ဘယ်လ်ဂျီယံအသင်း၏ရွှေရောင်မျိုးဆက်သည် ပြင်သစ်နှင့် အီတလီအသင်းများကို ယှဉ်နိုင်ခြင်းမရှိကြောင်း ဘယ်လ်ဂျီယံလက်ရွေးစင်ကွင်းလယ်လူ ဒီဘရိုင်းနားက ဝန်ခံသွားခဲ့သည်။
ဘယ်လ်ဂျီယံအသင်းသည် UEFA Nations League နောက်ဆုံးအဆင့်ပြိုင်ပွဲ၏ ဆီမီးဖိုင်နယ်တွင် ပြင်သစ်အသင်းကို (၂-၃)ဂိုး၊ တတိယနေရာလုပွဲတွင် အီတလီအသင်းကို (၁-၂)ဂိုးဖြင့် အရေးနိမ့်ကာ စတုတ္ထနေရာဖြင့်သာ ကျေနပ်ခဲ့ရခြင်းဖြစ်သည်။
”ထိပ်တန်းအသင်းတချို့နဲ့ ကစားရချိန်တိုင်း မှာ ကျွန်တော်တို့ အကောင်းဆုံးကစားနိုင်ခဲ့ပါတယ်။ မျက်နှာသစ်ကစားသမားတွေကလည်း ပိုမိုလုပ်ဆောင်နိုင်ခဲ့ကြတယ်။ ဒီလိုအရည်အချင်းရှိတဲ့အသင်းတွေနဲ့ ကစားခဲ့ရလို့လည်း သူတို့အတွက်လည်း အတွေ့အကြုံကောင်းတွေ ရခဲ့တယ်။ ဒါပေမဲ့ ကံမကောင်းစွာနဲ့ပဲ ကျွန်တော်တို့ နှစ်ပွဲစလုံး အရေးနိမ့်ခဲ့ရတယ်။ မရိုမသေစကားပြောရရင် အက်စ် တိုးနီးယားလိုအသင်းမျိုးနဲ့ ကျွန်တော်တို့ ကစားခဲ့ရတာ မဟုတ်ပါဘူး။ ဒီစိန်ခေါ်မှုတွေက သူတို့အတွက် လိုအပ်ပါတယ်။ တစ်ဦးချင်းအပြင် အသင်းအတွက်ပဲရောပေါ့။ အသင်းနဲ့ပတ်သက်ပြီး ကျွန်တော်တို့ အရှိတရားကို လက်ခံရပါမယ်။ အီတလီ၊ ပြင်သစ်နဲ့ စပိန် အသင်းတွေမှာတော့ ထိပ်တန်းကစားသမား ၂၂ ယောက်ထဲက ရွေးချယ်နိုင်ပြီး ကျွန်တော်တို့မှာ ဒါမျိုး မရှိပါဘူး”ဟု ဒီဘရိုင်းနားက ပြောကြားခဲ့သည်။
ဘယ်လ်ဂျီယံအသင်းသည် ကမ္ဘာ့အဆင့်(၁)နေရာတွင် ၂၀၁၈ စက်တင်ဘာလကတည်းက ရပ်တည်နေခြင်းဖြစ်ကြောင်း သိရသည်။
ဒီဘရိုင်းနား၊ ဟာဇက်၊ လူကာကူ၊ ကော်တိုအာ၊ ဗစ်ဆဲလ်နှင့် မာတင်စ်တို့ ပါဝင်သည့် ရွှေရောင်မျိုးဆက်သည် ၂၀၁၄ ကမ္ဘာ့ဖလားပြိုင်ပွဲကတည်းက ပြိုင်ပွဲတိုင်း ရေပန်းစားသည့်စာရင်း၌ ပါဝင်ခဲ့သည်။
သို့သော် မေဂျာပြိုင်ပွဲနောက်ဆုံး(၄)ကြိမ်တွင် ကွာတားဖိုင်နယ်ထက်ကျော်လွန်သည်မှာ တစ်ကြိမ်သာရှိခဲ့ပြီး ၂၀၁၈ ကမ္ဘာ့ဖလားတွင် တတိယရခဲ့ခြင်းဖြစ်သည်။
