မက်ဂွိုင်းရားအား ကာကွယ်ခဲ့သည့် အင်္ဂလန်နည်းပြ ဆောက်ဂိတ်ကို ရွိုင်ကင်း ဝေဖန်

အိုင်ဗရီကို့စ်နှင့်ပွဲတွင် အင်္ဂလန်ပရိသတ်များ၏လှောင်ပြောင်ခြင်းခံခဲ့ရသည့် မန်ယူနောက်ခံလူ မက်ဂွိုင်းရားအားကာကွယ်ခဲ့သည့် အင်္ဂလန်နည်းပြ ဆောက်ဂိတ်ကို Sky Sports တွင် ဘောလုံးဝေဖန်သူအဖြစ် ဆောင်ရွက်နေသည့် မန်ယူဂန္ထဝင် ရွိုင်ကင်းက ဝေဖန်ခဲ့သည်။

အင်္ဂလန်နောက်ခံလူ မက်ဂွိုင်းရားသည် အိုင်ဗရီကို့စ်နှင့်ခြေစမ်းပွဲတွင် အသင်းပရိသတ်များ၏လှောင်ပြောင်မှုကိုခံခဲ့ရရာ ပွဲအပြီးတွင် အင်္ဂလန်နည်းပြ ဆောက်ဂိတ်က မက်ဂွိုင်းရားအပေါ် လှောင်ပြောင်မှုများမှာ ရယ်စရာကောင်းသည်ဟုပြောဆိုကာ ကာကွယ်ခဲ့ခြင်းဖြစ်သည်။

သို့သော် ဆောက်ဂိတ်၏တုံ့ပြန်မှုမှာ ပုံကြီးချဲ့သည့်လုပ်ရပ်ဖြစ်သည်ဟု ရွိုင်ကင်းက ဝေဖန်ခဲ့ခြင်းဖြစ်သည်။ ရွိုင်ကင်းက “ကစားသမားတိုင်း အလှောင်ခံနေရတာပါပဲ။ ဘောလုံးပွဲတွေမှာ ငတုံးတွေရှိတယ်။ အင်္ဂလန်မှာ ပိုများတာပေါ့။ ဆောက်ဂိတ်အနေနဲ့ ဒီလိုအနေအထားမှာ မက်ဂွိုင်းရား ခြေစွမ်းပြနိုင်ခဲ့တယ်ဆိုတာလောက်နဲ့ လုံလောက်နေတာကို ကြီးကြီးကျယ်ကျယ်တွေ လျှောက်ပြောနေတယ်” ဟု ပြောကြားခဲ့သည်။

ထို့ပြင် ဆောက်ဂိတ်အနေဖြင့် မက်ဂွိုင်းရားအား ကာကွယ်ခဲ့ခြင်းမှာ သူ၏ကစားသမားရွေးချယ်မှုနှင့်ပတ်သက်ပြီး ကာကွယ်လိုခြင်းကြောင့်သာဖြစ်သည်ဟုလည်း ပြောကြားခဲ့သည်။