ဘာစီလိုနာ အသင်း ရဲ့ အာဂျင်တီနား တောင်ပံ တိုက်စစ် စူပါစတား လီယွန်နယ် မက်ဆီ ဟာ လွန်ခဲ့တဲ့ လပိုင်းတုန်းက ၎င်းရဲ့ ငယ်ဘဝ ကတည်းက ကစားလာတဲ့ ဘာစီလိုနာ အသင်း ကို စွန့်ခွာဖို့ တရားဝင် ထုတ်ပြောလာတဲ့ အတွက် ၊ အပြောင်းအရွှေ့ ဈေးကွက် အတွင်း အတော် လှုပ်လှုပ်ခတ်ခတ် ဖြစ်သွားခဲ့ပါတယ် ။
အထူးသဖြင့် မက်ဆီ ဟာ ဘာစီလိုနာ အသင်း ဟာ ချန်ပီယံလိဂ် ကွာတားဖိုင်နယ် အဆင့် မှာ ဘိုင်ယန်မြူးနစ် အသင်း ကို ၈ – ၂ နဲ့ အရှက်တကွဲ အရေးနိမ့်ခဲ့ပြီးတဲ့နောက် ၊ အသင်း ဘုတ်အဖွဲ့ ရဲ့ လုပ်ဆောင်ချက်တွေ အပေါ် အားမလို အားမရ ဖြစ်လာခဲ့တာနဲ့ တပြိုင်နက် သူ ကိုယ်တိုင် အသင်း က ထွက်ခွာလိုတဲ့ အထိ တောင်းဆိုလာခဲ့တာ ဖြစ်ပါတယ် ။
မက်ဆီ ရဲ့ အဆို အရတော့ စာချုပ်ပါ အချက်အလက်တွေ အရ ၎င်းဟာ ယခုနှစ် ဘောလုံး ရာသီ ကနေ စပြီး ဘာစီလိုနာ အသင်း ကနေ အချိန်မရွေး အလွတ် နဲ့ ထွက်ခွာလို့ ရနိုင်တယ် သိထားရပေမယ့် ၊ ဘာစီလိုနာ ဘုတ်အဖွဲ့ဝင်တွေ ကတော့ နောက်နှစ် ဘောလုံး ရာသီ ရောက်မှသာ ၊ ဒီ အချက် က စတင်ပြီး အသက်ဝင်မှာ ဖြစ်တယ် လို့ ပြန်လည် တုန့်ပြန်လာခဲ့ပါတယ် ။
ဘာစီလိုနာ ဘုတ်အဖွဲ့ဝင် တွေရဲ့ မလိမ့်တပတ်လုပ်မှုကြောင့် မက်ဆီ တယောက် မလွန်ဆန်နိုင်ခဲ့တဲ့ အဆုံး ၊ နောက်တရာသီ ဆက်နေဖို့ ဆုံးဖြတ်ခဲ့ရပါတယ် ။ မက်ဆီ ရဲ့ အရင်းနှီးဆုံး သူငယ်ချင်း တယောက် ဖြစ်တဲ့ ဥရုဂွေး တိုက်စစ်မှူး လူးဝစ် ဆွာရက်ဇ် ကတော့ ဘာကာ နည်းပြသစ် ရော်နယ်ကိုးမန်း ရဲ့ အစီအစဉ်ထဲမှာ မပါဝင်တော့လို့ အသင်းကနေ ထွက်ခွာခဲ့ရပါတယ် ။
လက်ရှိ မှာ အက်သလက်တီကို အသင်း နဲ့ စာချုပ်ချုပ်ထားတဲ့ ဆွာရက်ဇ် ကတော့ မက်ဆီ ဘာစီလိုနာ အသင်း မှာ ဆက်နေစရာ အကြောင်းအရင်း တချက်သာ ရှိပြီး ၊ အဲ့ဒါ ကတော့ လက်ရှိ ဘုတ်အဖွဲ့ အပြောင်းအလဲ ဖြစ်မှာသာ ဖြစ်လာနိုင်ကြောင်း ဆိုခဲ့ပါတယ် ။
