မန်ယူကွင်းလယ်ကစားသမား ဘရူနိုဖာနန်ဒက်စ်က ဘင်ဖီကာအသင်းမှ နိုင်ငံအသင်းဖော် ဂွန်ဆာလိုဟယ်မို့စ်အား ခေါ်ယူရန် အသင်းကို တိုက်တွန်း ပြောကြားခဲ့သည်။
မန်ယူအသင်းသည် ယခုနွေရာသီတွင် ထိပ်တန်းတိုက်စစ်မှူးတစ်ဦးခေါ်ယူရန် ကြိုးပမ်းနေပြီး စပါးတိုက်စစ်မှူး ဟယ်ရီကိန်း၊ နာပိုလီတိုက်စစ်မှူး အိုဆင်မန်နှင့် ဘင်ဖီကာတိုက်စစ်မှူး ဟယ်မို့စ်တို့ကို ပစ်မှတ်ထားနေကြောင်း သိရှိရသည်။
မန်ယူအသင်းအနေဖြင့် စပါးတိုက်စစ်မှူး ဟာရီကိန်းအား ခေါ်ယူရန် ရေပန်းအစားဆုံးဖြစ်နေသော်လည်း ဘရူနိုဖာနန်ဒက်စ်ကမူ ပေါ်တူဂီလက်ရွေးစင်အသင်းဖော် ဟယ်မို့စ်ကိုသာ ခေါ်ယူရန် အသင်းကို တိုက်တွန်းခဲ့ခြင်းဖြစ်သည်။
ဘရူနိုဖာနန်ဒက်စ်က “ဟယ်မို့စ်က ပရီးမီးယားလိဂ်နဲ့ မန်ယူအသင်းမှာ ကစားဖို့ အရည်အသွေးရှိသူပါ။ ကစားသမား ခေါ်ယူခွင့်က ကျွန်တော် လက်ထဲမှာ မရှိပါဘူး။ ဒါပေမဲ့ ဟယ်မို့စ်က Press ကစားရာမှာ အရမ်းကောင်းသလို၊ ပြိုင်ဘက်ဂိုးဧရိယာထဲမှာ အရမ်းကောင်းမွန်သူပါ။ သူ့အနေနဲ့ လက်ရှိပုံစံအတိုင်း ဆက်သွားနေမယ်ဆိုရင် အနာဂတ်မှာ ကမ္ဘာ့အကောင်းဆုံးတိုက်စစ်မှူး ဖြစ်လာနိုင်တဲ့ အလားအလာတွေရှိနေပါတယ်” ဟု ပြောကြားခဲ့သည်။
အသက် (၂၂) နှစ်အရွယ်ရှိ ဟယ်မို့စ်သည် ယခုရာသီတွင် ဘင်ဖီကာအတွက် ပြိုင်ပွဲစုံ (၄၆) ပွဲတွင် (၂၆) ဂိုးသွင်းယူခဲ့ပြီး ဘင်ဖီကာအသင်းသည် ၎င်းအတွက် ပေါင်သန်း (၁၀၀)အထိ အလိုရှိနေကြောင်း သိရှိရသည်။
