လက်စတာ စီးတီး ရဲ့ တန်းဆင်းရမှု နဲ့ အတူ ၂၀၁၆ ပရီးမီးယားလိဂ် ချန်ပီယံ အသင်းက ကစားသမားကောင်းတွေ ဘယ်ကို ပြောင်းရွှေ့ကြမလဲ ဆိုတဲ့ မေးခွန်းတွေ ပေါ်ထွက်လာခဲ့ ပါတယ် ။
ဂျေမီ ဗာဒီ လောက်သာ ကျန်ရှိဖို့ အလားအလာများပြီး အခြားသော မြေခွေးပြာတွေဟာ ကင်းပါဝါ ကို စွန့်ခွာ ကြတော့မှာပါ ။
အဲ့ဒိအထဲက တယောက်ကတော့ ဂျိမ်းစ် မက်ဒီဆင် ပါပဲ ။
တည်ကန်ဘော ကောင်းပြီး တိုက်စစ် အားသန်တဲ့ အင်္ဂလန် ကွင်းလယ်လူကို စပါး ၊ အာဆင်နယ် နဲ့ နယူးကာဆယ် အသင်းတို့က ခေါ်ယူဖို့ စိတ်ဝင်စားမှု ရှိနေကြပါတယ် ။
အာဆင်နယ် ဟာ လွန်ခဲ့တဲ့ ၂ နှစ်တုန်းက မက်ဒီဆင် ကို ကြိုးစားခဲ့ဖူး ပေမယ့် အဆင်မပြေမှုတွေကြောင့် မာတင် အိုဒီဂွာ ကို အစားထိုး ပြောင်းလဲ ခေါ်ယူသွားခဲ့ပါတယ် ။
လက်ရှိမှာတော့ အသင်းရဲ့ အင်အားကို ပိုမိုတောင့်တင်းအောင် လုပ်ဆောင်ဖို့ ဆန္ဒ ရှိနေတဲ့ မီကေး အာတီတာ နဲ့ လက်စတာ ရဲ့ တန်းဆင်းရမှုတွေကြောင့် မက်ဒီဆင် ကို ဂန်းနားဂျာစီနဲ့ ပြန်မြင်ရဖို့ အလားအလာတွေ ရှိလာခဲ့ ပါတယ် ။
အကယ်၍ မက်ဒီဆင် သာ အာဆင်နယ် ရောက်လာခဲ့မယ်ဆိုရင်တော့ အီမီလ် စမစ် ရိုး ဟာ လန်ဒန် ကနေ ကနေ ပြောင်းရွှေ့ထွက်ခွာရဖွယ် ရှိပါတယ် ။
နာမည်ကျော် ဂျာနယ်လစ် ဖာဘရီဇီယို ရိုမာနို ရဲ့ ဖော်ပြချက် မှာလည်း နယူးကာဆယ် ဟာ မက်ဒီဆင် ကို အထူးစိတ်ဝင်စား နေပြီး အင်္ဂလန် ကွင်းလယ်လူကို အသင်းရဲ့ တိုက်စစ်ပိုင်း အတွက် ခေါ်ယူ အားဖြည့်ဖို့ ဆန္ဒ ရှိနေတယ်လို့ ပါရှိခဲ့ ပါတယ် ။
နယူးကာဆယ် နည်းပြ အက်ဒီဟောင်း ကလည်း လာမယ့် ရာသီ ချန်ပီယံလိဂ် ဝင်ခွင့်ရရှိထားတဲ့ အသင်းမှာ အင်္ဂလန်ကစားသမားတွေ နဲ့ Home ground player တွေကို ထပ်ဖြည့်သွားဖို့ စိတ်ကူးထားကြောင်း ထုတ်ဖော် ပြောဆို ထားပါတယ် ။
တော့တင်ဟမ် ဟော့စပါး အသင်းကလည်း အလားအလာ နည်းပါး ပေမယ့် မက်ဒီဆင် ကို ခေါ်ယူမယ့် ပြိုင်ပွဲထဲ ကို ပါဝင်လာဖို့ ရှိပါတယ် ။
လက်ရှိမှာ စပါး ဟာ နည်းပြသစ် ခန့်အပ်နိုင်ဖို့ကို ဦးစွာ ကြိုးစားနေပြီး နည်းပြသစ် ဘယ်သူ ဖြစ်မလဲဆိုတဲ့ အနေအထား အပေါ်မူတည်ပြီး မက်ဒီဆင် ကို ခေါ်ယူဖို့ လုပ်ဆောင်ဖွယ် ရှိမရှိ သိနိုင်မှာ ဖြစ်ပါတယ် ။
တယ်လီဂရပ် သတင်းစာရဲ့ ဖော်ပြမှု အရ မက်ဒီဆင် ရဲ့ ဈေးကွက် တန်ကြေးဟာ ပေါင် သန်း ၅၀ ဝန်းကျင်ရှိပြီး ၃၅-၄၀ ထက် လျော့နည်းသွားဖို့ အလားအလာ နည်းပါးတယ်လို့ သိရပါတယ် ။
မက်ဒီဆင် ရဲ့ အနာဂါတ် ဘာ ဆက်ဖြစ်မလဲ ဆိုတာ စောင့်ကြည့်ကြပါစို့ဗျာ . . .
