ရီးယဲလ်အသင်းသည် အသင်းနောက်ခံလူ ဗာရန်းအား မန်ယူအသင်းသို့ ရောင်းချရန်သဘောတူညီမှုရရှိခဲ့ပြီးနောက် PSG တိုက်စစ်မှူး ဘာပေကို ယခုနွေရာသီအပြောင်းအရွှေ့ကာလတွင် ခေါ်ယူရန် ကြိုးပမ်းမည်ဖြစ်ကြောင်း စပိန်မီဒီယာများက ဖော်ပြခဲ့ကြသည်။
ရီးယဲလ်အသင်းသည် အသင်း၏ပြစ်သစ်နောက်ခံကစားသမား ဗာရန်းကို Add-ons ကြေး အပါအဝင် ပေါင် (၄၂)သန်း(ယူရိုသန်း ၅၀ ဝန်း ကျင်)ဖြင့် ရောင်းချရန် သဘောတူညီမှုရရှိခဲ့ပြီဖြစ်သည်။
ထို့ပြင် ရီးယဲလ်အသင်းသည် ယခုနွေရာသီအပြောင်းအရွှေ့ကာလတွင် အသင်းခေါင်းဆောင်ဖြစ်သူ ရာမို့စ်နှင့် လမ်းခွဲခဲ့ခြင်းကြောင့် တစ်နှစ်လစာ ယူရို (၁၅)သန်းခန့် သက်သာခဲ့ကြောင်း သိရှိရသည်။
ရီးယဲလ်အသင်းသည် ယခုနွေရာသီအပြောင်းအရွှေ့ကာလတွင် ဘိုင်ယန်မြူးနစ်အသင်းမှ ဩစတြီးယားနောက်ခံလူ အလာဘာတစ်ဦး တည်းကိုသာ ပြောင်းရွှေ့ကြေးအလွတ်ဖြင့် ခေါ်ယူထားသည်။
ထို့ပြင် ရီးယဲလ်အသင်းသည် ကိုရိုနာဗိုင်းရပ်စ်ကပ်ဘေးကြောင့် ဥရောပထိပ်တန်းအသင်းများအခက်တွေ့ခဲ့ရသည့် ပြီးခဲ့သည့်ဘဏ္ဍာနှစ်ရှင်းတမ်းတွင်လည်း ယူရို(၁)သန်းခန့် အမြတ်ရခဲ့ကြောင်း သိရှိရသည်။
ထို့ကြောင့် ရီးယဲလ်အသင်းသည် ယခုနွေရာသီအပြောင်းအရွှေ့ကာလတွင် PSG တိုက်စစ်မှူး ဘာပေကို ခေါ်ယူရန် ကြိုးပမ်းလာဖွယ်ရှိ်နေ ကြောင်း Marca က ဖော်ပြခဲ့ခြင်းဖြစ်သည်။
ရီးယဲလ်အသင်းသည် ဘာပေကိုခေါ်ယူရန် ကာလရှည်စိတ်ဝင်စားနေခြင်းဖြစ်ကာ PSG အသင်းနှင့်ချုပ်ဆိုထားသည့် ဘာပေ၏လက်ရှိစာချုပ်မှာ ၂၀၂၂ ခုနှစ်တွင် ကုန်ဆုံးမည်ဖြစ်ပြီး ၎င်း၏ပြောင်းရွှေ့ကြေးမှာ ယူရိုသန်း (၁၈၀)ဖြစ်ကြောင်း သိရှိရသည်။
