အေစီမီလန်ဝါရင့်တိုက်စစ်မှူး အီဘရာဟီမိုဗစ်က ပြင်သစ်လူငယ်ကြယ်ပွင့် ဘာပေအား PSG အသင်းကို စွန့်ခွာပြီး ရီးယဲလ်မက်ဒရစ်သို့ ပြောင်းရွှေ့ကစားရန် တိုက်တွန်းခဲ့ဖူးသည်ဟု ဖွင့်ဟခဲ့သည်။
ပြင်သစ်အားကစားသတင်းစာ L’Equipe က ဘာပေ၏အနာဂတ်နှင့် ပတ်သက်ပြီး မေးမြန်းမှုကို အီဘရာဟီမိုဗစ်က ”ကိုင်လီယန်ကပဲ သူဘယ်သွားမယ်ဆိုတာ ခင်ဗျားကို ဖြေနိုင်ပါလိမ့်တယ်။ သူ ဘာတွေလုပ်ချင်သလဲ၊ ဘယ်လိုတွေးထားသလဲပေါ်မှာ မူတည်ပါတယ်။ တစ်ချိန်တုန်းကတော့ သူ ကျွန်တော့်ကို အကြံညဏ်တောင်းခံခဲ့တယ်ဆိုတာ အမှန်တရားပါ။ သူ့ နေရာမှာ ကျွန်တော်သာဆိုရင် ရီးယဲလ်ကို သွားလိမ့်မယ်လို့ ပြန်ဖြေခဲ့ပါတယ်။ မတူညီတဲ့နိုင်ငံတွေက ကလပ်အသင်းတွေမှာ ကစားဖို့ အခွင့်အလမ်းကို ကျွန်တော် ရခဲ့ပါတယ်။ ဒီအရာတွေက ကျွန်တော် ဘယ်လိုသင်ယူပြီး တိုးတက်ပြောင်းလဲခဲ့သလဲ ဆိုတာပါပဲ။ သူ့အနေနဲ့ ကစားသမားဘဝတစ်လျှောက်လုံး မိခင်နိုင်ငံမှာ ကစားရတာကတော့ လွယ်ကူစေပါတယ်”ဟု ပြောကြားခဲ့သည်။
