အာဆင်နယ်အသင်းသည် ဖီအိုရင်တီးနားအသင်းမှ ဆားဘီးယားလက်ရွေးစင်တိုက်စစ်မှူး ဗလာဟိုဗစ်အား ခေါ်ယူနိုင်ရန် အခွင့်အရေးနည်းသွားပြီးနောက် ရီးယဲလ်မက်ဒရစ်အသင်း၌ ပုံမှန်နေရာပျောက်ဆုံးနေသည့် ယိုဗစ်အား အငှားခေါ်ယူရန် ကြိုးပမ်းလာ ကြောင်း သိရသည်။
အာဆင်နယ်အသင်းတွင် အသင်းခေါင်းဆောင် အူဘာမီယန်း၏အနာဂတ် မသေချာတော့သလို၊ လာကာဇက်၊ အန်ကယ်တီယာတို့မှာလည်း ယခုရာသီကုန်တွင် သက်တမ်း ကုန်ဆုံးမည်ဖြစ်သောကြောင့် ဇန်နဝါရီအပြောင်းအရွှေ့စျေးကွက်အတွင်း တိုက်စစ်ပိုင်းအားဖြည့်ရန် ပြင်ဆင်ခဲ့သည်။
ဗလာဟိုဗစ်အား အဓိကထားကြိုးပမ်းခဲ့သော်လည်း ကစားသမားကိုယ်တိုင်က ဂျူဗင်တပ်စ်အသင်းသို့သာ ပြောင်းရွှေ့ရန် စိတ်အားထက်သန်ခဲ့သည်။ ဂျူဗင်တပ်စ်အသင်းသည် ဖီအိုရင်တီးနားအသင်းမှ ဆားဘီးယားတိုက်စစ်မှူး ဗလာဟိုဗစ်ကို ကူလူဆက်ဗ်စကီးနှင့် ယူရိုသန်း ၃၀ အလိုက်ပေးပြီး ကမ်းလှမ်းလိုက်ကြောင်း မီဒီယာများစွာက ဖော်ပြခဲ့သည်။
ဂျူဗင်တပ်စ်အသင်းသည် ဗလာဟိုဗစ်ကို ခေါ်ယူရန် အစောပိုင်းကတည်းက စိတ်ဝင်စားနေခဲ့သော်လည်း ဘဏ္ဍာရေးအခြေအနေအရ ပရီးမီးယားလိဂ်အသင်းများနှင့် ယှဉ်ပြိုင်နိုင်စွမ်းမရှိကြောင်း သတင်းထွက်ခဲ့သည်။ သို့သော် အာဂျင်တီးနားတိုက်စစ်မှူး ဒီဘားလားကို ခုနစ်လဝန်းကျင် ဆုံးရှုံးရတော့မည်ဖြစ်သောကြောင့် ဗလာဟိုဗစ်ကို အားဖြည့်ခေါ်ယူရန် စီစဉ်လာခြင်းဖြစ်ကြောင်း သိရသည်။