လာလီဂါကလပ် ဘာစီလိုနာအသင်း၏ နူးကမ့်ကွင်း၌ ပျမ်းမျှပွဲကြည့်ရှုသည့် ပရိသတ်အရေအတွက်မှာ ၈၃၃၈၃ ဦးရှိပြီး ယခုရာသီ ဥရောပတွင် ပရိသတ်အများဆုံးအဖြစ် ရပ်တည်နေကြောင်း သိရသည်။
ယင်းစစ်တမ်းကို ဘာစီလိုနာအခြေစိုက် နေ့စဉ်ထုတ်အားကစားသတင်းစာ Sport က ဖော်ပြခဲ့ခြင်းဖြစ်ပြီး ပရိသတ် ၉၉၃၅၄ ဦး ဝင်ဆံ့သည့် နူးကမ့်ကွင်း၌ ပျမ်းမျှပွဲကြည့်ရှုသည့်အရေအတွက်မှာ ၈၃၃၈၃ ဦးအထိရှိကြောင်း သိရသည်။ ယင်းပမာဏမှာ ယခုရာသီ ဥရောပဘောလုံးပွဲစဉ်များအနက် ပရိသတ်ကြည့်ရှုမှုအများဆုံးကွင်းအဖြစ် ရပ်တည်နေပြီး ထိပ်ဆုံး ၁၀ ကွင်း စာရင်းတွင် လာလီဂါကလပ်အဖြစ် ဘာစီလိုနာတစ်သင်းတည်းသာ ပါဝင်ကြောင်း Sport သတင်းစာက ဖော်ပြခဲ့သည်။
ဘာစီလိုနာအသင်းသည် ဂန္ထဝင်ကစားသမား မက်ဆီ ထွက်ခွာသွားသည့် ပြီးခဲ့သည့်ရာသီတွင် ပျမ်းမျှပွဲကြည့်ရှုသည့်ပရိသတ် ၅၀၀၀၀ ဝန်းကျင်သာ ရှိခဲ့သော်လည်း ဇာဗီကို နည်းပြအဖြစ် ခန့်အပ်မှုအပါအဝင် အောင်မြင်မှုလမ်းကြောင်းပေါ် ပြန်လည်ရောက်ရှိလာသဖြင့် ဥရောပတွင် ပရိသတ်ကြည့်ရှုမှုအများဆုံး အဖြစ် ရပ်တည်နေခြင်းဖြစ်သည်။
နူးကမ့်ကွင်း၏နောက်တွင် ဒေါ့မွန် အသင်း၏ Signal Iduna Park ကွင်းက ပျမ်းမျှပရိသတ် ၈၀၇၈၃ ဦးဖြင့် ဒုတိယနေရာ ရပ်တည်နေပြီး ဘိုင်ယန်မြူးနစ်အသင်း၏ Allianz Arena ကွင်း၊ မန်ယူအသင်း၏ အိုးလ်ထရက်ဖို့ဒ်ကွင်း၊ အေစီမီလန်နှင့် အင်တာမီလန်အသင်းတို့၏ ဆန်စီရိုကွင်းက ပျမ်းမျှပရိသတ် ၇၀၀၀၀ ကျော်ဖြင့်လည်းကောင်း၊ မာဆေးလ်အသင်း၏ Velodrome de Marseille ကွင်း၊ ဝက်စ်ဟမ်းအသင်း၏ လန်ဒန်အားကစားကွင်း၊ ရှော်လ်ကေးအသင်း၏ Veltins Arena ကွင်း၊ စပါးအသင်း၏ တော့တင်ဟမ်ဟော့စပါးကွင်းတို့က ၆၃၀၀၀ အောက်ဖြင့်လည်းကောင်း ထိပ်ဆုံး ၁၀ ကွင်း စာရင်းတွင် ပါဝင်နေသည်။
သို့သော် ဘာစီလိုနာအသင်းအနေဖြင့် လာမည့်ရာသီတွင် နူးကမ့်ကွင်းကို အကြီးစား ပြင်ဆင်မှုများ ပြုလုပ်မည်ဖြစ်သောကြောင့် ပရိသတ်အများဆုံးစာရင်းတွင် လတ်တလော ပါဝင်နိုင်တော့မည်မဟုတ်ကြောင်း သိရသည်။ နူးကမ့်ကွင်း ပြင်ဆင်တည်ဆောက်ရေးလုပ်ငန်းများကို လာမည့်ရာသီတွင်ပြုလုပ်မည်ဖြစ်သောကြောင့် ဘာစီလိုနာအသင်းအနေဖြင့် ပရိသတ် ၅၉၀၀၀ ဝင်ဆံ့သည့် Estadi Olimpic Lluis Companys ကွင်း၌ ပြောင်းလဲ ကစားရန် စီစဉ်ထားသည်။ နူးကမ့်ကွင်း ပြင်ဆင်ပြီးစီးပါက ပရိသတ် ၁၁၀၀၀၀ အထိ တိုးမြှင့်ကြည့်ရှုနိုင်မည်ဖြစ်ကြောင်း သိရသည်။
