ပရီးမီးယားလိဂ်ချန်ပီယံ မန်စီးတီးအသင်းသည် ဗီလာအသင်းခေါင်းဆောင် ဂရီးလစ်ရှ်ကို ဗြိတိန်စံချိန်တင်ပြောင်းရွှေ့ကြေး ပေါင်သန်း (၁၀၀) ဖြင့် ကမ်းလှမ်းခဲ့ပြီး လာမည့်တစ်ပတ်တွင် အပြောင်းအရွှေ့အပြီးသတ် နိုင်ဖွယ်ရှိကြောင်း ဗြိတိန်မီဒီယာများက ဖော်ပြလျက်ရှိသည်။
အင်္ဂလန်လက်ရွေးစင်ကွင်းလယ်လူ ဂရီးလစ်ရှ် (၂၅ နှစ်) သည် ယခုနွေရာသီတွင် မန်စီးတီးအသင်း၏ အဓိကပစ်မှတ်ကစားသမားနှစ်ဦး အနက် တစ်ဦးဖြစ်ပြီး ကျန်တစ်ဦးမှာ စပါးအသင်း၏ အင်္ဂလန်အသင်း ခေါင်းဆောင် တိုက်စစ်မှူး ဟာရီကိန်းဖြစ်သည်။ မန်စီးတီးအသင်းသည် ဂရီးလစ်ရှ်ကိုခေါ်ယူရန် စိတ်ဝင်စားနေကြောင်း သတင်းများထွက်ပေါ် နေသည်မှာ ကာလအတန်ကြာပြီဖြစ်ပြီး ပြောင်းရွှေ့ကြေး ပေါင်သန်း (၁၀၀) ဖြင့် ကမ်းလှမ်းလိုက်ပြီဖြစ်ကြောင်း BBC၊ Sky Sports၊ Daily Mail စသည့် နာမည်ကြီး ဗြိတိန်သတင်းဌာနများစွာက သောကြာနေ့ တွင် ဖော်ပြခဲ့သည်။ ယင်းပမာဏမှာ ဗြိတိန်ကလပ်များအတွက် စံချိန်တင် ပြောင်းရွှေ့ကြေးဖြစ်ပြီး ၂၀၁၆ ခုနှစ်တွင် မန်ယူအသင်းသို့ ပေါင် (၈၉) သန်းဖြင့် ပြောင်းရွှေ့ခဲ့သည့် ပေါ့ဘာ၏ပြောင်းရွှေ့ကြေးထက် ပေါင် (၁၁) သန်း ပိုများကြောင်း သိရသည်။
ဗီလာအသင်းကမူ ၎င်းတို့၏အကယ်ဒမီမှ ထွက်ပေါ်လာသည့် အသင်းခေါင်းဆောင်ဖြစ်သူကို လက်လွှတ်ရန် ဆန္ဒမရှိဘဲ မြင့်မားသည့် လစာဖြင့် သက်တမ်းတိုးစာချုပ် ထပ်မံချုပ်ဆိုရန် ပြင်ဆင်လျက်ရှိသည်။ ဂရီးလစ်ရှ်သည် ပြီးခဲ့သည့်နှစ် စက်တင်ဘာတွင် ၂၀၂၅ ခုနှစ်အထိ သက် တမ်းရှိသည့် စာချုပ်သစ်ချုပ်ဆိုထားပြီးဖြစ်သော်လည်း ဗီလာအသင်းက ထပ်မံချုပ်ဆိုရန် ကြိုးပမ်းနေခြင်းဖြစ်သည်။ Daily Mail သတင်းဌာန၏ ဖော်ပြမှုအရ ဂရီးလစ်ရှ်အနေဖြင့် မန်စီးတီးအသင်းတွင် တစ်ပတ်လစာ ပေါင်နှစ်သိန်းအထက် ရရှိမည်ဖြစ်ပြီး (၅)နှစ်စာချုပ် ချုပ်ဆိုဖွယ်ရှိကာ လာမည့်တစ်ပတ် အစောပိုင်းမှာပင် အပြောင်းအရွှေ့အပြီးသတ်နိုင်ဖွယ် ရှိကြောင်း သိရသည်။ လက်ရှိအချိန်တွင်မူ ၎င်းအား ကမ်းလှမ်းထားသည့် သတင်းကို မန်စီးတီးအသင်းက အတည်ပြုခြင်းမရှိသေးသလို ဗီလာ အသင်းကလည်း အကြောင်းပြန်မှုမရှိသေးကြောင်း သိရသည်။
ဗီလာအသင်းသည် လာမည့်ရာသီအတွက် ပြင်ဆင်မှုများစွာပြုလုပ် လျက်ရှိပြီး ပရီးမီးယားလိဂ်တန်းတက် နောဝစ်ချ်အသင်း ကွင်းလယ်တိုက် စစ်ကစားသမား ဘန်ဒီယာကို ကလပ်စံချိန်တင်ပြောင်းရွှေ့ကြေး ပေါင် (၃၃) သန်းဖြင့် ခေါ်ယူထားသလို ကစားသမားဟောင်းဖြစ်သည့် အင်တာ မီလန်အသင်းနောက်ခံလူ အက်ရှ်လေယန်းကိုလည်း ပြန်လည်ခေါ်ယူ ထားသည်။ ထို့ပြင် လေဗာကူဆင်အသင်း၏ တောင်ပံကစားသမား လီယွန်ဘိုင်လေအားခေါ်ယူရန် သဘောတူညီမှုရရှိထားပြီး၊ ဆောက်သမ်တန်အသင်းခေါင်းဆောင် ဝက်ပရောက်စ် ကို ပေါင် (၂၅) သန်းဖြင့် ကမ်းလှမ်းရာ ပယ်ချခံထားရကြောင်း သိရသည်။
