ယနေ့နံနက် အစောပိုင်းမှာ ကစားခဲ့တဲ့ အက်ဖ်အေဖလား တတိယအဆင့် ပွဲစဉ်မှာ လက်ရှိ ချန်ပီယံ အာဆင်နယ် အသင်းဟာ အချိန်ပို သွင်းဂိုးတွေ နဲ့ အတူ နယူးကာဆယ် အသင်းကို အနိုင်ရပြီး နောက်တစ်ဆင့်ကို တက်လှမ်း သွားနိုင်ခဲ့ပါတယ် ။
အာဆင်နယ် နဲ့ နယူးကာဆယ် အသင်းဟာ သာမန် ပွဲကစားချိန် အတွင်း ဂိုးမရှိ သရေကျနေခဲ့တာကြောင့် အချိန်ပို မိနစ် ၃၀ ထပ်ကစားခဲ့ရပြီး အချိန်ပိုမှာ စမစ်ရို ၊ အူဘာမီယန်း သွင်းဂိုး တွေကြောင့် ဂန်းနားတို့ အနိုင် ရသွားခဲ့တာ ဖြစ်ပါတယ် ။
အာဆင်နယ် အသင်း ရဲ့ နိုင်ပွဲမှာ အဓိက ကျခဲ့သူတွေဟာ ပွဲထွက် ကစားသမားတွေ ဖြစ်တဲ့ လီနို ၊ တီယာနေး အပြင် လူစားဝင် ကစား ကစားသမားတွေ ဖြစ်ကြတဲ့ စမစ်ရို ၊ ဆာကာ ၊ ရှာကာ နဲ့ လာကာဇက် တို့ပဲ ဖြစ်ပါတယ် ။ စမစ်ရို နဲ့ ဆာကာ ဝင်လာချိန်မှာ အာဆင်နယ် အသင်းဟာ အခွင့်အရေးတွေ အများအပြား ရခဲ့ပြီး လာကာဇက် ဝင်လာချိန်မှာတော့ ဂိုးစရခဲ့ပါတယ် ။
အဆိုပါပွဲ ဒုတိယပိုင်း ပွဲပြီးခါနီးမှာ ကွင်းလယ် ဒိုင်လူကြီးက အာဆင်နယ် လူငယ် ကွင်းလယ်လူ စမစ်ရို ဟာ လောင်းစတက် ကို ဖျက်ထုတ်ပုံ ကြမ်းတမ်းတယ်လို့ ယူဆပြီး အနီကဒ်ပြ ထုတ်ပယ် ခဲ့ပါသေးတယ် ။ ဒါပေမယ့် ဒိုင်လူကြီး ဟာ VAR အကူအညီ ရယူကာ စမစ်ရို ရဲ့ ပြစ်ဒဏ် ကျူးလွန်မှုကို ပြန်ကြည့်ပြီး ရည်ရွယ်ချက် မပါတာကြောင့် အဝါကဒ် ပြောင်းလဲ ပြသခဲ့ပါတယ် ။
ဒိုင်လူကြီး ရဲ့ ဆုံးဖြတ်ချက်ဟာ အာဆင်နယ် အတွက်ကော စမစ်ရို အတွက်ပါ သက်သာရာ ရစေခဲ့ပြီး အင်္ဂလန် လူငယ်လေးဟာ အသင်းကို နောက်တစ်ဆင့် တက်စေမယ့် အနိုင်ဂိုးကို လှပ သေသပ်စွာ သွင်းယူ ပေးခဲ့ပါတယ် ။
ပွဲအပြီးမှာတော့ စမစ်ရို က သူ့ကို အနီကဒ် ပြသထားရာကနေ ပယ်ဖျက်ပေးခဲ့တဲ့ အတွက် စိတ်သက်သာရာ ရခဲ့ကြောင်း ဝန်ခံ သွားခဲ့ပါတယ် ။ ” ကျွန်တော် သိပ်ကို ပျော်ရွှင် ရပါတယ် ၊ အနိုင်ဂိုး မသွင်းနိုင်ခင် ရှေ့က ဖြစ်စဉ်မှာ အနီကဒ် ပြသ ခံခဲ့ရပေမယ့် အတည် မဖြစ်ခဲ့လို့ စိတ်သက်သာရာ ရခဲ့ပါတယ် ။ “
” ဒါပေမယ့် ကျွန်တော် ပြောနိုင်တာက အဲ့ဒီ ထိခိုက်မှု က လုံးဝ ရည်ရွယ်ချက် မပါဘူး ဆိုတာပါပဲ ။ သွင်းဂိုး တစ်ဂိုး ရပြီး အသင်း ကလည်း နောက်တစ်ဆင့် တက်လှမ်း နိုင်ခဲ့တဲ့ အတွက် ဝမ်းသာ ပျော်ရွှင် မိပါတယ် ။ “
” ကျွန်တော်တို့ ဒီပွဲဟာ ဘယ်လောက် အထိ ခက်ခဲ မလဲ ဆိုတာ သိခဲ့ပါတယ် ၊ သူတို့က ပြိုင်ဘက်ကောင်း တစ်သင်း ဆိုတာလည်း သိပါတယ် ၊ ဒါပေမယ့် အဆုံးသတ်မှာတော့ သူတို့ကို ဖြိုခွင်း နိုင်ခဲ့ပါတယ် ၊ အနိုင်ရလဒ် အတွက် ပျော်ရွှင် မိပါတယ် ။ “
” ဒီနေ့ နိုင်ပွဲက ကျွန်တော်တို့ တစ်တွေ ဘယ်လောက် အထိ စည်းလုံး ညီညွှတ်မှု ရှိသလဲ ဆိုတာ ပြသလိုက်တာပါပဲ ။ ကျွန်တော်တို့ ကွင်းပြင်ပမှာလည်း အတူတကွ အပြင်းအထန် ကြိုးစားတာကြောင့် ကွင်းအတွင်းမှာ အသင်းလိုက် ပုံစံကောင်းရတာပါ ၊ နိုင်ပွဲတွေ ဆက်တိုက် ရနေတဲ့ အတွက် ဝမ်းသာမိပါတယ် ၊ ရှေ့လျှောက် နိုင်ပွဲတွေ ရအောင် ကြိုးစား သွားမှာပါ ။ “
အသင်း ရလဒ်ကောင်းတွေ ပြန်ရလာရာမှာ အရေးပါတဲ့ အစိတ်အပိုင်းကနေ ပါဝင်ခွင့် ရတဲ့အပေါ် ” သိပ်ကို ကောင်းပါတယ် ၊ လူငယ် ကစားသမား တစ်ဦး အနေနဲ့ ဒီအသင်းအတွက်ကစားခွင့် ရဖို့ကို အမြဲတမ်း အိပ်မက် မက်နေခဲ့တာပါ ၊ လူငယ်တွေ အခွင့်အရေး ရလာတာမျိုးက သိပ်ကောင်းပါတယ် ၊ ကျွန်တော်ကိုယ်တိုင်လည်း ဒီအသင်းအတွက် ကစားရတာ ပျော်ရွှင်မိပါတယ် ။ ” လို့ ပြောကြား လိုက်ပါတယ် ။
