှာ မန်ယူနိုက်တက် အတွက် ပထမဦးဆုံး ကစားသမား ခေါ်ယူမှု ဖြစ်ပြီး သရဲနီ တို့ဟာ နယ်သာလန် လက်ရွေးစင် အတွက် အိုင်ယက်ကို ပေါင်သန်း ၄၀ ပေးချေ ခဲ့ရပါတယ်။

အသက် ၂၃ နှစ် အရွယ် ကစားသမား ရောက်လာခဲ့တာကြောင့် မန်ယူနိုက်တက်ရဲ့ ကွင်းလယ်လူမှာ အင်အားတွေ ပိုမို ကောင်းမွန် သွားခဲ့ပြီး လာမည့်ရာသီ အိုးထရပ်ဖို့ဒ် ကလပ်ရဲ့ ကွင်းလယ် နေရာတွေ အတွက် ပေါ့ဘာ ၊ ဘရူနိုဖာနန်ဒက် ၊ မာတစ် ၊ မက်တိုမီနေး ၊ ဖရက် နဲ့ ဗန်ဒီဘိ တို့ အပြိုင်အဆိုင် နေရာလုကြရမှာ ဖြစ်ပါတယ်။ ဘာဘာတော့ဖ်က ဒီလို နေရာတစ်နေရာ အတွက် ပြိုင်ဆိုင်မှု မြင့်တက် လာခြင်းဟာ လာမည့် ရာသီ မတိုင်မီ ယူနိုက်တက် အတွက် အပေါင်းလက္ခဏာ ဆောင်တဲ့ အချက် ဖြစ်တယ်လို့ ယုံကြည် နေပါတယ်။

ဘာဘာတော့ဖ် က “ယူနိုက်တက် ရဲ့ ကွင်းလယ်ပိုင်းမှာ ကစားသမားတွေ အများအပြား ရှိနေကာ ပြိုင်ဆိုင်မှုတွေ မြင့်တက်လာမှာပါ။ ဒါပေမယ့် ဒါဟာ ကောင်းမွန်တဲ့ အရာပါ။ ဘာလို့လဲ ဆိုတော့ ပြိုင်ဆိုင်မှု ရှိတယ် ဆိုတာ အမြဲတမ်း ကောင်းတဲ့အရာပါ။ ဒါဟာ ကစားသမား အချင်းချင်း အကောင်းဆုံး အရည်အသွေးတွေကို ထုတ်ယူ နိုင်စွမ်း ရှိစေပါတယ်။ ပေါ့ဘာ ၊ ဗန်ဒီဘိ နဲ့ ဘရူနိုဖာနန်ဒက် တို့ တွဲဖက် သွားဖို့ များပြီး ဒါဟာ စိတ်လှုပ်ရှားစရာပါ။ အသင်းဟာ ကောင်းမွန်တဲ့ ပုံစံနဲ့ ကျစ်လစ် လာခဲ့ပါတယ်။” လို့ ဆိုသွားပါတယ်။