ဘာစီလိုနာအသင်း၏ ဘရာဇီးလ်လက်ရွေးစင်တောင်ပံကစားသမား ရာဖင်ညာက လိဒ်စ်အသင်းနည်းပြဟောင်းဖြစ်သည့် ဘီယဲလ်ဆာမှာ မိမိ၏ကစားသမားဘဝတွင် အရေးပါဆုံးလူသားတစ်ဦးဖြစ်သည်ဟု ပြောကြားခဲ့သည်။
အသက် (၂၅)နှစ်အရွယ်ရှိ ရာဖင်ညာသည် ယခုနွေရာသီအပြောင်းအရွှေ့ကာလတွင် လိဒ်စ်ယူနိုက်တက်အသင်းမှ ဘာစီလိုနာအသင်းသည် ယူရို (၅၈)သန်း ဖြင့်ပြောင်းရွှေ့ခဲ့သူဖြစ်ပြီး ဘာစီလိုနာအသင်း၏ ယခုရာသီစျေးအကြီးဆုံးခေါ်ယူမှုလည်းဖြစ်ခဲ့သည်။
ဘီယဲလ်ဆာသည် လိဒ်စ်အသင်းအားကိုင်တွယ်စဉ် ၂၀၂၀ နွေရာသီအပြောင်းအရွှေ့ကာလတွင်း ရာဖင်ညာအား ပြင်သစ်ကလပ် ရန်းစ်အသင်းမှ ယူရိုသန်း (၂၀)ဖြင့်ခေါ်ယူခဲ့သူဖြစ်ပြီး ရာဖင်ညာမှာ ၎င်း၏လက်အောက်တွင် ပရီးမီးယားလိဂ်၏ အကောင်းဆုံးတောင်ပံကစားသမားများထဲမှ တစ်ဦးဖြစ်လာခဲ့သည်အထိ ခြေစွမ်းပြနိုင်ခဲ့သူဖြစ်သည်။
ရာဖင်ညာက ”သူ (ဘီယဲလ်ဆာ)ဟာ ကျွန်တော်လိဒ်စ်အသင်းကိုရောက်စဉ်က အစစအရာရာကူညီ သင်ပြခဲ့သူပါ။ ကျွန်တော့်ကို ဘရာဇီးလ်လက်ရွေးစင်ဖြစ်အောင် ကူညီခဲ့သလို၊ ဘာစီလိုနာအသင်းကို ပြောင်းရွှေ့နိုင်တာကလည်း ဘီယဲလ်ဆာကြောင့်ပါပဲ။ သူမရှိဘဲ ကျွန်တော်ဒီနေရာအထိရောက်မလာပါဘူး”ဟု ဆိုခဲ့သည်။
