စပါးအသင်းအားပေးသူပရိသတ်များသည် လိဂ်ချန်ပီယံရှစ်ကလပ် မစ်ဒယ်ဘရော့ အသင်းအား ရှုံးနိမ့်ကာ FA ဖလားပြိုင်ပွဲမှ ထွက်ခွာခဲ့ရသည့် စပါးအသင်းကို ဒေါသပေါက်ကွဲခဲ့ကြပြီး လူမှုကွန်ရက်များတွင် ပြင်းထန်စွာဝေဖန်ခဲ့ကြကြောင်း ဗြိတိန်သတင်းစာ Daily Mail က ဖော်ပြခဲ့သည်။
မတ်လ (၁)ရက်တွင်ကစားခဲ့သည့် FA ဖလား ပဉ္စမအဆင့်ပွဲစဉ်၌ စပါးအသင်းသည် လိဂ်ချန်ပီယံရှစ်ကလပ် မစ်ဒယ်ဘရော့အသင်းကို အချိန်ပိုတွင် (ဝ-၁)ဂိုးဖြင့် ရှုံးနိမ့်ခဲ့ကာ ပြိုင်ပွဲမှ ထွက်ခွာခဲ့ရခြင်းဖြစ်သည်။
စပါးအသင်းအနေဖြင့် FA ဖလားပြိုင်ပွဲမှ ထွက်ခွာခဲ့ရခြင်းကြောင့် ဖလားလက်မဲ့ရာသီနှင့် ရင်ဆိုင်ရရန် သေချာသွားခဲ့ပြီဖြစ်ပြီး အသင်းပရိသတ်များသည် အသင်းဥက္ကဋ္ဌ လီဗီကို လူမှုကွန်ရက်များတွင် ပြင်းထန်စွာ ဝေဖန်ခဲ့ကြခြင်းဖြစ်သည်။
စပါးအသင်းသည် ၂၀၀၇-၀၈ ရာသီတွင် လိဂ်ဖလားချန်ပီယံဆုကို နောက်ဆုံးအကြိမ် ရယူနိုင်ခဲ့ပြီးနောက် ယင်းကတည်းက ဆုဖလားရယူနိုင်ခြင်းမရှိတော့ပေ။ စပါးပရိသတ်များသည် ကွန်တီအား နည်းပြအဖြစ်ခန့်အပ်ပြီးနောက် (၁၄)နှစ်ကြာ ဆုဖလားဝေးကွာမှုကို အဆုံးသတ်ရန် မျှော်လင့်ကြခဲ့သော်လည်း ယခုအခါ နောက်ဆုံးမျှော်လင့်ချက်ဖြစ်သည့် FA ဖလားပြိုင်ပွဲကပါ ထွက်ခွာခဲ့ရခြင်းဖြစ်သည်။
ထို့ကြောင့် စပါးအသင်းပရိသတ်များသည် လူမှုကွန်ရက်များတွင် အသင်းဥက္ကဋ္ဌ လီဗီနှင့် အုပ်ချုပ်ရေးတာဝန်ရှိသူများကို ပြင်းထန်စွာဝေဖန်ခဲ့ကြခြင်းဖြစ်သည်။ “နောက်တစ်ရာသီ သွားပြန်ပြီ။ အသင်းက ရုပ်ဝတ္ထုတွေကိုပဲ အာရုံစိုက်နေပြီး အောင်မြင်မှုကို ဂရုမစိုက်ဘူး။ Levy Out”၊ “ရှက်စရာကောင်းလိုက်တာ။ ဘာစိတ်ကူးမှ မရှိဘူး။ ရည်မှန်းချက် မရှိဘူး။ စွမ်းအား မရှိဘူး”၊ “စပါးအသင်း တစ်သမတ်တည်းရှိတာက အသင်းပရိသတ်တွေကို စိတ်ပျက်စေတာပါပဲ” စသည့်မှတ်ချက်များကို စပါးအသင်းပရိသတ်များ ရေးသားခဲ့သလို၊ အသင်း ဥက္ကဋ္ဌ လီဗီကိုလည်း အသင်းမှထွက်ခွာရန် တောင်းဆိုခဲ့ကြကြောင်း သိရသည်။
