ဘာစီလိုနာအသင်းသည် ချန်ပီယံလိဂ်အုပ်စုအဖွင့်ပွဲတွင် ဘိုင်ယန်မြူးနစ်အသင်းကို ဂိုးပေါက်တည့်ကန်ချက်မရှိဘဲ ဂိုးပြတ်ရှုံးနိမ့်ခဲ့ပြီး ယင်းရှုံးပွဲအတွက် ကစားသမားများ ဒဏ်ရာရနေခြင်းကို ဘာစီလိုနာနည်းပြ ရော်နယ်လ်ကိုးမန်းက အပြစ်တင်ခဲ့သည်။
ဘာစီလိုနာအသင်းသည် ပြီးခဲ့သည့်အင်္ဂါနေ့က ကစားခဲ့သည့် ချန်ပီယံလိဂ်အုပ်စုအဖွင့်ပွဲတွင် ဘိုင်ယန်မြူးနစ်အသင်းကို (၀-၃)ဂိုးဖြင့် ရှုံးနိမ့်ခဲ့ပြီး ဂိုးပေါက်တည့်ကန်ချက်ပင် မရှိခဲ့ကြောင်း သိရှိရသည်။
ဘာစီလိုနာအသင်းအနေဖြင့် အိမ်ကွင်းတွင် ကစားခဲ့ရသော်လည်း ဘိုင်ယန်မြူးနစ်အသင်းကို ခံစစ်ဖြင့်သာ ကစားနိုင်ခဲ့ပြီး ဂိုးပေါက်ကန်ချက် (၅)ကြိမ် ရှိခဲ့သော်လည်း ဂိုးပေါက်တည့်ခဲ့ခြင်းမရှိကြောင်း သိရသည်။
ယင်းမှာ ဘာစီလိုနာအသင်းအတွက် ၂၀၀-၀၄ ရာသီ နောက်ပိုင်း ချန်ပီယံလိဂ်ပွဲစဉ်တစ်ပွဲတွင် ပထမဆုံးအကြိမ် ဂိုးပေါက်တည့်ကန်ချက် မရှိခဲ့ခြင်းဖြစ်ကြောင်း သိရှိရသည်။
ဘာစီလိုနာနည်းပြ ရော်နယ်လ်ကိုးမန်းက ဘိုင်ယန်မြူးနစ်မှာ ပိုကောင်းသည့်အသင်းဖြစ်သည်ဟု ဝန်ခံသော်လည်း အသင်းကစားသမားများ ဒဏ်ရာရနေခြင်းကြောင့် ရွေးချယ်စရာမရှိခဲ့ကြောင်း ပြောကြားခဲ့သည်။
၎င်းက ”ကျွန်တော်တို့အနေနဲ့ ဒီထက်ပိုကောင်းအောင် ကစားသင့်တယ်ဆိုတာကို လက်ခံပါတယ်။ ဒါပေမဲ့ ကစားသမားအင်အားချင်းက ကွာခြားပါတယ်။ အရန်အင်အားကို ကြည့်မယ်ဆိုရင်လည်း တော်တော်လေးကွာပါတယ်။ ကျွန်တော်တို့မှာ အနာဂတ်မှာ တောက်ပလာမယ့် ကစားသမားတွေ အများကြီးရှိပေမဲ့ လောလောဆယ်မှာတော့ ဒဏ်ရာရကစားသမားတွေ ပြန်ကောင်းလာဖို့ လိုပါတယ်။ တိုက်စစ်မှာ ဒီပိုင်း နဲ့ လုခ်ဒီယွန်းတို့သာ ရှိခဲ့ပြီး အယ်လ်ဘာကလည်း နေမကောင်းတဲ့ကြားက ဝင်ကစားခဲ့ရပါတယ်။ ဒဏ်ရာရကစားသမားတွေ ပြန်ကောင်းလာတဲ့အခါ ကျွန်တော်တို့အနေနဲ့ အကောင်းဆုံးယှဉ်ပြိုင်နိုင်မှာပါ”ဟု ပြောကြားခဲ့သည်။
ဘာစီလိုနာအသင်းတွင် တိုက်စစ်ကစားသမားဖြစ်သည့် အဂွဲရိုး၊ ဒမ်ဘီလီ၊ ဘရေ့ဝိတ်တို့မှာ ဒဏ်ရာကြောင့် အနားယူနေရသလို၊ လူငယ်တိုက်စစ်မှူး အန်ဆူဖာတီမှာလည်း ကြံ့ခိုင်မှုပြည့်ဝရန် ရုန်းကန်နေရသည်။
ဘိုင်ယန်မြူးနစ်ကို ဂိုးပြတ်ရှုံးနိမ့်ပြီးနောက် ရော်နယ်လ်ကိုးမန်း၏အနာဂတ်မှာလည်း လှုပ်ခတ်လာခဲ့ကြောင်း စပိန်မီဒီယာများက ဖော်ပြခဲ့ကြသည်။
