မန်စီးတီးအသင်းသည် ကွင်းလယ်ကစားသမား ဘာနာဒိုဆေးလ်ဗားအား ပေါင် (၄၆) သန်းဖြင့် ဘာစီလိုနာအသင်းထံရောင်းချရန် သဘောတူညီမှုရခဲ့ပြီဆိုခြင်းမှာ မဟုတ်မှန်ကြောင်း ငြင်းဆန်ပယ်ချခဲ့ပြီး ၎င်းကို အသင်းတွင်ဆက်ထိန်းရန် တိုက်ပွဲဝင်သွားမည်ဖြစ်ကြောင်း ဗြိတိန်သတင်းစာ Daily Mail က ဖော်ပြခဲ့သည်။
ဘာစီလိုနာအသင်းသည် အသက် (၂၈)နှစ်အရွယ်ရှိ ပေါ်တူဂီလက်ရွေးစင်ကစားသမား ဘာနာဒိုဆေးလ်ဗားအား ခေါ်ယူရန် ပြီးခဲ့သည့် ၂၀၂၁ နွေရာသီအပြောင်းအရွှေ့ကာလကတည်းက ကြိုးပမ်းခဲ့ခြင်းဖြစ်ပြီး ယခုနွေတွင် အရခေါ်ယူရန် စီစဉ်နေခြင်းဖြစ်သည်။
သို့သော် ဘဏ္ဍာရေးအကျပ်အတည်းများနှင့် ရင်ဆိုင်နေရသည့် ဘာစီလိုနာအသင်းအနေဖြင့် ယခုနွေတွင် လီဝန်ဒေါစကီး၊ ရာဖင်ညာ၊ ခွန်ဒဲတို့အပါအဝင် ကစားသမား (၆) ဦးကို ပေါင် (၁၃၃) သန်းကျော် အသုံးပြုခေါ်ယူထားပြီဖြစ်ရာ ဘာနာဒိုဆေးလ်ဗားအား ထပ်မံခေါ်ယူရန် သံသယရှိစရာဖြစ်ကြောင်း Daily Mail က ဖော်ပြခဲ့သည်။
ဘာနာဒိုဆေးလ်ဗားသည် ပြီးခဲ့သည့်နှစ်ကတည်းက မိသားစုနှင့် အနီးကပ်နေထိုင်လိုခြင်းကြောင့် စပိန်သို့ ပြောင်းရွှေ့ ခွင့်ပေးရန် မန်စီးတီးအသင်းထံ တောင်းဆိုထားကြောင်း သိရှိရသည်။
သြဂုတ် (၉) ရက်တွင် ဘာစီလိုနာအသင်းအနေဖြင့် ဘာနာဒိုဆေးလ်ဗားအား ပေါင် (၄၆) သန်းဖြင့် ခေါ်ယူရန် ကမ်းလှမ်းမှုကို မန်စီးတီးအသင်း လက်ခံလိုက်ပြီဟု စပိန်မီဒီယာအချို့က ဖော်ပြခဲ့သည်။
သို့သော် ယင်းသတင်းများမှာ မဟုတ်မှန်ကြောင်း မန်စီးတီးအသင်းက ချက်ချင်းငြင်းဆန်ပယ်ချခဲ့ပြီး ၎င်းကို မဖြစ်မနေရောင်းချရမည်ဆိုပါကလည်း အနည်းဆုံး ပေါင်သန်း (၈၀)အထိ အလိုရှိနေကြောင်း သိရှိရသည်။
မန်စီးတီးနည်းပြ ဂွါဒီယိုလာက အသင်းမှထွက်ခွာလိုသည့် ကစားသမားများကို ဆွဲထားမည်မဟုတ်ဟု ပြောကြားထားသလို၊ ဝက်စ်ဟမ်းကို (၂-၀) ဂိုးဖြင့် အနိုင်ရသည့်ပွဲတွင်လည်း ဘာနာဒိုဆေးလ်ဗားကို အရန်အဖြစ်သာအသုံးပြုခဲ့သည်။
ဘာစီလိုနာအသင်းအနေဖြင့် ယခုခေါ်ယူထားသည့် ကစားသမားများကို လာလီဂါပြိုင်ပွဲတွင် စာရင်းသွင်းနိုင်ခြင်းမရှိသေးသည့်အတွက် ဘာနာဒိုဆေးလ်ဗားကို ယခုအပြောင်းအရွှေ့တွင် ခေါ်ယူရန်မဖြစ်နိုင်ဟုလည်း သုံးသပ်မှုများရှိနေသည်။
