မြန်မာ MMA ကစားသမား အောင်လအန်ဆန်က ၎င်းလက်လွှတ်ခဲ့ရသည့် ONE မစ်ဒယ်ဝိတ်တန်း ကမ္ဘာ့ချန်ပီယံဆုကို ပြန်လည်ရယူနိုင်မည်ဟု ယုံကြည်ကြောင်း ပြောကြားခဲ့သည်။
အောင်လအန်ဆန်သည် လက်ရှိ ONE မစ်ဒယ်ဝိတ်တန်းကမ္ဘာ့ချန်ပီယံ နယ်သာလန်နိုင်ငံသား ဒီရစ်ဒါကို စိန်ခေါ်ခွင့်မရမီ ဘရာဇီးလ်နိုင်ငံသား လီအန်ဒရိုနှင့် ဇူလိုင် (၃၀)ရက် ယနေ့ ထိုးသတ်ရမည်ဖြစ်ပြီး အနိုင်ရမှသာ စိန်ခေါ်ခွင့်ရရှိမည်ဖြစ်သည်။
”ကျွန်တော်ရဲ့ ရည်မှန်းချက်က မစ်ဒယ်ဝိတ်တန်း ကမ္ဘာ့ချန်ပီယံခါးပတ်ကို ပြန်လည်ရရှိဖို့ဖြစ်ပါတယ်။ ဒါကြောင့် မစ်ဒယ်ဝိတ်တန်း ကမ္ဘာ့ချန်ပီယံဆု ပြန်လည်ရယူနိုင်ဖို့ အကောင်းဆုံးကြိုးစားနေပါတယ်။ ကျွန်တော်မျှော်လင့်ထားတာတွေကို ပြန်လုပ်ပြနိုင်မယ်လို့လည်း ထင်ပါတယ်။ မစ်ဒယ်ဝိတ်တန်း ကမ္ဘာ့ချန်ပီယံခါးပတ်ကို ပြန်လည်ရယူမှာပါ”ဟု အောင်လအန်ဆန်က လီအန်ဒရိုနှင့် ပွဲမတိုင်မီ ONE Championship နှင့် တွေ့ဆုံမှုတွင် ကမ္ဘာ့ချန်ပီယံမျှော်လင့်ချက်အား ထည့်သွင်းပြောကြားခဲ့ခြင်းဖြစ်သည်။
အောင်လအန်ဆန်သည် ONE မစ်ဒယ်ဝိတ်တန်း ကမ္ဘာ့ချန်ပီယံအဖြစ် ၂၀၁၇ ခုနှစ် ဇွန် (၃၀)ရက်မှ ၂၀၂၀ ပြည့်နှစ် အောက်တိုဘာလကုန်အထိ ရပ်တည်နိုင်ခဲ့ပြီး ၂၀၂၀ အောက်တိုဘာ(၃၀)ရက်က ထိုးသတ်သည့် ကမ္ဘာ့ချန်ပီယံကာကွယ်ပွဲတွင် နယ်သာလန်နိုင်ငံသား ဒီရစ်ဒါကို အရေးနိမ့်ပြီး လက်လွှတ်ခဲ့ရခြင်းဖြစ်သည်။
အောင်လအန်ဆန်သည် ယခင်က မစ်ဒယ်ဝိတ်တန်းအပြင် လိုက်ဟဲဗီးဝိတ်တန်း ကမ္ဘာ့ချန်ပီယံအဖြစ် ၀ိတ်တန်းနှစ်ခု ချန်ပီယံဖြစ်ခဲ့သော်လည်း ၂၀၂၀ အောက်တိုဘာမှ ၂၀၂၁ ဧပြီလအတွင်း ချန်ပီယံခါးပတ် (၂)ခုစလုံး လက်လွှတ်ခဲ့ရသည်။
အောင်လအန်ဆန်သည် အသက်အရွယ်အရ မစ်ဒယ်ဝိတ်တန်းပွဲစဉ်များသာ ထိုးသတ်သွားမည်ဖြစ်သည်။