ESPN သတင်း ဌာန နဲ့ အင်တာဗျူး မှာ ဆွာရက်ဇ် က ” လီယို နဲ့ ကျွန်တော့ အကြား က ခိုင်မြဲတဲ့ ဆက်ဆံရေးကြောင့် ကျွန်တော် ဟာ အရင်က ၂ဦးသား ပြောဆိုခဲ့တဲ့ အတွင်းရေး အကြောင်း တွေကို ပြန်ပြီး မပြောလိုပါဘူး ။ ဒါပေမယ့် သူဟာ ဘာစီလိုနာ မှာ အတော်လေး ခက်ခဲပြီး ရှုပ်ထွေးမှု ရှိတဲ့ အခြေအနေ တခု ကို ဖြတ်သန်းခဲ့ရပါတယ် ။ ”
” သူ အသင်းက ထွက်ခွာချင်ခဲ့ပေမယ့် ၊ ကလပ် ဖက်က သူ့ကို အသင်းပြောင်းခွင့် မပြုခဲ့ပါဘူး ။ သူ့ကို ကျွန်တော် တတ်နိုင်သလောက် အားပေးခဲ့တယ် ၊ ဂရုစိုက်ပေးခဲ့တယ် ၊ ဒီ အကြောင်း နဲ့ ပတ်သက်ပြီး နည်းနည်းပါးပါး စိတ်အပြောင်းအလွှဲ ဖြစ်အောင် လုပ်ပေးခဲ့ပါတယ် ။ ”
” ကျွန်တော် ကတော့ သူတို့ ( ဘုတ်အဖွဲ့ ) တွေဟာ မက်ဆီဖက်ကနေ ကျွန်တော့ ကို ဖယ်ထုတ်ဖို့ သက်သက် လုပ်ကြံခဲ့ကြတယ် လို့ပဲ ထင်ပါတယ် ။ ဒါကလည်း ကျွန်တော် နဲ့ လီယို အကြားက ကောင်းမွန်တဲ့ ဆက်ဆံရေးတွေကြောင့် သူတို့ ဒီလိုလုပ်ခဲ့တာ ဖြစ်ကောင်း ဖြစ်နိုင်ပါတယ် ။ ”
” ဒါမှမဟုတ်ရင်လည်း မက်ဆီ နဲ့ ကျွန်တော့ ကို အကြာကြီး ပူးပူးတွဲတွဲ မဖြစ်စေချင်တဲ့ သဘောလည်း ဖြစ်ကောင်းဖြစ်မှာပါ ။ ဒါပေမယ့် မက်ဆီ ဘာစီလိုနာ က ထွက်ခွာချင်ခဲ့တာ က ကျွန်တော် နဲ့တော့ တိုက်ရိုက် သက်ရောက်မှု မရှိပါဘူး ။ သူတို့ဟာ မက်ဆီ ရဲ့ ဆုံးဖြတ်ချက် ကို လေးစားဖို့ ကောင်းပါတယ် ။ ”
” မက်ဆီ တခြား ကလပ် တသင်း အတွက် ကစားပေးဖို့ အလားအလာ က ရှိကောင်းရှိနိုင်ပါသေးတယ် ။ ဒါပေမယ့် အခြေအနေတွေ ပြန်ငြိမ်သက်သွားတဲ့အခါ ၊ သူ ကိုယ်တိုင်လည်း ပြေရာပြေကြောင်း ရသွားပြီး ၊ ဘာစီလိုနာ အသင်း မှာ ဘုတ်အဖွဲ့ အပြောင်းအလဲ ဖြစ်လာရင်တော့ သူ အသင်းမှာ ဆက်နေဖြစ်နိုင်ပါတယ် ။ ”
” မိတ်ဆွေ သူငယ်ချင်း တယောက် အနေနဲ့တော့ ဘာကာ မှာ သူ ဆက်နေလို့ အဆင်ပြေသေးတယ် ဆိုရင် ကျွန်တော် ပျော်ရွှင်သလို ၊ နောက်တသင်း ကို သူ ပြောင်းရွှေ့ခဲ့မယ် ဆိုရင်လည်း ကျွန်တော် ပျော်ပါတယ် ။ ” လို့ ပြောကြားခဲ့ပါတယ် ။
